Azərbaycan sivilizasiyaları birgəyaşayışa dəvət edir

BMT SİVİLİZASİYALAR ALYANSININ VII QLOBAL FORUMU VASİTƏSİLƏ BÜTÜN DÜNYA MULTİKULTURALİZMİN AZƏRBAYCAN MODELİ İLƏ TANIŞ OLACAQ

Məlum olduğu kimi, aprelin 25-27-də Bakıda “İnkluziv cəmiyyətlərdə birgəyaşayış: çağırış və məqsəd” şüarı altında BMT-nin Sivilizasiyalar Alyansının Vll Qlobal Forumu keçiriləcək.

Bu Forum sivilizasiyalararası dialoqun möhkəmləndirilməsi, xalqlar və dövlətlər arasında dostluq, əməkdaşlıq və davamlı inkişafın təşviqi, milli, dini və irqi ayrı-seçkiliyin, dünyada sülh və təhlükəsizliyi təhdid edən neqativ halların aradan qaldırılması, habelə ümumbəşəri əhəmiyyət kəsb edən aktual məsələlərin müzakirə olunduğu, mühüm problemlərin həllinə dəstək məqsədi daşıyan qlobal platformadır. Azərbaycan da bu imkandan istifadə edərək Forum vasitəsilə bütün bəşəriyyəti multikulturalizmin Azərbaycan modeli ilə tanış edəcək, dünyanı öz ağuşuna alan münaqişələrə, terror hədələrinə bir daha dur deyəcək, sivilizasiyaları birgəyaşayışa dəvət edəcək.

Forumun Azərbaycanda keçirilməsilə bağlı qərar 2014-cü il sentyabrın 26-da Nyu-Yorkda Birləşmiş Millətlər Təşkilatı Baş Assambleyasının 69-cu sessiyası çərçivəsində BMT-nin Sivilizasiyalar Alyansı Dostlar Qrupunun Nazirlər Toplantısında qəbul edib. Bu qərarın qəbul edilməsi dünyanın ən nüfuzlu ali qurumunun, dünya ölkələrinin Azərbaycana olan hörmətinin, etimadının, ölkəmizin dünya siyasətində, beynəlxalq münasibətlər sistemində yerinə və roluna, habelə multikultural dəyərlərin təşviqi və sivilizasiyalararası, mədəniyyətlərarası dialoqun inkişafına töhfələrinə verilən qiymətin real ifadəsidir.

Prezident İlham Əliyev IV Qlobal Bakı Forumunun açılışında çıxışı zamanı ölkəmizdə keçirilən növbəti mötəbər tədbirlə bağlı məlumat verərək qeyd edib ki, multikulturalizm Azərbaycanda dövlət siyasətidir: “Bu il Azərbaycanda multikulturalizm ilidir. Dövlət siyasəti və cəmiyyətin yanaşması bu sahədə fərqlənmir”.

Ölkə rəhbəri diqqəti dünyada baş verən mənfi proseslərə çəkərək bildirib ki, media təmsilçiləri də məsuliyyətli olmalı, bu məsələlərə xüsusi həssaslıqla yanaşmalıdırlar: “Ancaq şahidi oluruq ki, xəbərlərdə əsasən toqquşma, qaçqınlar böhranı barədə reportajlar verilir. Bu, bizi təcrid olunmağa aparır. Biz hamımız bir-birimizə bağlıyıq. Avropa və Orta Şərq arasında məsafə çox olsa da, insanların ailəsi üçün sığınacaq tapmaq cəhdlərini dayandıra bilməzsiniz. Heç bir ölkə təcrid olunmuş halda yaşaya bilməz, hamımız bir-birimizə bağlıyıq. Biz bununla fəxr etməliyik”.

Gəncədə İmamzadə Kompleksinin açılışının həyata keçirildiyini xatırladan dövlət başçısı qeyd edib ki, açılışda müxtəlif dini icmaların nümayəndələri çıxış ediblər: “Bu, ölkəmizdə işlərin necə aparıldığını göstərir. Bu, bizim dünyaya mesajımız idi. Azərbaycanın ən böyük məscidində ilk dəfə şiə və sünnilər birgə ibadət etdilər. Bütün bunlar bizim ən böyük zənginliyimizdir. Bu konsensus olmasa, daha böyük uğurlar əldə edə bilməyəcəyik. Multikulturalizmi təşviq edərək daha böyük uğurlar qazanacağıq”.

Forumun ölkəmizdə keçirilməsi ilə bağlı Təşkilat Komitəsinin yaradılması barədə Prezident İlham Əliyev 2015-ci ilin 24 iyul tarixində sərəncam imzalayıb və Təşkilat Komitəsinin sədri mədəniyyət və turizm naziri Əbülfəs Qarayev təyin edilib.

Nazir mətbuata açıqlamasında mötəbər tədbirin əhəmiyyətindən danışaraq bildirib ki, forumda yüksək səviyyəli dövlət nümayəndələrinin iştirakı nəzərdə tutulur.

Ə.Qarayev deyib ki, Forum çərçivəsində beynəlxalq ekspertlər tərəfindən xüsusi kitab hazırlanacaq və nəşrdə Forum haqqında dünyanın tanınmış xadimlərinin fikir və rəyləri yer alacaq.

Bu məqsədlə 2015-ci il avqustun 27-də keçirilən Təşkilat Komitəsinin birinci iclasında tədbirə hazırlıqla bağlı dövlət qurumlarının vəzifələri müzakirə edilib.

Forumda ekstremizm və terrora qarşı mübarizə, qlobal miqrasiya, qlobal vətəndaşlıq, nifrət nitqinin yayılmaması, təhsil, din, idman və gənclərin rolu, Bakı prosesi, inkluziv cəmiyyətlərin qurulması, multikulturalizm və digər məsələlərin müzakirəsi nəzərdə tutulub.

2015-ci il sentyabrın 8 - 12-si tarixlərində BMT-nin Sivilizasiyalar Alyansının nümayəndə heyəti ölkəmizdə səfərdə olub. Nümayəndə heyəti ilə keçirilən görüşdə Foruma hazırlıqla bağlı təşkilati məsələlər, o cümlədən, Forumun sessiyaları, iştirakçıların tərkibi, dövlət və hökumət başçıları, nazirlərin dəvət olunması, gənclər təşkilatlarının Foruma qatılması, tədbirin TV və internet vasitəsilə yayımlanması, Azərbaycanla BMT Sivilizasiyalar Alyansı arasında əməkdaşlıq məsələləri müzakirə olunub. Səfər çərçivəsində nümayəndə heyəti Prezident Administrasiyası, Xarici İşlər Nazirliyi, Gənclər və İdman Nazirliyi, Rabitə və Yüksək Texnologiyalar Nazirliyi, Heydər Əliyev Mərkəzi və Bakı Konqres Mərkəzində görüşlər keçirib.

2015-ci il oktyabrın 1-də isə BMT Baş Assambleyası çərçivəsində keçirilmiş BMT Sivilizasiyalar Alyansının Nazirlər Şurasının iclasında BMT-nin baş katibi Pan Gi Mun və digər yüksək səviyyəli rəsmilərin iştirakı ilə forumun və ölkəmizin təqdimatı keçirilib.

İclasda həm BMT rəhbərliyi, həm də üzv ölkələrin rəsmiləri tərəfindən tədbirə ev sahibliyi edəcəyinə görə, Azərbaycan hökumətinə təşəkkür edilib.

2015-ci il oktyabrın 24-də Böyük Britaniyanın London şəhərində BMT Sivilizasiyalar Alyansı üzrə ali nümayəndə Nassir Əbdüləziz əl-Nasser ilə görüş keçirilib. Görüş çərçivəsində “Azərbaycan Respublikası Hökuməti ilə Birləşmiş Millətlər Təşkilatının Sivilizasiyalar Alyansı arasında 7-ci Qlobal Forumun 2016-cı il aprelin 25-27-də Bakı şəhərində keçirilməsinə dair Saziş” imzalanıb. Sözügedən saziş Prezident İlham Əliyevin 2015-ci il dekabrın 24-də imzaladığı sərəncamı ilə təsdiq edilib.

2016-cı il yanvarın 15-də BMT-nin Baş Qərargahında BMT Sivilizasiyalar Alyansı üzrə milli əlaqələndiricilərin “İnamın yaradılması: zorakı ekstremizmin qarşısının alınması istiqamətində əlaqələr” mövzusunda keçirilən toplantıda forumun rəsmi internet səhifəsinin, təşkilati məsələlərin vəziyyəti təqdim edilib və Azərbaycan haqqında film nümayiş etdirilib.

Forumun tədbirlər planının müzakirə edilməsi məqsədilə yanvarın 27-də Təşkilat Komitəsinin ikinci iclası keçirilib. İclasın yekunu olaraq BMT-nin Sivilizasiyalar Alyansının 7-ci Qlobal Forumunun keçirilməsinə dair Tədbirlər Planı hazırlanıb. Tədbirlər Planı 2016-cı il fevralın 18-də Prezident Administrasiyasının rəhbəri tərəfindən təsdiq edilərək aidiyyəti dövlət qurumlarına göndərilib.

BMT-nin Sivilizasiyalar Alyansının nümayəndə heyəti fevralın 21-27-də Bakıya səfərə gəlib. BMT Sivilizasiyalar Alyansı üzrə ali nümayəndəsinin kabinet rəhbəri və ali nümayəndənin sözçüsü Nihal Saadın rəhbərliyi ilə 13 nəfərlik nümayəndə heyəti bir həftə müddətində paytaxtımızda olub. Səfər çərçivəsində BMT nümayəndə heyəti forumun keçiriləcəyi məkanlar olan Bakı Konqres Mərkəzi və Heydər Əliyev Mərkəzinə baxış keçirib, forumun Təşkilat Komitəsinin iclasında iştirak edib.

Ölkəmizdə keçirilən mötəbər tədbirlərlə bağlı fikirlərini bildirən Dini Qurumlarla İş üzrə Dövlət Komitəsinin sədr müavini, Təşkilat Komitəsinin üzvü Gündüz İsmayılov qeyd edib ki, Azərbaycan dinlərarası dialoqun, tolerant və multikultural dəyərlərin beynəlxalq aləmdə təbliği və təşviqi istiqamətində ötən əsrin 90-cı illərindən etibarən ardıcıl uğurlu siyasət aparır: “Bu siyasəti zaman etibarı ilə iki dövrə bölmək olar: ötən əsrin 90-cı illərindən 2000-ci ilin əvvəllərinə qədər olan dövr və ondan sonrakı dövr. Azərbaycan birinci dövrdə beynəlxalq aləmdə dinlərarası dialoqun, tolerant və multikultural dəyərlərin təbliği və təşviqi istiqamətində gedən proseslərin aktiv iştirakçısı idi. İkinci mərhələdə isə bu prosesin aktiv iştirakçısından aktiv təşkilatçısına, hətta deyərdim ki, lokomotivinə çevrildi. Çünki birinci dövrdə bizim iqtisadi çətinliklərimiz var idi və beynəlxalq nüfuzumuz o qədər güclü deyildi. Amma sonrakı dövrdə iqtisadi potensialımız və beynəlxalq nüfuzumuz imkan verdi ki, biz bu prosesdə aktiv iştirakçıdan aktiv təşkilatçıya çevrilək”.

Təşkilat Komitəsinin üzvü bildirib ki, Qlobal Forumun Azərbaycanda keçirilməsi bu həqiqəti bir daha təsdiqləyir: “Forumun Bakıda keçirilməsi həm də onu göstərir ki, Azərbaycan bu sahədə əhəmiyyətli və nümunəvi ölkədir. Beynəlxalq ictimaiyyət də bu həqiqəti qəbul edir. Bu, həm də

Azərbaycan təcrübəsinin beynəlxalq aləmdə yayılması və beynəlxalq nüfuzumuzun güclənməsi baxımından önəmlidir. Təşkilat Komitəsinin üzvü kimi əminliklə deyə bilərəm ki, Forum yüksək səviyyədə təşkil olunacaq”.

Mədəniyyət və Turizm Nazirliyinin Beynəlxalq Əməkdaşlıq Şöbəsinin müdiri, Təşkilat Komitəsinin katibi Vasif Eyvazzadə isə qeyd edib ki, cari ilin “Multikulturalizm İli” elan olunmasının əsas səbəbi bu il ölkəmizdə Qlobal Forumun keçirilməsidir: “Yəni, Forumun “Multikulturalizm İli”nin ən böyük tədbiri olacağı aydındır. Multikulturalizm deyəndə çoxmədəniyyətlilik başa düşülür. Mədəniyyətlərarası əlaqələr isə interkulturalizmdir ki, bu da Qlobal Forumun əsas hədəflərindəndir”.

V.Eyvazzadə qeyd edib ki, forumun proqramında əksini tapan mövzular bilavasitə bu ilin prioritetləri ilə üst-üstə düşür: “Burada həm müxtəlif mədəniyyətlər, dinlər arasında dialoq məsələləri, eksterizmə, terrorizmə qarşı mübarizə, gənclərin, qadınların dialoqda rolu, multikulturalizm mədəniyyəti və multikulturalizmin Azərbaycan modeli, prezident İlham Əliyev tərəfindən irəli sürülən “Bakı Prosesi” təşəbbüsü, həm də miqrasiyanın müasir multikultural proseslərdə rolu və digər istiqamətlərdə müzakirələr təşkil olunacaq. “İnklüziv cəmiyyətlərdə birgə yaşam: çağırış və məqsəd” devizi altında baş tutacaq Forumda 190 ölkədən, 40-dan artıq beynəlxalq qurumdan 2000-dən artıq nüfuzlu qonağın iştirak edəcəyi tədbirdə siyasətçilər, dövlət və hökumət başçıları, diplomatlar, nüfuzlu şəxslər, elm adamları iştirak edəcək. Hazırda dövlət başçılarından kimlərin tədbirdə iştirak edəcəyini açıqlaya bilmirik, amma ictimaiyyətə artıq məlum olan bir neçə fakt var. Türkiyə və Makedoniya prezidentləri, müxtəlif ölkələrin xarici işlər və ya baş nazirləri, baş nazirlərin müavinləri iştirak edəcəklərini artıq təsdiqləyiblər.

Nazirlik rəsmisi Forumun Azərbaycanda keçirilməsinin səbəblərinə də diqqət etməyin vacibliyini nəzərə çatdırıb: “Bakı Prosesi” təşəbbüsü 2008-ci ildə irəli sürülüb. Sözügedən proses çərçivəsində ilk dəfə Avropa və İslam ölkələri mədəniyyət nazirlərinin toplantısı baş tutub. Daha sonra İslam Konfransına Avropa ölkələri dəvət olunub, I Ümumdünya Mədəniyyətlərarası Dialoq Forumu keçirilib. Bu forum 2010-cu ildə BMT Baş Assambleyasında İlham Əliyev tərəfindən elan edilib. 2013 və 2015-ci illərdə isə növbəti forumlar gerçəkləşib. Yəni, bu beynəlxalq tədbir artıq 3 dəfə Bakıda keçirilib və tərəfdaşlardan biri BMT Sivilizasiyalar Alyansı olub. Bu da ölkəmizlə BMT arasında əməkdaşlığın möhkəmlənməsinə xidmət edir. Hazırlıq prosesi artıq 6 aydır başlayıb. Aprelin 25-i Forumun ilk günüdür, 26-sı rəsmi açılışdır, 27-si və 28-i isə tədbir günləridir. Hazırlıq Forum bitənədək davam edəcək. Sonra isə o nəticələrdən yola çıxaraq işimizi quracağıq”.

Vilayət Eyvazzadə Forumun ölkəmizin mədəniyyətlərarası dialoq mərkəzi kimi müxtəlif beynəlxalq qurumlarda və ölkələrdə daha çox tanınmasına böyük töhfə verəcəyini də bildirib.

Ceyhun ABASOV

525-ci qəzet.- 2016.- 23 aprel.- S.6