Xalq yaradıcılıq nümunələrinin dirçəlişi seminar mövzusu olub

 

 

Muzey Mərkəzində Mədəniyyət Turizm Nazirliyinin Mədəniyyətşünaslıq üzrə Elmi-Metodiki Mərkəzinin təşkilatçılığı ilə "Unudulmaqda olan xalq yaradıcılıq nümunələrini dirçəltmək" mövzusunda seminar keçirilib.

 

Seminarda çıxış edən Elmi-Metodik Mərkəzin direktoru, siyasi elmlər üzrə fəlsəfə doktoru Asif Usubəliyev seminarın əhəmiyyətindən söz açıb:

 

"Seminarın keçirilməsində məqsəd, əsrlər boyu yaranmış xalq yaradıcılıq nümunələrinin təbliğ olunması, unudulmaqda olan xalq sənətkarlığı nümunələrini bərpa edib dirçəltmək, onları gələcək nəsillərə ötürərək yaşatmaqdır".

 

Seminarda Milli Elmlər Akademiyasının Ədəbiyyat İnstitutunun direktor müavini, professor Məhərrəm Qasımlının "Novruz bayramı mərasimlərinin unudulmuş tarixi motivlərinin bərpasına dair", xalçaçı rəssam Eldar Mikayılzadənin "Xalçanın Azərbaycan xalqının həyatında rolu", Milli Kulinariya Assosiasiyasının prezidenti Tahir Əmiraslanovun "Azərbaycan mətbəx mədəniyyətinin ənənələri" digər mövzularda elmi məruzələri dinlənilib.

 

Tədbirdə mövzular ətrafında çıxışlar edilib, unudulmaqda olan xalq yaradıcılığı nümunələrinin qorunması üçün ayrı-ayrı qurumların fəaliyyətinin gücləndirilməsi təklifləri irəli sürülüb.

 

S.ABDULLAYEVA

525-ci qəzet.- 2015.- 25 noyabr.- S7