“Bizim kino günləri - audiovizual məkanda peşəkarlıq”

Ötən gün “Nizami” Kino Mərkəzində Mədəniyyət və Turizm Nazirliyi Cəfər Cabbarlı adına “Azərbaycanfilm” kinostudiyası ilə birgə “Bizim kino günləri - audiovizual məkanda peşəkarlıq” adlı layihə çərçivəsində tədbir təşkil edib.

Layihəyə əsasən, son illər ekranlaşdırılan Azərbaycan filmləri -”Axınla aşağı”, “Nabat”, “Dərs” və “Yarımçıq xatirələr” nümayiş etdiriləcək. Dekabrın 8-dək “Nizami” Kino Mərkəzi, “Park Cinema” və “28 Cinema” kinoteatrlarında filmlər göstəriləcək. Layihə Azərbaycan kinosunun təbliği, müasir kino mənzərəsində yeri və dəyəri, dünya kino sənayesinə inteqrasiyası, yeni kinomuzda peşəkarlıq məsələlərinə həsr olunub.

Tədbirdə layihənin ideya müəllifi, “Azərbaycanfilm” kinostudiyasının direktoru Müşfiq Hətəmov bu tədbirin keçirilməsinin əsas məramının mətbuat nümayəndələri ilə birlikdə, Azərbaycan kinosunda gedən prosesləri müzakirə etmək, onları yeni layihələr haqqında məlumatlandırmaq olduğunu söyləyib. O, son dövrlər çəkilən filmlərin müzakirə, təhlil və tənqid edilməsi məqsədilə media nümayəndələri ilə bir yerdə kinoklub yaradılması təklifini irəli sürüb. Direktor jurnalistlərlə işbirliyinin zərurliyini çıxışında xüsusi diqqətə çatdırıb.

M. Hətəmov Prezident İlham Əliyevin imzaladığı, 2961 nömrəli sərəncamla təsdiqlədiyi “Azərbaycan Kinosunun 2008-2018-ci illər üzrə İnkişafına dair Dövlət Proqramı”nı xatırladaraq kino sənayesinə dövlət tərəfindən diqqət və qayğı göstərildiyini vurğulayıb.

M.Hətəmov müasir Azərbaycan kino sənayesinin hazırkı mənzərəsi haqqında məlumat verib: “İncəsənətin ən çox tamaşaçı yığan sahəsi olan kinoda peşəkarlıq əsas tələblərdən biridir. Bəzən peşəkarlar layiq olduğu qiyməti almayanda, bəzən peşəkar sənət əsərlərinə düzgün qiymət verilməyəndə o sahədə tənəzzül yaşanır. İstəyərdim ki, belə devizimiz olsun: “Peşəkarlara diqqət yetirək!”

“Azərbaycanfilm” kinostudiyasının ətrafına yaradıcı, istedadlı və peşəkar insanların toplaşdığını vurğulayan M.Hətəmov 2014-cü ilin ölkəmizin kino sahəsi üçün uğurlu olduğunu, filmlərimizin 52 beynəlxalq festivalda təqdim edildiyini söyləyib: “Bu festivallarda ekran əsərlərimiz bir sıra mükafatlara layiq görülməklə yanaşı, artıq müştərək filmlərin çəkilməsi barədə xaricdən təkliflər gəlir. Bu gün “Azərbaycanfilm”in prokatı üçün Səudiyyə Ərəbistanından başlamış İndoneziyayacan distribütorlardan layihə və təkilflər gəlir”.

“Azərbaycanfilm” kinostudiyasında hazırda həyata keçirilən işlər barədə məlumat verən direktor qeyd edib ki, müxtəlif janrlarda ssenarilərin müzakirəsi gedir: “Bununla yanaşı, bu il bir neçə layihələrin də icrasina başlanılıb. Bunlar “Nar” və “Köşk” filmləri, “Qarabağ” və “Qərbi Azərbaycan” layihələridir. Xarici ölkələrdə yaşayıb təhsil alan azərbaycanlı rejissorların çəkdikləri beş qısametrajlı filmdən ibarət ikinci kinoalmanax gələn ilin fevralında təqdim olunacaq. Üçüncü kinoalmanaxa isə müsabiqə elan ediləcək”.

M. Hətəmov “Azərbaycanfilm”də son dövrlərdə kino industriyası ilə bağlı mütəxəssislərin yetişdirilməsi istiqamətində layihələr həyata keçirildiyini bildirib.

Sonra rejissor Asif Rüstəmovun “Axınla aşağı” bədii filmi nümayiş olunub. “Axınla aşağı” -rejissor Asif Rüstəmovun ilk tammetrajlı bədii filmidir. Filmin dünya premyerası 1263 kino mütəxəssisinin-ümumilikdə 12 min 433 akkreditasiya olunmuş ziyarətçinin qatıldığı nüfuzlu Karlovı Varı Beynəlxalq Film Festivalı (Çexiya) çərçivəsində “East of the West” müsabiqə proqramında gerçəkləşib.

Nümayişdən sonra layihənin müəllifləri, filmin yaradıcı heyəti və media nümayəndələri “Azərbaycan kinematoqrafiyasında ailə dəyərləri” mövzusunda müzakirə aparıblar. Film haqqında müxtəlif fikirlər səsləndirilib, jurnalistlərin sualları cavablandırılıb.

Yeni çəkilmiş Azərbaycan filmlərinin televiziyalarda, həmçinin paytaxtla yanaşı bölgələrdəki kinoteatrlarda nümayişi məsələsi də müzakirə olunub.

Layihənin növbəti mərhələlərində, yəni digər üç filmin nümayişinə başlayanda görüşlər və müvafiq mövzular ətrafında fikir mübadiləsi nəzərdə tutulur.

S.ABDULLAYEVA

525-ci qəzet.- 2015.- 21 noyabr.- S.16