Mədəniyyət və İncəsənət Universitetində Milli musiqi qeyd edilib

Milli musiqi günü kimi qeyd olunan Azərbaycan professional musiqisinin banisi, dahi Üzeyir Hacıbəylinin doğum günü sentyabr ayının 18-i Azərbaycan Dövlət Mədəniyyət və İncəsənət Universitetində də qeyd olundu. Universitetin rektoru professor Fərəh Əliyeva, müəllim və tələbə heyətinin iştirak etdiyi tədbirdə əvvəlcə “Musiqi sənəti” fakültəsinə qəbul olunan tələbələrə tələbə biletləri təqdim edildi. Rektor məhz belə gözəl və əlamətdar bir gündə tələbə biletlərinin verilməsinin onlar üçün də yadda qalan alcağını, 100 ilə yaxın tarixə malik bu Universitetin müəllimlərindən bəhrələnə biləcəkləri, peşəkar təhsil və təcrübə qazanacaqlarını qeyd edərək, onları bir daha təbrik etdi.

Daha sonra söz tələbələrə verildi. Musiqişünaslıq üzrə III kursda təhsil alan tələbə Məmmədova Şəfaqət hazırladığı gözəl və maraqlı məruzə ilə çıxış edərək, Üzeyir bəyin yaradıcılığına bir nəzər saldı. Konsert ənənəvi olaraq bəstəkarın qəhrəmanlıq, mərdlik ruhlu “Koroğlu” opresının uvertyurası ilə başladı. Xalq artisti, professor, gözəl Ustad sənətkar Zamiq Əliyevin rəhbərliyi ilə tələbələrdən ibarət ansambl tədbir boyu Üzeyir bəyin “Cəngi”sini, romanslarını, nadir ifa olunan “Şəfqət bacısı” mahnısı və digər seçilmiş əsərlərini ifa edərək, Üzeyir bəyi, onun yaradıcılığının bütün dövrlərə aid olduğunu, hər zaman aktuallığını saxladığını, illər keçsə də onun yaradıcılığına, əsərlərinə marağın daha da artdığını bir daha sübut etdi.

525-ci qəzet.- 2015.- 22 sentyabr.- S.7