Filmlərimiz XI Kazan beynəlxalq müsəlman kinosu festivalında

Tatarıstanın Kazan şəhərində XI Kazan beynəlxalq müsəlman kinosu festivalı keçirilir.

Sentyabrın 11-dək davam edəcək festival "Mədəniyyət dialoqundan dialoq mədəniyyətinə" devizi altında baş tutacaq.

Festivalın proqramına 25 ölkədən bədii, sənədli və animasiya filmləri olmaqla, ümumilikdə 50 ekran əsəri daxil edilib.

Azərbaycanı festivalda "Bakı sübhdən günbatanadək" sənədli ("Tammetrajlı sənədli filmlər" kateqoriyası) və "Köhnə saat" cizgi ("Animasiya filmləri" kateqoriyası) filmləri təmsil edəcək.

"Bakı sübhdən günbatanadək" tammetrajlı sənədli filmi Polşa kinematoqrafçılarının iştirakı ilə "Dünya sübhdən günbatanadək" beynəlxalq layihəsi çərçivəsində hazırlanıb.

Layihə çərçivəsində şəhər həyatının ayrı-ayrı situasiyalarını əks etdirən 3-4 dəqiqəlik 18 süjet çəkilib və bu filmlərdən 50 dəqiqəlik tammetrajlı sənədli film ərsəyə gəlib. Layihənin Azərbaycandakı tərəfdaşı Mədəniyyət və Turizm Nazirliyi və "Azanfilm" studiyasıdır.

Qeyd edək ki, "Azanfilm"in "Birlik" yaradıcılıq studiyası ilə birgə istehsal etdiyi "Köhnə saat" cizgi filminin rejissoru Cavid Əhədov, bədii rəhbəri Firəngiz Qurbanova, prodüseri Fariz Əhmədovdur.

S.ABDULLAYEVA

525-ci qəzet.- 2015.- 8 sentyabr.- S.7.