"Səməd Vurğun xatirələrdə" təqdim olundu

Ötən gün Səməd Vurğunun Ev Muzeyində "Səməd Vurğun xatirələrdə" kitabının təqdimatı və şairin 110 illiyinə həsr olunan elmi konfrans keçirilib.

Tədbiri muzeyin direktoru Nüşabə Vəkilova açaraq şairin yubileyi münasibətilə təşkil edilən silsilə tədbirlərdən söz açıb: "Bu münasibətlə həm ölkəmizdə, həm də xaricdə bir sıra tədbirlər keçirildi.

Azərbaycan Dram Teatrında da, TÜRKSOY-un təşkilatçılığı ilə Türkiyənin bir sıra mərkəzlərində də şairin xatirəsi yad edildi. Ankarada ikən Milli Kitabxanada və TÜRKSOY-un mərkəzində görüşlərimiz oldu. Bugünki görüşümüz isə həmin tədbirlərin davamıdır". N. Vəkilova şairlə bağlı xatirələr toplusu barədə deyib ki, kitabın gənclər arasında yayılması və təbliği vacibdir: "Hər bir şəxsə onun yaşadığı tarixi reallıqdan yanaşmalıyıq. Bunu gənclərə izah etmək, yanlış təsəvvürləri aradan qaldırmaq lazımdır".

Filologiya üzrə fəlsəfə doktoru Aslan Salmansoy kitabın ərsəyə gəlməsindən, istifadə olunan mənbələrdən danışıb: "Səməd Vurğun haqqında çoxlu miflər uydurulan, barəsində ən çox xatirə yazılan sənətkarlardan biridir. Ancaq yaranan miflərin hər biri müəyyən gerçəkliyə söykənir. Kitabdakılar isə şairin yaxınları və tanınmış qələm adamlarının xatirələridir".

Şair Oqtay Rza S. Vurğun poeziyası barədə fikirlərini bölüşüb: "Onun şeiriyyətində axıcılıq, oynaqlıq, musiqililik, dərinlik və fəlsəfilik var. Səməd Vurğun poeziyasının cazibədarlığı, füsunkarlığı da elə bunlardadır".

Şairin yaradıcılığından söhbət açan professor Məmməd Əliyev qeyd edib ki, böyük bir ədəbi məktəb yaradan Səməd Vurğun XX əsr Azərbaycan poeziyasının ən böyük nümayəndələrindən biridir.

Tədbirdə ədəbiyyat və mətbuat nümayəndəri iştirak ediblər. Çıxışçılar şairin həyatı və ədəbi fəaliyyətindən bəhs ediblər.

Qeyd edək ki, Səməd Vurğun haqda xatirələr toplusunu nəşrə A.Salmansoy hazırlayıb. Kitab "Xan" nəşriyyatının "Xatirə ədəbiyyatı" silsiləsində çap olunub.

MÜŞFİQ

525-ci qəzet.- 2016.- 8 dekabr.- S.7.