Şeirimizin Nərimanı
XALQ ŞAİRİNİN 85 İLLİYİNƏ
Nəriman
Həsənzadə gözəl insandır! Onu
85 yaşında da ruhən cavan saxlayan elə bu
insanlığıdır. Bu insani
xüsusiyyətlər onun şeirlərində də öz əksini
tapır.
Nəriman Həsənzadə şeirlərinə,
şeirləri də ona oxşayır. Mən onun
üzündə həmişə xoş bir təbəssüm
görmüşəm. Vallah, inanmağım gəlmir
ki, Nəriman Həsənzadə kiminsə
paxıllığını çəkə, kiməsə
badalaq vura, öz şəxsi mənafeyi və istəkləri
üçün məkrli yollardan keçib istəyinə
nail ola. Təbii ki, onun da bu dünyada
xoşlamadığı insanlar, xasiyyətlər, hadisələr
ola bilər, lap elə dostları olduğu
kimi, düşmənləri də ola bilər, amma yenə
inanmağım gəlmir ki, kimsə Nəriman Həsənzadəni
özünə əbədi düşmən hesab eləsin.
Şeir
yazdığım gün məğrur oluram,
İlham
ki, xəfifcə sinəmə dolur;
Bir
şeh damlasıtək büllur oluram,
Dünya dünyada yox, məndə əks olur.
Nəriman Həsənzadə mənim fikrimcə,
müasir Azərbaycanın ən xoşbəxt şairlərindəndir. O,
yaradıcılığının "məşq"
dövrünü - əllinci illəri arxada qoyandan sonra,
altmışıncı illərdə artıq istedadlı bir
şair kimi ədəbi aləmdə etiraf edildi. Nəriman Həsənzadə ömrü boyu onu
duyan, sevən insanların əhatəsində olub. Belə insanlardan biri də Azərbaycanın görkəmli
yazıçısı və ədəbiyyatşünası
Mir Cəlal Paşayev olub. Mir Cəlal müəllim Nərimanın
"Könlüm şeir istəyir" kitabına
yazdığı ön sözdə öz ürək sözlərini
belə ifadə etmişdi:
"Nəriman olduqca həssas bir şairdir. O, bir qartalın
uçuşunda, bir lalənin duruşunda, bir körpənin
baxışında bütün kainatı, ictimai aləmi və
məna dolu həyatımızı görmək istəyir.
Nərimanın şeirləri danışıq dilinə
yaxın, sadə, səlis üslubu ilə də seçilir. Adama elə gəlir
ki, bunlar yazılmır, söylənir. Kitabdan,
rəsmiyyətdən uzaq, ürəkdən gələn
şirin, maraqlı bir söhbətdir. Əlbət
ki, bu yalnız şeirlərin şəkli xüsusiyyəti ilə
yox, həm də məzmunu ilə bağlıdır. Nəriman
oxucusunu çoxdanın dostu, tanışı və ürək
sirdaşı kimi
dindirir".
Mir Cəlal
müəllimin bu mülahizələrinin söylənildiyi
vaxtdan az qala əlli beş il keçir. Amma elə bil indi deyilib.
Və qeyd edim ki, istər müasirləri olan görkəmli
tənqidçi və ədəbiyyatşünaslar, istər
qələm dostları, istərsə də sonrakı ədəbi
nəsillərin nümayəndələri Nəriman Həsənzadə
yaradıcılığını çox yüksək qiymətləndiriblər.
Böyük
ədibimiz Mirzə İbrahimov yazırdı: "Nərimanın
şeirlərini oxuduqca biz belə qənaətə gəlirik
ki, sənət əsəri, xüsusən lirik şeir o zaman
adamı əfsunlayır ki, həyat, təbiət və
insanlar haqqında, onların bitməz-tükənməz
işığı, qaranlığı, gözəlliyi, eybəcərliyi,
sevinc və faciələri barədə oxucuya nə isə
yeni bir şey deyir, onu bu vaxta qədər bilmədiyi,
duymadığı, xəyalına da gətirmədiyi qəribə
hisslərlə, duyğularla tanış edir, dərin fəlsəfi
mənalar və füsunkar gözəlliklər aləminə
aparır, fikrini, düşüncəsini bu aləmin sirlərini
dərk etməyə yönəldir". N.Həsənzadə
bu mənada ədəbi tənqidin sevə-sevə müraciət
etdiyi, üz tutduğu ədəbi şəxsiyyətlərdən
biridir.Şəxsən mən də bir tənqidçi kimi
onun poeziyasından bir neçə məqalə
yazmışam, çalışmışam ki, şairin
ruhunu tuta bilim.
Gəlin,
bir anlığa təsəvvür edək ki, bizim son
altmış beş illik poeziya, dramaturgiya
və publisistikamızda Nəriman Həsənzadə adlı
bir müəllifimiz yetişməyəydi. Onda bu altmış beş illik ədəbi
prosesimizdə böyük bir boşluq, bir çat
yaranmış olardı. Lirikamızda Nəriman
Həsənzadə zərifliyi, incəliyi, epik poeziyamızda
Nəriman Həsənzadə dəst-xətti görünməzdi.
Şeirimizdə elə nümunələr var
ki, onları məhz Nəriman Həsənzadə yaradıb,
onlarsız poeziyamızı təsəvvürə gətirmək
qeyri-mümkün olardı. Oxucularla açıq və
səmimi danışmaq ədası, onların ürəyinə,
hiss və duyğularına yol tapmaq bacarığı, təbiilik
və səmimiyyət... bütün bunlar Nəriman Həsənzadə
poeziyasını elə ilk baxışda təyin edən
xüsusiyyətlərdir. Nə yaxşı,
şeirimizin Nərimanı var,-deyirik.
"Şeir mənim aləmimdə bütöv bir
kainatdır, müxtəlif səslərilə, rənglərilə
birlikdə təbiətin özüdür, əslidir, surəti
deyil. O da
canlı orqanizmdir, təbiət qədər doğma və
amansızdır. Mən indiyə qədər nə
çəkmişəmsə, şeirdən çəkmişəm.
Onun ağırlığı altında təntimişəm,
amma həmişə bu, mənə fərəh verib. Ağrılardan doğan sevincim olub. Mən bu əzabı həyatda bəlkə də
heç bir əyləncəyə dəyişmərəm.
Axı, bir də bu məndən asılı
olan şey deyil. Mənim səadətim də
bundadır".
Bu, Nəriman Həsənzadənin şairlik kredosudur. O, bütün
yaradıcılığı boyu bu amala daim sadiq qalıb,
şeirdən, poeziyadan, öz təmiz hiss və
duyğularından heç vaxt üz döndərməyib.
Mən Nəriman
müəllimin poetik yaradıcılığını
xarakterizə etsəm, bircə sözün üzərində
dayanaram: SEVGİ...Bu sevgin mənbəyi Anadan başlanır,
sonra həyatı yarıda qırılmış bir gözəl
qadına məhəbbətlə davam edir, get-gedə bu
sevginin sərhədləri böyüyür, bir ürəyə
sığmır, böyük Azərbaycan sevgisinə
çevrilir. ANA, SEVGİLİ, VƏTƏN məhəbbəti DÜNYAYA, KAİNATA sevgiylə
qovuşur.
Budur,
şair anasının məzarını ziyarətə gəlib:
Bu
gülün rəngində vardı bir donun,
Həyatı sevirdin, axı sən, ana.
Nə
deyim, bəlkə də geyinib onu
Təzədən dünyaya gəlmisən ana.
Bu şeiri Azərbaycan poeziyasında ana haqqında
yazılmış ən gözəl nümunələrdən
biri hesab edirəm. Ana məzarı, üstündə bitən
bir gül. Nə qədər uğurlu bir
bənzətmədir.
Səksəninci illərin sonlarında Nəriman müəllimin
həyat yoldaşı -Sara xanım dünyasını dəyişdi. Cavan Nəriman
vaxtilə gələcək həyat yoldaşına gözəl
sevgi şeirləri həsr eləmişdi, bu şeirlər
hicran qəmindən, kədərindən uzaq şeirlərdi.
Amma Sara xanım vaxtsız getdi dünyadan və
Nəriman müəllimin sevgi şeirlərinin də ahəngi
dəyişdi. Qəm, kədər öz
yerində, amma bu sevgi şeirlərinə doğrudan da bir
hicran, əbədi ayrılıq duyğuları yol tapdı.
İnsan ən əziz adamını itirəndə
ya başına hava gəlir, ya da filosofa çevrilir. Ailə-qadın-cəmiyyət problemi, tənhalıq,
təkliyin gətirdiyi faciə...bütün bunlar onun bir
çox şeirlərinin leytmotivinə çevrildi.
Mən
kimin yanına qayıdım evə,
bir
eyvan, dörd divar, çoxlu daş qalıb.
Sənlə
dolu idi boş evim əvvəl,
indi dolu
evim sənsiz boş qalıb.
Dünyada
ən böyük itki qadındı,
gördüm anamda da, qadınımda da.
Evin yiyəsiydin,
indisə torpaq,
sənsən sağ canımda ağrıyan yerim.
Çöldə
qalmaq olmur, evdə yaşamaq,
nə
gedən yerim var, nə qalan yerim.
Evdən,
ailədən başlanır Vətən,
qadından başlayır.
Qadınsız
kişiyə ər deyən olmaz,
Qadındır kişinin ər ləyaqəti.
Qadınsız
çətindi həyatı sevmək
sevgisiz
həyat da bir həyat deyil.
Nəriman
Həsənzadə yaradıcılığından söz
açan müəlliflərin bir çoxu onun vətənpərvərlik
ruhu aşılayan şeir və poemalarına çox az
müraciət ediblər. Halbuki, onun bu
mövzuda elə əsərləri var ki, indinin özündə
də aktuallığını itirməyib. Onun "Zümrüd quşu" və "Nəriman"
poemaları tarixi yaddaşımızın poeziyada əksi kimi
çox təsirli əsərlərdir. Ümumiyyətlə,
tarix N.Həsənzadənin yaradıcılığından
qırmızı bir xətt kimi keçir. Bu xəttin
bir ucu XX əsr Azərbaycan həqiqətləri, bir ucu Cənub
həsrəti, bir ucu Nizamidən üzü bəri bizim
böyük sənətkarların faciəli taleləri, bir
ucu da dünyanın indisindən antik dövrünə qədər
keçdiyi yoldur.O, həmişə poeziyasında qəhrəmanlığı
vəsf edib - Nuru Paşadan poema yazıb, Qaçaq Kərəmi
tərənnüm edib. Həmkarım Nizami Cəfərovun bu
fikriylə tam şərikəm ki: "Nəriman Həsənzadənin
bütün yaradıcılığının baş qəhrəmanı
Tarixdir".
N.Həsənzadə
bir şeirində ("Qız qalası") yazır ki, Azərbaycan
torpağında, ola bilməz dillər töksün, ya diz
çöksün ata qızı qabağında, Öz
qızına, balasına, doğma ciyərparasına "sevgilim ol", "arvadım
ol" desin ata". Odur ki, bu əfsanə
işğalçının söz yarasıdır, həqiqət
deyil. Ümumiyyətlə, xalqın etnogenezisi, adət-ənənələri,
milli xüsusiyyətləri, poeziyası və musiqisi, qəhrəmanlıq
tarixi, eyni zamanda, faciəli dönümləri ilə bağlı nə
varsa, şair onlara qarşı çox həssasdır. "Kərkük
yaylığı" şeirində Füzuli yada
düşür:
Taleyin
qürbətə düşüb güzarı,
ayrılıb yollarda duman, sis qalıb.
Burda bir
heykəl var-yoxdu məzarı,
orda bir
məzar var - heykəlsiz qalıb.
N.Həsənzadənin
yaradıcılığında tarixi şəxsiyyətlər
mövzusu ayrıca bir tədqiqat əsəri ola
bilər. Onun "Nəriman"
və "Zümrüd quşu" epik-dramatik
poemaları, "Nuru Paşa" poeması, "Atabəylər"
və "Pompeyin Qafqaza yürüşü" mənzum
pyesləri düşünülmüş bir bədii
konsepsiyanın reallaşmasıdır. "Nuru Paşa"
istisna olunmaqla adını çəkdiyimiz digər əsərlər
Sovet dövründə yazılmışdır.Olsun ki, "Nəriman"
poemasında o zamankı həqiqi tarixin unutdurulduğu
dövrün məhsulu olan Azərbaycan
tarixi kitablarından gələn müəyyən təsirlər
var, amma N.Həsənzadə böyük Nərimanın Azərbaycan
qarşısında xidmətlərinə heç bir kölgə
salmamışdır.
"Nuru Paşa" poemasına gəldikdə isə,
artıq bu əsərdə Şair Nəriman Həsənzadə
ilə Tarixçi-tədqiqatçı Nəriman Həsənzadə
birləşir. Əsərdə
Qafqaz İslam Ordusunun komandanı, Osmanlı
ordusunun general-leytenantı Nuru Paşanın Bakının azad
olunması uğrunda (1918) Gəncədən Bakıya qədər
keçirdiyi uğurlu döyüş əməliyyatından
söz açılır. Ancaq poemada Nuru
Paşanın bu tarixi missiyasının tərənnümü
ilə yanaşı, istiqlal və azadlıq düşüncələri
də öz əksini tapmışdır.
Nəriman Həsənzadə təzadlar şairidir. Həyatda, cəmiyyətdə,
böyük dünyamızda baş verən hər hansı
bir hadisə onun poeziyasında öz əksini tapır. Onun "Kimin sualı var?" adlı poemasında cəmiyyətdəki
haqsızlıqlar, bu haqsızlıqların rişələri,
kökləri araşdırılır. Poemada xoşbəxt
olmağa çalışan iki insanın faciəsindən
söz açılır, biri İlhamdır, biri
Ağgün. Bu iki gəncin bir
güclü rəqibləri var. Onun adı Ədalətsizlikdir
ki, Ədalət adı ilə onların qarşılarına
çıxır. Bəli, iki gözəl insanı həyatda
bədbəxtliyə düçar etmək üçün
bir adam da kifayət edərmiş. Bir adam!..Amma görün, o bir adam
necə arxalıdır, hər yerə şaxələnib. Bir
şaxəsi ali məktəbə, biri
nazirliyə, biri daha böyük yerə... Bu
şaxələr uzandıqca istedadın yolunu kəsir, qəlbini
yaralayır. Ağgün böyük sevgiyə
layiq ikən fəlakət izləyir onu, nüfuzlu bir institut
professorunun oğlu Ədalət onun saf və bakirə
duyğularına xəyanət edir. Onu
öz ailələrinə yaraşdırmayan professorun səyi
ilə Ağgün institutdan çıxarılır, hardasa
uşaq bağçasında işə düzəlir. İllər keçir... Ömrü tənhalıqda keçən
Ağgün səhvlərini bir-bir xatırlayır. Amma ömrün bu anları onu adi bir qızdan
düşünən insana çevirir. Özünü
dərk etməyə başlayır.
Ağgün
qız yatmışdı, gəlin oyandı,
Dünyada
təzədən doğuldu Agün,
Həyat
çox sərtdir, mürəkkəbdir və elə olur ki,
başdan-ayağa günah içində batanı da silkələyir,
onu ADAM OLMAĞA səfərbər
edir. Çünki təməli gözəlliklə
yoğrulan, yaxşılıq, xeyirxahlıq üstündə
qurulan bir həyatda həmişə günah içində
yaşamaq, kimlərəsə pislik edə-edə yaşamaq da
yaşamaq deyil... Poemada, bütün əsər
boyu yaxşılıq-xeyir-gözəllik şəri-pisliyi-rəzilliyi
mühakimə edir. Ən
çox da ittihamçı İlhamdır... O, hörmətli
professorunun səhvlərini üzünə deyir, onun elm aləmində
yüksəkdə dura-dura bir insan kimi
alçaldığını, mənən
cılızlaşdığını çəkinmədən
söyləyir. Öz kasıb, əlləri
qabarlı anası ilə Ədalətin anasını
müqayisə edir, məhəbbəti ucundan fəlakətə
yuvarlanan Ağgünün çox təmiz, pak bir qız
olduğunu söyləyir.
Nəhayət, Ədalətin özündə də mənəvi
bir tərpəniş başlanır. Başqa bir qızla evləndiyi
günün səhərisi hiss edir ki, can atdığı səadət
bu deyilmiş.
Bəzən
şairlərin yaradıcılığından söz
açanda "millət şairi", "istiqlal
şairi", "azadlıq şairi", "məhəbbət
şairi", "təbiət şairi" və s. bu qəbildən
olan ifadələr işlədirlər. Təbii
ki, belə bir bölgü və bu prinsip çox zaman
özünü doğrultmur. Nəriman Həsənzadəyə
gəldikdə, bütün bu ifadələri bir kənara qoyub O, ŞAİRDİR deyirik. Şair üçün təbiətin gözəlliklərindən
yazmaq, poetik boyalarla, sözün rəngləriylə tablolar
çəkmək, yaxud Vətəninin, xalqının
azadlığı, müstəqilliyi barədə
düşüncələrini ifadə etmək, sevdiyi
xanımına şeirlər həsr etmək... bütün
bunlar onun missiyasına aiddir. Şair odur
ki, o, bizim düşündüyümüzü deyə bilir və
bununla da bizim üçün doğmalaşır.N.Həsənzadə
90-cı illərin o çətin, mürəkkəb,
sarsıntılı günlərində bir çox şeirlər
yazdı, sanki ürəyimizdən keçənləri
poeziyanın etiraz nidalarına çevirdi. Şair 90-cı illərin əvvəllərində
İranda oldu, "Cənub həsrəti" silsiləsi də
bu zaman yarandı.
Keçdim
Culfadakı dəmir körpüdən,
orda fars
dayanıb, burda rus durur.
Qarşıda - ikiyə bölünmüş Vətən,
Ortada - bir Araz, bir namus durur.
Nəriman Həsənzadə dünyaya göz açdığı Poylu haqqında gözəl bir poema yazıb. Xatırlayıram ki, 2007-ci ilin dekabr ayında Nəriman Həsənzadə ilə birgə mən də onun doğulduğu həmin qəsəbəyə getdik. Həmyerliləri Nəriman müəllimi çox hərarətlə qarşıladılar. Televiziya çəkiliş aparır deyə nənələr, ağsaqqal kişilər, Poylunun cavan qızları, oğlanları onun pişvazına çıxdılar. Əsl el bayramıydı. Nəriman müəllim də şeirlər oxuyur, bu kənddə keçirdiyi uşaqlıq və gənclik illəri haqqında xatirələr söyləyirdi. Amma onun çıxışında bir nisgil də hiss elədim. Dedi ki,bu kənddə daha mənim yaşıdlarımın sayı azalıb. Onda hiss elədim ki, ömür keçib, gün keçib, Nəriman Həsənzadə daha axtardıqlarını tapa bilmir. Amma onu da hiss elədim ki, həmin iki günlük səyahətdə bütün Ağstafa, Qazax eli -qocalı, cavanlı - Nərimanı sevirlər. Bu sevgi isə Nəriman müəllimin bütün ömrünə yetər..
Bu dünyanın gözəl vaxtı Poyluda qaldı,
Bir qız mənə süzgün baxdı, Poyluda qaldı,
Göy üzündən ulduz axdı,-Poyluda qaldı,
Taleyimin dalısınca getdim Poyludan,-
Beşiyimin görüşünə döndüm sonradan.
Bu yazıda, təbii ki, Nəriman Həsənzadənin çoxcəhətli yaradıcılığını bütünlüklə təhlil etmək mümkün deyil. O, elə şairlərdəndir ki, tənqidçiyə söz demək, təhlil etmək imkanı verir. Mən isə sadəcə bir yubiley məqaləsi yazdım. Azərbaycan şeirinin Nərimanı isə artıq doqquzuncu onilliyini yaşayır. Yolun uğurlu, Nəriman baba!
Vaqif YUSİFLİ
Filologiya elmləri doktoru
525-ci qəzet.- 2016.- 24 fevral.- S.4.