Milli Qəhrəman Salatın Əsgərova haqqında film təqdim edilib

"Nizami" Kino Mərkəzində "Milli Qəhrəmanlar" sənədli filmlər həftəsi çərçivəsində Azərbaycanın Milli Qəhrəmanı, jurnalist Salatın Əsgərovaya həsr edilmiş "23" sənədli filminin təqdimatı olub.

Təqdimatı Bakı şəhər icra hakimiyyəti başçısı Aparatının Kino Xidməti İdarəsi təşkil edib. Filmi Mədəniyyət və Turizm Nazirliyinin sifarişi ilə Ramiz Rövşənin ssenarisi əsasında rejissor İsmayıl Zeynalov çəkib.

Tədbir iştirakçıları Salatın Əsgərovanın xatirəsini bir dəqiqəlik sükutla anıblar. Xalq artisti Flora Kərimova qəhrəmana həsr olunmuş mahnı ifa edib.

Ssenari müəllifi Ramiz Rövşən film üzərində fəaliyyətindən danışıb, bildirib ki, hər bir dövr şəxsiyyətlərin simasında tarixdə əbədiləşir və Salatın Əsgərova da öz ölkəsində müəyyən bir dövrün siması olub.

Salatın Əsgərovanın oğlu Ceyhun Əsgərov anasının xatirəsinə göstərilən ehtirama görə tədbir iştirakçılarına təşəkkür edərək bildirib ki, Milli Qəhrəmanlarımız barəsində hər bir film, hər bir kitab, hər bir şeir gələcək nəsillərə müraciətdir, tarixi yaddaşımızdır.

Bakı şəhər icra hakimiyyəti başçısı Aparatının Kino Xidməti İdarəsinin rəisi Gültəkin Nəriman qeyd edib ki, Mədəniyyət və Turizm Nazirliyinin sifarişi ilə Azərbaycanın Milli Qəhrəmanlarına həsr olunan 6 film çəkilib.

Kinorejissor Yalçın Əfəndiyev, Salatın Əsgərovanın bacısı Zümrüd, Yasamal rayon Ağsaqqallar Şurasının sədri, AMEA-nın müxbir üzvü Kərim Kərimov, Müharibə və Əmək Veteranları İctimai Birliyinin sədri Almaz Qasımova, Qarabağ Müharibəsi Əlilləri, Veteranları və Şəhid Ailələri İctimai Birliyinin sədri Bəhram Şeydayev, Salatın Əsgərovanın qələm dostu, "Medik" qəzetinin redaktoru Nigar Məcidova və başqaları qəhrəman haqqında xatirələrini bölüşüblər.

S.ABDULLAYEVA

525-ci qəzet.- 2015.- 27 noyabr.- S.7.