Dünya, yaman yiyəsizsən!
Yaddaşında ağrı, əzab
Karvanıdır bəzi illər;
Bir
senator deyən zaman
"Mərd, mübariz ermənilər",
Qar ələndi başıma,
qar!
Dünya,
yaman sarsılıram-
Nə qəribə işlərin
var;
Yalan-palan
diyar-diyar,
İqlim-iqlim yayılırmış.
Nankor - qoçaq, nökər-rəis,
Xəbis sirdaş sayılırmış.
Biri üçün niyə yaxşı,
Biri üçün niyə pissən;
Hanı
aqil hökmdarın,
Dünya,
yaman yiyəsizsən!
Hökmdarın biri müdrik,
Biri hətta səfil olub;
Zəlzələlər, qasırğalar
Gah yavaş, gah qəfil olub;
Sülhü nə vaxt qorumuşuq-
Dava iflic, zəlil olub.
Qismətin dən boyda sevinc,
Vətən boyda nisgil olub.
Guya yoxdur dərdi-sərin,
Guya qayğı,
qayəsizsən?
Hanı aqil hökmdarın?
Dünya,
yaman yiyəsizsən!
Faciəmiz-cəhalətin
Siyasətdən dəm vurması,
Rəzalətin, səfalətin
Qoşa
qanad sındırması,
Bir xalq topa tutularkən
Min millətin yan durması,
Banqladeş mollasının
Məktəb, meşə yandırması...
Min oyunun sonu dəhşət,
Milyon
tale, ocaq keçir;
Çeçen qanı axıdanlar
Daha kimi hədəf seçir?
Arazın
sağ sahilində
Dığalarla təlim keçir.
Serb dağıdıb Bosniyanı,
Haqq, ədalət,
insaf hanı?
Afrikanı səmum kimi
Çulğalayan aclıq, vəba
Ərzi
gəzir qitə-qitə,
Mahal-mahal, oba-oba.
Ruandalı uşağa bax-
Bir sümükdür, bir də dəri;
İmperiya qırır hələ
Əfqanları, ərəbləri.
Yaxın Şərqdən köç eyləyən-
Mühacirlər axın-axın;
Avropadan istəyirlər
Çarəsini yaşamağın...
Nə qədər ki, zalım "ağlar"
Sıxışdırır "qaralar"ı,
Nə qədər ki, sağalmayıb
Xocalımın yaraları-
Bir az ahıl,
Bir az çocuq,
Bir az qozbel,
Bir az düzsən;
Hanı aqil hökmdarın?
Dünya, yaman yiyəsizsən!
Narahatdır bəşəriyyət-
Sabaha yol gedə-gedə;
Üç-dörd böyük, qoçu dövlət
Kiçiklərə gəlir hədə;
Diplomatın gözü qalıb
Malda, pulda, əmtəədə.
Heç əvvəlki deyil NATO,
Kəsərsizdir BeEmTe də!
Əsrin gərgin çağında da
Ağsaqqalsız, dayəsizsən;
Hanı aqil hökmdarın?
Dünya, yaman yiyəsizsən!
Oqtay Rza
əməkdar müəllim
525-ci qəzet.-
2016.- 25 fevral.- S.8.