VII Beynəlxalq Musiqi Festivalı çərçivəsində geniş tədbirlər keçirilib

Üzeyir Hacıbəylinin 130 illiyinə həsr olunmuş VII Beynəlxalq Musiqi Festivalı çərçivəsində Müslüm Maqomayev adına Dövlət Filarmoniyasında "Baku Canta Napoli" adlı konsert proqramı təşkil olunub.

Konsertdə dünya şöhrətli italyan dirijoru Fabrisio Festanın dirijorluğu ilə Ü.Hacıbəyli adına Azərbaycan Dövlət Simfonik Orkestrinin təqdimatında dünya bəstəkarlarının klassik musiqi əsərlərindən ibarət kompozisiyalar səsləndirilib.

Tədbirdə İtaliyanın Azərbaycandakı səfiri Ciampaolo Kutillo çıxış edərək musiqi festivalının əhəmiyyətindən söz açıb. Səfir qeyd edib ki, VII Beynəlxalq Musiqi Festivalı çərçivəsində silsilə konsert proqramlarının təşkil edilməsi olduqca təqdirəlayiqdir.

Konsert proqramı italiyalı pianoçu Rikkardo Pyaçentininin müşayiəti ilə solistlər Tisiani Skandaletti və Azərbaycanın Xalq artisti Samir Cəfərov tamaşaçılara klassik musiqi əsərləri təqdim ediblər. Daha sonra görkəmli İtaliya bəstəkarları C.Verdinin "Traviata" operasından prelüd", F.Festanın "İtaliya üslubunda uvertüra", G.Deraconun "Neapolitan xalq havaları əsasında simfonik fantaziya", S.Biksionun "Mamma", F.Tostinin "A Vucchella" neapolitan mahnıları və digər musiqi əsərləri səsləndirilib.

"Baku Canta Napoli" konsert proqramı tamaşaçılar tərəfindən maraqla qarşılanıb.

S.ABDULLAYEVA

525-ci qəzet.- 2015.- 29 sentyabr.- S.7.