"Avropa Muzeylər Gecəsi"ndə Azərbaycan sərgiləri maraqla qarşılanıb

UNESCO-un mənzil-iqamətgahında Heydər Əliyev Fondunun təşkilatçılığı ilə Azərbaycanın mədəni dəyərlərinin əks olunduğu "Azərbaycan: ənənədən müasirliyə" adlı sərgi açılıb.

Sərgidə Azərbaycan xalçaları, milli geyimlər, misgərlik və dulusçuluq sənəti nümunələri, zərgərlik məmulatları, milli musiqi alətləri, tanınmış rəssamlarımızın əsərləri, "Bakı-2015" və çövkən oyunundan bəhs edən bürünc eksponatlar və fotolar nümayiş olunur.

Tamaşaçı İzabel Gess sərgidən aldığı təəssürat barədə "Azərtac"a verdiyi müsahibəsində deyib:

"Üç guşədə nümayiş etdirilən biri-birindən maraqlı eksponatlarla tanışlıq ölkənizin istər tarixi, istərsə də mədəniyyətinin zənginliyi barədə dolğun məlumat almağıma kömək edib.

Etiraf edim ki, məhz bu sərgi ilə tanışlıq sayəsində Azərbaycan barədə səthi məlumatlarımı genişləndirə bildim.

Bildirmək istəyirəm ki, bundan əvvəl də Azərbaycanla bağlı bəzi tədbirlərdə iştirak etmişəm. Amma Heydər Əliyev Fondu tərəfindən təşkil olunan belə möhtəşəm sərgi ilə ilk dəfədir tanış oluram".

"Avropa Muzeylər Gecəsi" çərçivəsində ölkəmizin mədəniyyəti ilə bağlı başqa bir sərgi Parisdəki Azərbaycan mədəniyyət mərkəzində təşkil edilib.

Parisdə fəaliyyət göstərən "Azərbaycan evi"nin təşkilatçılığı ilə Fransada yaşayan və Azərbaycan dilini öyrənən balaca soydaşlarımız da mərkəzdə nümayiş etdirilən sərgi ilə yaxından tanış olublar.

525-ci qəzet.- 2015.- 19 may.- S.7.