SƏNİ AXTARIRAM

1986-cı ildə Naxçıvan Muxtar Respublikasının Culfa rayonunun Dizə kəndində anadan olub.

''Şair olmaq istəyirəm'', ''Vətən Birincidir'', “Toxunmayın təkliyimə”, “Cənnətindən qovulan qadın” kitablarının müəllifidir.

Azərbaycan Yazıçılar və Jurnalistlər birliklərinin üzvüdür.

Səni axtarıram,

Hər gülüşdə, hər baxışda.

Küçələrdə ayaqların,

Addım-addım iz saldığı

Hər naxışda.

İzlərini axtarıram.

Kirpik altdan boylanıram baxışlara,

Gözlərini axtarıram.

Sən sevilən, mən sevənin,

İnsan oğlu bitirməyib bu dastanı,

Sevgi adlı bir yalanı.

Böyük eşqlər tək tərəfli,

Sevgilərin körpəsidir.

Bu sevgidə cüt olmadıq,

Təkimizi axtarıram.

Axtarıram bu şəhərdə,

Sənin üçün sən olanda

Mən olmayan küçələri.

Axtarıram günəşimi

Dəfn etdiyin gecələri,

Qarışmısan bu şəhərin

Havasına, suyunamı?

Ovuc qədər bu şəhərdə,

Sən sabahsan, mən gecəyəm.

Qovuşmayır yollarımız,

Sən ötmürsən heç yanımdan.

Bircə köhnə tanış kimi,

Təsadüfən qarşıma da çıxmırsan.

Bir baxışlıq nəfəsim var,

Ürəyimdə gizləmişəm,

Ürəyimi sıxmırsan.

Gizlədibdir şəhər səni,

Bircə məndən gizlədibdir.

Tanış olan bu şəhərə yad kimiyəm.

Bu şəhərdən gizli səni,

İnan, səndən gizli səni,

Axtarıram, axtarıram, axtarıram...

TƏLƏSƏRKƏN YUBANMIŞIQ

Bir zaman ürəyimdəki alovdun,

Əlimin içini yandıran qırovdun.

mənim üçün.

İndi isə sovurursan

sənin üçün

yanıb sönmüş bir ürəyin közünü, külünü.

Nə oldu bizə?

Nə oldu, gözlərdən gözlədiyimiz

Hər kəsdən gizlədiyimiz

sevgimizə?!

Baxış-baxış aralandıq,

Söz-söz yaralandıq.

Yarıldıq,

Yarılandıq.

Sazağına düşdük xəyanətin,

Kül elədik

ürəklərin alovlanmış məhəbbətin.

Deyilməmiş sevgi sözləriydi

Əslindəsə ayrılıqlar.

Sarılmamış üstü açıq yaralardı

Aradakı yalnızlıqlar.

Salondakı çığrışmalar,

Yataqdakı susqunluqlar.

Sən yad oldun,

mən yabancı,

Yaşanmışlar yalan olmuş,

biz yalançı.

İçimizdə sevgimizə

Ölüm doğan acı sancı.

Azalırıq hər sancıda.

Kəlmə-kəlmə azalırıq,

Baxış-baxış azalırıq,

Tələsərkən yubanmışıq bu sevgiyə.

Gedən getmiş,

Bitən bitmiş,

Bizsə hələ boylanırıq

Bizi çoxdan qabaqlamış

Bir keçmişə, bir geriyə.

SEVGİM QƏDƏR GÜNAHIMSAN

Sevgim qədər günahımsan,

Səni sevmək cinayətdi.

Cinayət işlədim mən...

Güllələdim mənliyimi

Gözlərinlə.

Sözlərinin hökmüylə mən.

Dustaq oldum kimliyində.

Səni sevmək cinayətdi.

Sənli bir an

Bir ömrün sinonimi.

Səni sevdim,

Bilə-bilə bu sevginin

Başdan-sona cəhənnəmlik

Günah qədər olduğunu.

Gözlərinə hər baxanda

İradəmin intiharlar

Qoxuduğunu.

Səni sevdim...

Duya-duya varlığında

Hiss etdiyim yoxluğunu.

Sevgim qədər günahımsan...

Bir öpüşlük səadətimtək

Məsum günah!

Hər nəfəsdə ürəyimi kül eləyən

Yanğılı ah...

Əllərində ölən məndim,

Bu sevgidə sevən məndim.

Gələn məndim,

Gedən məndim.

Baxışınla vur qəlbimdən,

Bu sevgiylə

Ölümlərə layiqəm mən.

Gülsadə İBRAHİMLİ

525-ci qəzet.- 2016.- 6 fevral.- S.22