Ədəbiyyatşünaslığımıza
böyük töhfə
PROFESSOR TEYMUR ƏHMƏDOVUN 5 CİLDLİK "SEÇİLMİŞ ƏSƏRLƏRİ" HAQQINDA
(Əvvəli ötən sayımızda)
Professor Teymur Əhmədovun
yaradıcılığında publisistika başlıca yer tutur. O, ömrünün
müxtəlif vaxtlarında
mtbuatda işlədiyi
kimi, həm də publisistika ilə məşğul olmuş, xalqın problemlərini ifadə etmək üçün məqalələr yazmış,
yaxud publisistika ilə məşğul olan görkəmli Azərbaycan publisistlərinin
əsərlərini tədqiq
etmişdir. Bütün
bunlar "Seçilmiş
əsərləri"nin
dördüncü cildində
yer tutur.
Bu cilddə özünün
yaratdığı və
baş redaktoru olduğu "Ata yurdu",
"Vətən səsi",
"Vətən həsrəti",
"Elturan", "Yeni
fikir", "Füyuzat"
qəzet və jurnallarında dərc etdirdiyi məqalələri
toplanmışdır. Deyim ki,
mən Teymur Əhmədovu tədqiqatlarında
klassik alimlərə xas nə qədər
sakit, təmkinli görürəmsə, publisistik
məqalələrində o qədər emosional, həyəcanlı, lazım
gəldiyi yerdə sərtlik göstərən,
bəzən isə həlimliyilə diqqət
çəkən bir publisist olaraq tanıdım. Məsələ burasındadır ki, Teymur Əhmədovun
90-cı ildən bəri
publisistik fəaliyyəti
və redaktorluqlarının
müəyyən qədər
şahidi olmuşam.
"Vətən səsi"
qəzetini nəşr
edərkən
məni də komandasında görmək
istədiyini bildirmiş
və mən Baş arxiv İdarəsindən birbaşa
"Vətən səsi"
qəzetində əvvəlcə
müxbir, sonra isə şöbə müdiri vəzifəsində
işləmişəm. Qəzetin təşkil
edilməsi, materialların
paylanılması, problemlərin
yazılması, tapşırıqların
verilməsi, redaktənin
edilməsi və s. baxımından Teymur Əhmədov bir jurnalistika və idarəetmə məktəbdir.
Olsun ki, o zaman bir gənc
olaraq biz redaktor kimi Teymur Əhmədovdan
çox şey istəyirdik, daha radikal qərarlar gözləyirdik, nə gizlədim, bu belə idi, ancaq bu gün
həmin materiallara baxdıqda, baş redaktor kimi yazdığı
baş məqalələrini
oxuduqda mövcud hadisələri doğru dəyərləndirmənin şahidi
olmaya bilmirsən. Onun bir redaktor kimi
dərc etdirdiyi məqalələrdə xalqın,
dövrün, cəmiyyətin
problemləri cəsarətlə
qoyulur, bir dəfə də şəxsi istəklərini
əks etdirən cümləyə, fikrə
rast gəlmək belə mümkün olmur. Halbuki müasir jurnalistikada bu kimi hallar
az qala
kütləvi hal almışdır. 1990-cı ildə
ilk dəfə "Vətən
səsi" qəzetində
"Gülüstan" və
"Türkmənçay" müqavilələrinin tərcüməsini
bütünlüklə dərc
etmək və Azərbaycanda yaymaq bir redaktor kimi
Teymur Əhmədova nəsib olmuşdur. "Dağlıq Qarabağın
dərdi" məqaləsində
isə problemin əlacını özümüzdə
axtararaq yazırdı:
"Qarabağın dağlıq
ərazisi bu gün yarımcan respublikamızın qara yarasına, dərdinə çevrilmişdir. Hər bir
qeyrətli Azərbaycan
vətəndaşı onun
qayğısını çəkməyi
özünün müqəddəs
borcu bilməlidir.
Belə olarsa öz dərdimizə özümüz
çarə taparıq".
Professor Teymur Əhmədovun "Seçilmiş əsərləri"ndə
yer alan "Ağlı-qaralı günlərimiz",
"Vətəndaşlıq borcumuz", "Bu zülm
yerdə qalmayacaq",
"Ayıq olmalıyıq",
"Fərman yerinə
yetirilməlidir", "Vətən
səsi çağırır",
"Sabah gec olar",
"Vətən tələb
edir", "Milli fəlakət ili-1988", "Yanvar
faciəsi", "Millətlərarası
münasibətlər düzgün
qurulmalıdır", "Erməni siyasi partiyaları və onların Zaqafqaziyada xəyanətkar siyasəti",
"Rusiyanın müəyyən
dairələri daşnak
Ermənistanı silahlandırır",
"Ermənilik insanlığa
ləkədir", "Bədnam
Türkmənçay müqaviləsi"
və s. onlarla məqalələrində Azərbaycanın
mövcud durumdakı tarixi və müasir problemləri ilə bağlı problematik məsələlər
qaldırır, həyəcan
siqnalı verir. "Yeni fikir" qəzetində dərc etdirdiyi "Nəriman Süleymanov", "Üzeyir
Hacıbəyov", "İsmixan
Rəhimov-70", "Cavad Heyət", "Bəxtiyar
Vahabzadə", "Araz
Dadaşzadə", "Araz
Elsəsin müqəddəs
missiyası", "Osman
Sarıvəlli" və
s. oçerklərində ədəbiyyatımızın
və mədəniyyətimizin
görkəmli nümayəndələrinin
yaradıcılığını təqdim edir.
Professor Teymur Əhmədovun
"Füyuzat" jurnalının
redaktoru kimi fəaliyyəti əsası
Əli bəy Hüseynzadə tərəfindən
qoyulan missiyanın davamı olaraq səslənir. Baş redaktorun burada dərc etdirdiyi "Füyuzat" yenidən yarandı", "Gücümüz
birlik və həmrəylikdə", "Azərbaycanın
bütövlüyü uğrunda",
"Ana dili varlığımızdır",
"Vətən, ana Vətən", "Mədəniyyət,
mədəniyyət", "milli mətbuatın qaranquşu", "Rus-erməni
xəyanəti","Tarixin ibrət dərsləri"
və s. onlarla məqalələrində cəmiyyətimizin,
mədəniyyətimizin problemlərini
əks etdirir. Bu cilddə yer alan "Erməni
xəyanəti və ya Andronik Ozanyanın
qanlı əməlləri
(1918-1920-ci illər)", "Ermənilər və həqiqətlər", "Azadlıq
hərəkatının mühüm
mərhələsi" və
s. məqalələrində tarixi və çağdaş problematika
başlıca yer tutur. Andronikin XX əsrin əvvəllərində
Qafqazda Azərbaycan xalqına qarşı törətdiyi soyqırımı
mənbələrin, sənədlərin
dili ilə çatdırır: "Andronikin
quldur dəstəsi hücum etdiyi müsəlman kəndlərində
əhalinin bir hissəsini qəddarcasına
qətlə yetirmiş,
bir hissəsini qovmuş, onların var-yoxunu talan etmişdir. Zəngəzur
qəzası rəisinin
Gəncə qubernatoruna
26 noyabr 1918-ci il tarixli 665 saylı raportunda deyilir ki, ermənilər Sisyan mahalı müsəlmanlarının axırına
çıxdıqdan sonra
Mehri dərəsinin Lehvaz, Tey, Mülk,
Vartanizor, Tuğut, Mərzəcat, Hortağiz,
Dəstəkert müsəlman
kəndlərini dağıtmış,
yüzlərlə əhalini
qırmışlar... Qərbi
Azərbaycanın Uluxanlı
(Zəngibasar, Aşağı
Necili, Xaçaparaq (Zəhmət), Çobankərə
və digər kəndləri də Andranik və Dronun hərbi birləşmələrinin hücumlarına
məruz qalırdı".
"Seçilmiş əsərləri"nin beşinci cildində professor Teymur Əhmədovun müxtəlif
vaxtlarda yazdığı
oçerkləri, hekayələri,
xatirələri, məqalə
və ssenariləri, ədəbi qeydləri toplanmışdır. Demək lazımdır
ki, sonuncu cild Teymur Əhmədov
yaradıcılığının janr müxtəlifliyini,
forma və məzmun zənginliyini ortaya qoyur. Elə mənim özümün də görkəmli bir ədəbiyyatşünas
olaraq tanıdığım
Teymur Əhmədovun bir yazıçı, senarist və publisist kimi zəngin yaradıcılıq
yolu ilə tanış oldum. Mərhum akademik Budaq Budaqovun "Ömrün üç zirvəsi: alim, redaktor, şəxsiyyət" adlı
ön sözündə
də bu fədakar alimin yaradıcılığının müxtəlif aspektləri
qiymətləndirilir.
Professor Teymur Əhmədovun
"Mənim həyatım"
adlı xatirələrini
oxuduqca bu böyük alimin, publisistin nə qədər çətin,
keşməkeşli bir
yol keçdiyinin şahidi oldum. Otuz beş ildən
çox bir zamanda yaxşı tanıdığımı zənn
etdiyim, iyirmi ildən çox bir müddətdə bir yerdə işlədiyim, məqalələrini,
tədqiqatlarını həvəslə
oxuduğum və şəxsiyyətinə sonsuz
sayğı duyduğum
T.Əhmədovu bu əsərlərində yenidən
tanıdım. Müəllif
Şəmkirdə yaşadığı
uşaqlıq illərini
son dərəcə romantik
detallarla xatırlayaraq
yazır: "Anam uşaqlarla Gəncəyə,
bibimgilə qonaq getmişdi. Atam evdə tək
qalmayım deyə məni özü ilə işə - gecə növbəsinə
apardı. Burada fəhlələr
gecəyarı gələcək
yük qatarını
gözləməli idi.
Hamı platformada pambıq tayaları üstündə
uzanıb mürgü
vururdu. Mən də atamla
yanaşı uzanmışdım.
Yuxum gəlirdi.
Paravozun fit səsinə yuxudan ayılanda atamı yanımda görmədim, başımı qaldırmaq istəyəndə rəngbərəng kağızlı konfet sinəmə töküldü. Atam fəhlələrlə vaqondan yük boşaltmağa getmişdi, sakitlik idi".
Professor Teymur Əhmədovun "Bənövşə ətri", “Qürbətdə", "İnsanlıq ərşə çəkilib", "Qvardiya batalyonu", "Damcılı bulağın hekayəti", "Müdrik ağsaqqalın dedikləri", "Qorxu", "Şeytanzadə" və başqa hekayə və oçerkləri onun müəllifinin peşəkar bir yazıçı olduğunu göstərir. Görünür, T.Əhmədov elmi yaradıcılığa daha çox üstünlük verdiyindən onun yazıçılığı sadəcə olaraq arxa plana keçmişdir. "Şeytanzadə" hekayə-xatirəsi isə yazıçının yumor hissini ortaya çıxarır. Yazıçı bu hekayəsində başına gələn hadisələrdən danışır; Sovet hökuməti dövründə şöbə əməkdaşları ilə yola getməyən, onlardan daim donos yazan Şeytanzadə yalnız adına görə deyil, obrazın xarakterinin orijinallığına görə də diqqəti cəlb edir. Yazıçının təsvirində professional təsvirlər Şeytanzadənin mükəmməl obrazını yaratması olur. Müəllif Şeytanzadənin əməllərini ifşa etmək məqsədi güdmür, onu oxucuya göstərir, təsvir edir: "Orta boy, dolu bədənli, ağır-ağır hərəkət edən bu adamın sağ əlində tutduğu rəngi solmuş iri portfelində əlyazmaları, xörək dolu banka, boşqab, xörək qaşığı, iki baş sarımsaq gəzdirərdi.
Şeytanzadə nahar vaxtı əl-üzünü yumağı unutmazdı. Portfeldə nə varsa çıxarıb iş stolu üstündə səliqə ilə süfrə açar, heç kəsə məhəl qoymadan xörəyini mırçıltı ilə yeyərdi".
"Seçilmiş əsərləri"nin beşinci cildindəki "Xaqani Şirvani", "Nizami Gəncəvi", "Mirzə Fətəli Axundov" ssenariləri müəllif yaradıcılığının zənginliyinin ifadəsidir. Cildin "Ədəbi qeydlər" bölümündə isə tədqiqatçının onlarla ədəbi hadisə haqqında məqalələri, dərc edilmiş monoqrafiyalar barədə resenziyalar, yazılmış dissertasiyalar haqqında rəyləri dərc edilmişdir.
Professor Teymur Əhmədovun beşcildlik "Seçilmiş
əsərləri" ədəbi, ictimai
həyatımızın mühüm hadisəsi
olmaqla yanaşı, ədəbiyyatşünaslığın
uğuru hesab
olunmalıdır. İnanıram ki, müəllifinin
böyük zəhmətinin məhsulu olan bu beşcildlik
ədəbi, ictimai fikrimiz,
ədəbiyyatşünaslığımız üçün ən yaxşı mənbələrdən
biri olacaqdır.
Bədirxan ƏHMƏDOV
525-ci qəzet.-
2016.- 14 aprel.- S.6.