Üzeyir Hacıbəylinin 130 illiyi Ağcabədidə geniş qeyd edilib

Azərbaycan professional musiqi sənətinin banisi, dahi bəstəkar, görkəmli ictimai xadim Üzeyir Hacıbəylinin 130 illiyi ölkəmizin hər yerində möhtəşəm bayram tədbirləri ilə müşayiət olunub. Heydər Əliyevin 18 sentyabr 1995-ci il tarixli sərəncamına uyğun olaraq dünyaşöhrətli musiqiçinin doğum günü bu il də musiqisevərlər tərəfindən Milli Musiqi Günü kimi təntənə ilə qeyd edilib.

Heydər Əliyev Fondunun, respublika Mədəniyyət və Turizm Nazirliyinin dəstəyi ilə sentyabrın 18-dən 28-dək keçirilən, Üzeyir Hacıbəyliyə həsr olunmuş VII Beynəlxalq Musiqi Festivalı çərçivəsində təşkil olunan tədbirlər də bu baxımdan mühüm əhəmiyyət kəsb edib, ölkədə və beynəlxalq aləmdə geniş rezonans doğurub.

Dahi bəstəkarın bioqrafiyasında xüsusi yeri olan Ağcabədidə də yubiley münasibəti ilə silsilə bayram mərasimləri həyata keçirilib. Onların sırasında rayon icra hakimiyyətinin, mədəniyyət və turizm şöbəsinin təşəbbüsü ilə təşkil olunan tədbir orijinallığı ilə diqqəti çəkib. Rayonda bu istiqamətdə bundan əvvəl də bir sıra mədəniyyət tədbirlərinin təşkil olunduğunu vurğulayan Üzeyir Hacıbəyli adına Qarabağ Muğam Mərkəzinin direktoru Tofiq Cəfərovun qeyd etdiyi kimi, sözügedən bayram mərasimi bəstəkarın məşhur əsərlərindəki obrazların, personajların iştirakı ilə keçirilən yürüşlə start götürüb. Rayondakı Heydər Əliyev adına meydandan başlayıb Qarabağ Muğam Mərkəzində başa çatan yürüş şəhər sakinləri tərəfindən məharətlə qarşılanıb.

Tədbir iştirakçıları Üzeyir Hacıbəylinin şəhər mərkəzində ucaldılan abidəsi və Qarabağ Muğam Mərkəzinin qarşısındakı büstü önünə tər çiçək dəstələri düzüb, onun xatirəsini ehtiramla yad ediblər.

Sonra Üzeyir Hacıbəylinin adını daşıyan Qarabağ Muğam Mərkəzində təntənəli yubiley mərasimi başlanıb. İctimaiyyət nümayəndələrinin qatıldıqları tədbirdə Ağcabədi rayon icra hakimiyyətinin başçısı Şahin Məmmədov, millət vəkili Tahir Rzayev iştirak ediblər.

Yığıncaqda adıçəkilən rayon mədəniyyət və turizm şöbəsinin müdiri Rza Quliyev məruzə edərək, Üzeyir Hacıbəylinin zəngin həyat və fəaliyyəti, Azərbaycan professional musiqisinin inkişafında onun göstərdiyi misilsiz xidmətlərindən, dahi bəstəkara ölkəmizdə və dünyada bəstənilən yüksək hörmət və ehtiramdan ətraflı söhbət açıb.

Söz sənət adamlarına, musiqiçilərə verilib. Yaqub Məmmədov adına rayon Mədəniyyət evi dram dərnəyinin üzvlərinin Üzeyir Hacıbəylinin "Arşın mal alan" və "O olmasın bu olsun" musiqili komediyalarından məharətlə nümayiş etdirdikləri səhnələr, yerli sənətçilər Ulduz Qarayeva, Həvva Əmrahova, Arzu Abbasova və Xaliqverdi Qarayevin ifasında bəstəkarın mahnı və romanslarından ibarət konsert proqramı tamaşaçılara yüksək əhval-ruhiyyə bəxş edib, əsil bayram ovqatı yaşadıb.

Rayonda VII Beynəlxalq Musiqi festivalı çərçivəsində keçirilən bayram tədbirləri Xalq artisti Ağaverdi Paşayevin bədii rəhbəri olduğu Fikrət Əmirov adına Azərbaycan Dövlət Mahnı və Rəqs Ansamblının Qarabağ Muğam Mərkəzində təqdim etdiyi geniş konsert proqramı ilə davam etdirilib.

Tədbirdə Ağcabədi rayon icra hakimiyyətinin başçısı Şahin Məmmədov, millət vəkilləri Aqil Abbas və Tahir Rzayev iştirak ediblər.

Tədbiri rayon icra hakimiyyəti başçısının müavini, ictimai-siyasi və humanitar məsələlər şöbəsinin müdiri Naibə Mustafayeva açaraq, mərasim iştirakçılarını salamlayıb, musiqiçilərə uğurlar diləyib.

Bayram mərasimi Hacıbədəlli kənd uşaq musiqi məktəbi şagirdlərinin ifasında Ü.Hacıbəylinin "Leyli və Məcnun" operasından "Şəbi-hicran" xoru ilə başlanıb.

Musiqi bayramında respublikanın Əməkdar artisti Almaz Orucova, tanınmış müğənni Nurlan Əzizbəyli, Beynəlxalq mahnı müsabiqələrinin iştirakçıları Ehtiram Hüseynov və Kazım-Nicat Fəxrinin uğurla ifa etdikləri Üzeyir Hacıbəylinin "Arşın mal alan" operettasından "Əsgərin ariyası", "Telli və Vəlinin dueti", "Qaragöz" mahnısı, "Şuşanın dağları", "İrəvanda xal qalmadı" xalq mahnıları iştirakçıların böyük marağına və rəğbətinə səbəb olub.

Sözügedən ansamblın solistləri, Əməkdar artist Elnur Süleymanov, Viktoriya Şahmuradova, Ruslan Hacıyev, Günel Şeyxova, Əlibəndə Əliyev, Aydan Kamilova və başqalarının sərgilədikləri "Uzundərə", "Naz eləmə" , Rauf Hacıyevin "Azərbaycan", Cahangir Cahangirovun "Bulaq başında" rəqsləri, habelə Akim Abdullayevin balabanda ifa etdiyi "101" rəqsi,eləcə də digər konsert nümunələri tamaşaçıların zövqünü oxşayıb, alqışlarla qarşılanıb.

Tədbir Fikrət Əmirov adına Azərbaycan Dövlət Mahnı və Rəqs Ansamblı solistlərinin ifasında "Yallı" rəqsi ilə yekunlaşıb.

Yəhya PAŞAZADƏ

525-ci qəzet.- 2015.- 23 sentyabr.- S.2.