Mədəniyyət və İncəsənət Universitetində Ramiz Rövşən günü

Dekabrın 14-də Azərbaycan Dövlət Mədəniyyət və İncəsənət Universitetində (ADMİU) tanınmış şair Ramiz Rövşənin 70 illik yubileyi ilə bağlı tədbir keçirilib.

Tədbiri giriş sözü ilə ADMİU-nun beynəlxalq əlaqələr və tərbiyə işləri üzrə prorektoru, filologiya elmləri doktoru, professor Gülşən Əliyeva-Kəngərli açıb.

İştirakçıları salamladıqdan sonra şairə təşəkkür edən çıxışçı R.Rövşənlə bağlı xatirələrini bölüşüb.

Şairin həyatı, yaradıcılığı, ədəbiyyata və poeziyaya münasibəti barədə danışıb.

Bildirib ki, Ramiz Rövşən ədəbiyyata yön verən imzalardandır. Usta qələmilə oxucuların qəlbinə yol tapan ədib istər poeziya, istər nəsir, istərsə də kinematoqrafiyada özünəməxsusluğu ilə seçilir.

Daha sonra söz alan universitetin "Ədəbiyyat və dillər" kafedrasının professoru, filologiya elmləri doktoru Nizaməddin Şəmsizadə də həmkarının sözlərinə qüvvət verib.

Qeyd edib ki, Ramiz Rövşən yaradıcılığı öz çoxistiqamətliliyi ilə fərqlənir. Yaradıcılığında bir çox "izm"lərdən faydalanan şair eyni zamanda heç bir "izm"ə köklənmir. Ramiz Rövşənin əksər şairlər kimi eksperiment keçmədiyini dilə gətirən N.Şəmsizadə ədəbiyyatında Nizamisi, Füzulisi olan ölkənin şairi olmağın çətinliyini diqqətə çatdırıb.

Dəvətə görə minnətdarlığını bildirən R.Rövşən bildirib ki, ADMİU ona çox doğmadır. Bu universitetlə onu kifayət qədər xatirələr bağlayır.

O, dünyada və ölkədə baş verən hazırkı proseslər zəminində ədəbiyyatın bir qədər kölgədə qaldığını qeyd edib.

Əlavə edib ki, buna rəğmən həmişə sevildiyini, oxucularının kifayət qədər olduğunu, hətta gündən-günə artdığını görmək xoşdur.

Şair vurğulayıb ki, şeirlərini heç vaxt oxucu üçün yazmır. Amma oxucuların verdiyi qiymətə də biganə qalmır.

Ədibin fikrincə, ən böyük qiyməti zaman və oxucular verir. Qeyd edib ki, şair əslində cavab yox, sualdır:

"70 illik ömrümdə yazdığım heç bir şeir istədiyim kimi alınmayıb. Həmişə düşündüyümdən daha zəif olub".

Tədbir universitetinin bədii qiraət ustalarının, tələbələrin çıxışları ilə davam edib.

Sonda şair sualları cavablandırıb, şeirlərini səsləndirib.

Cavid QƏDİR

525-ci qəzet.- 2016.- 15 dekabr.- S.7.