Halın içindəki hal

Türkiyəli şair, İLESAM-ın başqanı Mehmet Nuri Parmaksızın “Həsrət, eşq və sükut” kitabı “aybkitab” layihəsi üzrə nəşr olunub.

Kitabı Türkiyə türkcəsindən Azərbaycan dilinə gənc yazar Gülnar Səma çevirib, redaktoru şair Ələmdar Cabbarlıdır.

Kitabda yer alan esselərdən nümunələri oxucularımıza təqdim edirik.

Halın içində gizlənən halın və sənin mübtəlan oldum.

Sürur Çiçəyim, Məhşərim, Hər şeyim...

Çöldə əsən küləyin qoxusunu qalu-bəladan alan; elə bir sərxoşam ki eşqinlə illərdir tam yuxuya keçə bilmədi gözlərim; səninlə həmdəm olan könlüm əllərini, barmaqlarını, alnını, ovuc içlərini, üzünü, gözünü, xülasə, səni tanıdı tanıyandan özündə deyil Hüma quşum.

Rəbbimə şükrüm, Ona təslimiyyətim sonsuz; sənə eşqim o qədər böyük ki, dünya deyilən cahan eşqimin yağışlarıyla sulanmaqda və könlümdən düşən eşq toxumlarıyla səhralar, vadilər və bağçalar çiçək açmaqda. Meyvələr, ağaclar, bir sözlə bütün təbiət qoxusunu və dadını eşqimizdən almaqda.

Mübaliğə etmirəm, könlüm sənə səslənərkən səsi gözəl olan bütün quşlar, dənizlərdəki balıqlar və mərcanlar bu səslənişdəki səmimiyyəti və eşqin özündən gələn o gözəl bəstəni qısqanır.

Ruhum sənə hər xitabında eşqimi yenidən təzələyir və sükut deyilən o əfsun səssizliyinə, qısqanclıqdan və həsədindən bir az daha sükut qatıb, bilinməyən bir diyara gizlənir.

Məndəki hər şey sənə dair; lakin eşqini könlümə qoyan və böyütməyimə icazə verən Rəbbimi unutmağım mümkün deyil.

Harada olduğumu, nə söylədiyimi bilməsəm də; ağlım könlümə məğlub olsa da, Xüdaya şükrümü və Ona təvəkkül etməyi unutmaram, yar.

Halın içində halı yaşayarkən Rəbbimin izni ilə kəşf edilməmiş dünyaları kəşf edir; içimdəki eşq cücərtilərini oralara səpir və sənə olan eşqimi ölümsüz etməyə çalışıram.

Mövlanın yaratdığı hər cahan səni tanıyır, Sevgili. Mənimlə eşqə dair danışan hər kəsə özümdən asılı olmayan bir halda “məhşərinə sevdamdan” bəhs edirəm fərqində olmadan.

Səndən xəbərdar olan mələklər belə gözəlliyini qısqanır; bilirəm ki, hər məxluqat aşiq olan məni heyran-heyran izləyir; sənlə dolu olan ürəyimin atışları saatımın tik-takları yerinə keçir.

Gecənin zülməti sənin nurunla ziyasına qovuşur. Şəfəq sənin işığın olmasa, doğamayacaq. Günəş sən olmasan və eşqimiz olmasa, bütün sirrini və istiliyini itirəcək sanki.

Təvazökarlıq səndə bir tac, Sevgili. Əsl gözəl olan sənsən; mən yalnız bir aynayam sənin gözəlliklərini göstərmə şərəfinə çatan. Amma mən də gözəlliyimi eşqlə gördüm səndə.

Sən olmasan Şükür Çiçəyim, mən gözəlliyimi necə görəcəkdim. Hansı güzgü mənə məni sənin kimi göstərdi ki, bu günə qədər.

Mən məni səndə itirdim, amma mən məni səndə, mən bütün gözəllikləri sənin üzündə, dilində, əlində tapmadımmı?

Ovuclarından içdiyim xoşbəxtlik və dinclik Rəbbimin bir lütfü, amma onlar sənə aid olduğu üçün qiymətli.

Barmaqlarından daddığım şükür şərbəti başqa hansı çeşmədə var ki? Xəyalına belə daldığımda dünyanı qucaqlayan könlüm elə bir pəhləvana çevrilir ki, nəfs deyilən və hər cür oyunu bilən hiyləgər rəqibimi hər dəfəsində dəqiq hədəfə alır; əvvəl Rəbbimdən, sonra səndən aldığım o güc deyilmi?

Dünyada eşqinlə nəfəs almaq və bu eşqlə məhşərə getmək bir nemət. İnanıram ki, Rəbbim eşqimizi hər dəm qoruyacaq və əbədi eyləyəcək. Ona şükrüm sonsuzdur və təslimiyyətim hər keçən gün artır.

Bilirəm ki, könlüm sənə hər nəfəsdə yenidən və təzələnərək daha da çox aşiq olur.

Səni sevdiyim gerçəyini həm dünyaya, həm də əbədiyyətə qışqıracağım günü səbirlə, təvəkküllə və imanla; içimdə davamlı böyüyən dinclik və xoşbəxtliyin mənə verdiyi məhşəri həvəslə gözləyirəm.

Ey sevgili! Halın içində gizlənən halın və sənin mübtəlan oldum.

Bu halın məhşərə qədər davam etməsini Rəbbimdən hər nəfəsdə diləyirəm. Mən səninlə oldum; mən səninlə doldum yar.

Gülüstana varınca şad olur kələbəklər,

Rəbbinə sığınınca huzur bulur ürəklər.

Dünyada gülmək də var; ağlamaq da, sevgili

İncinən qəlblər isə təmir olmağı bəklər.

Mehmet Nuri PARMAKSIZ

525-ci qəzet.- 2016.- 17 dekabr.- S.19.