“Azərbaycan multikulturalizminin ədəbi-bədii qaynaqları” təqdim olunub

Aprelin 15-də Milli Kitabxanada Mədəniyyət və Turizm Nazirliyi, Bakı Beynəlxalq Multikulturalizm Mərkəzi və Azərbaycan Milli Kitabxanasının birgə təşkilatçılığı ilə Multikulturalizm Mərkəzinin nəşr etdiyi “Azərbaycan multikulturalizminin ədəbi-bədii qaynaqları” kitabının təqdimat mərasimi keçirilib.

Tədbiri Milli Kitabxananın direktoru Kərim Tahirov açaraq Prezident İlham Əliyevin 2016-cı ili ölkəmizdə “Multikulturalizm ili” elan etdiyini xatırladaraq Azərbaycanın multikulturalizmin beşiyi olduğunu qeyd edib. O, uzun illərdən bəri ölkəmizdə tolerant həyat tərzinin mövcudluğundan, hər zaman azsaylı xalqlara, onların milli mənəvi dəyərlərinə, adətlərinə hörmətlə yanaşıldığından danışıb.

Mədəniyyət və turizm naziri Əbülfəs Qarayev respublikamızın müxtəlif azsaylı xalqların yaşadığı tolerant və multikultural məkan kimi tanındığını, bu sahədəki uğurların dünyada yüksək qiymətləndirildiyini, Azərbaycanın tarixən fərqli mədəniyyətlərin qovuşduğu, çoxsaylı xalqların dinc yanaşı yaşadıqları ölkə kimi multikulturalizm sahəsində böyük təcrübə əldə etdiyini önə çəkib. Nazir son illər ölkəmizdə bu mövzulu qlobal miqyaslı tədbirlərin keçirilməsini Azərbaycanın multikulturalizm sahəsində əldə etdiyi mühüm nailiyyətlərlə əlaqələndirdi.

Azərbaycan Respublikasının Millətlərarası, Multikulturalizm və Dini məsələlər üzrə Dövlət müşaviri, akademik Kamal Abdullayev elmi redaktoru olduğu kitab haqqında danışarkən bunun “Azərbaycan multikulturalizminin qaynaqları” seriyasından ilk nəşr olduğunu, bu seriyadan “Azərbaycan multikulturalizminin elmi-fəlsəfi və publisistik qaynaqları” və “Azərbaycan multikulturalizminin siyasi və hüquqi qaynaqları”nın yaxın gələcəkdə işıq üzü görəcəyini açıqlayıb. K.Abdullayev oxucuya təqdim olunan bu kitabda klassik şair və yazıçılarımızın tamam yeni bir rakusda göründüyünü, bu gün xalqımıza xas olan tolerantlığın, multikultural dəyərlərin əsrlər boyu əcdadlarımızın canında, qanında yaşadığını qeyd edib.

Ardahan Universitetinin rektoru Ramazan Korkmaz, nəşrin rəyçiləri - AMEA-nın Əlyazmalar İnstitutunun direktoru, akademik Teymur Kərimli, Bakı Beynəlxalq Multikulturalizm Mərkəzinin Analitik şöbəsinin müdiri Nəriman Qasımzadə, tərtibçi - AMEA-nın Nəsimi adına Dilçilik İnstitutunun direktoru, professor Möhsün Nağısoylu, AMEA-nın Folklor İnstitutunun direktoru, professor Muxtar İmanov bu kitabda Azərbaycan ədəbiyyatının 1920-ci ilə kimi yazıb-yaradan sənətkarlarının əsərlərində əksini tapan multikultural, tolerant dəyərlərin əks olunduğunu vurğulayıblar.

Tədbir iştirakçıları “Multikulturalizm Azərbaycanın həyat tərzidir” adlı geniş kitab sərgisi ilə tanış olublar.

525-ci qəzet.- 2016.- 16 aprel.- S.13