Parisdə Dağlıq Qarabağ münaqişəsinə dair kitab nəşr olunub

Bakı Dövlət Universitetinin müəllimi, hüquq elmləri doktoru Fazil Zeynalovun "Dağlıq Qarabağ münaqişəsi, ədalətli sülh, yoxsa qaçılmaz müharibə: tarixi, geosiyasi və hüquqi baxış" adlı kitabının ikinci nəşri işıq üzü görüb.

Kitab Fransanın məşhur "L'Harmattan" nəşriyyatının diplomatiya və strategiya kolleksiyasında nəşr edilib.

Kitabda Dağlıq Qarabağ münaqişəsinin tarixi real faktlar əsasında araşdırılıb. Müəllif Dağlıq Qarabağın qədim tarixini alban tarixşünaslığı və orta əsr ərəb mənbələri əsasında araşdıraraq, onun Qafqaz Albaniyasının ayrılmaz hissəsi olduğunu diqqətə çatdırır.

Qeyd olunur ki, Dağlıq Qarabağın yerli əhalisini Qafqaz albanları təşkil edib. Onlar uzun müddət öz kimliklərini qoruyub saxlayıblar. Dağlıq Qarabağ bütün dövrlərdə Azərbaycan dövlətlərinin tərkibində olub və Azərbaycanın siyasi, iqtisadi, sosial və mədəni həyatının ayrılmaz hissəsini təşkil edib.

Nəşrdə 1919-cu il avqustun 15-də Dağlıq Qarabağ ermənilərinin Azərbaycanın tərkibində yaşamaq şərtlərini qəbul etməsi və 1921-ci il iyulun 5-də Dağlıq Qarabağa Azərbaycan SSR-in tərkibində muxtariyyət statusunun verilməsi kontekstləri geniş şərh olunur. Həmçinin 1991-ci ildən sonra baş verən proseslər siyasi və hüquqi müstəvidə araşdırılır, Dağlıq Qarabağ münaqişəsinin dövlətlərarası xarakteri, bölgənin erməni milli azlığının separatçılıq tendensiyalarının təbiəti təhlil edilir. Müəllif, eyni zamanda, sülh prosesinə geniş yer verərək, münaqişənin tərəflərin kompromisi əsasında beynəlxalq hüququn prinsip və normalarına uyğun həll olunmasını bir zərurət kimi göstərir.

AzərTAc

525-ci qəzet.- 2016.- 1 aprel.- S.2