Mədəniyyət və Turizm Nazirliyi Beynəlxalq Sülh Gününü qeyd edib

Mədəniyyət və Turizm Nazirliyinin Mədəniyyətşünaslıq üzrə Elmi-Metodiki Mərkəzinin təşkilatçılığı ilə 21 sentyabr-Beynəlxalq Sülh Gününə həsr olunmuş dəyirmi masa keçirilib.

Müvafiq hüquq mühafizə qurumları, Azərbaycan Milli Elmlər Akademiyasının institutları, Vəkillər Kollegiyası, Azərbaycan Respublikasının Prezidenti yanında Dövlət İdarəçilik Akademiyası və Azərbaycan Dövlət Mədəniyyət və İncəsənət Universitetinin nümayəndələrinin iştirakı ilə təşkil olunmuş tədbiri mərkəzin direktoru Asif Usubəliyev açıb.

A. Usubəliyev Prezident İlham Əliyev tərəfindən həyata keçirilən dövlət siyasətinin strateji istiqamətlərindən biri olan sülhə və dözümlülüyə dəvət edən multikulturalizm və mədəniyyətlərarası dialoq kimi dəyərlərin beynəlxalq münasibətlər sistemində təbliği barəsində qonaqlara geniş məlumat verib və bu istiqamətdə Mədəniyyət və Turizm Nazirliyi tərəfindən görülən işlərdən danışıb.

Daha sonra tədbirdə iştirak etmiş qonaqlar öz məruzələrində sülhün və hüquq azadlıqlarının təmin olunması istiqamətində respublikada görülən işlər barəsində ətraflı məlumatlar veriblər.

Tədbir çərçivəsində aparılan təhlil və fikir mübadiləsi zamanı iştirakçılar bir daha belə bir qənaətə gəldilər ki, tolerant və multikultural dəyərlər təkcə dövlət siyasəti deyil, bu eyni zamanda tarixən Azərbaycan xalqına məxsus olan milli keyfiyyətlərdir.

Qeyd olunan dəyər və keyfiyyətlərin qorunmasında isə mədəniyyət işçilərinin rolunun əvəzolunmaz olduğunu bildirən mərkəzin direktoru sülh və əminamanlığın Azərbaycanda dövlət siyasəti olduğunu bildirib.

S.ABDULLAYEVA

525-ci qəzet.- 2015.- 19 sentyabr.- S.17.