Baş leytenant
(sənədli
hekayə)
O, yük
daşıyırdı. Çiynindəki
yükün ağırlığından beli ikiqat olmuşdu.
Əyninə çirkli qara kombinezon geyinmiş, bir
ayağını zorla sürüyə-sürüyə
çiyninə alıb daşıdığı, taxta
yeşiklərin altında sanki qozbel olmuşdu. Əyilmişdi.
Güclə nəfəs alırdı. Beli dizinə qədər qatlanmışdı.
Öz-özünə kimisə söyə-söyə,
kiminsə qarasınca deyinə-deyinə yük
daşıyırdı. Həm də, deyəsən,
bir qədər içkili idi. Dəhşətli
qorxunc üzü var idi. Sifətinin bir tərəfi,
alnından düz çənəsinə qədər tamam
yanmışdı. Bəlkə də qəlpə
yaralarından, çapıq-çapıq olmuşdu. Üz dərisi, demək olar ki, qırmızı rəngdəydi,
bir qədər də qaralmış, çürük ətə
çevrilmişdi. Onlardan bir qədər
aralıda əyninə qısa gödəkcə qeyinmiş, əlləri
belində idmançıya oxşayan, iki nəfər
bığıburma cavan oğlan dayanıb, bu yük
daşıyan yaşlı kişiləri, ətrafdakılara
belə heç məhəl qoymadan, ana söyüşü
ilə söyür, tələsdirirdilər.
- A nu,
mat.... tvoyu.... V tempe!
Yük daşıyanlar isə elə öz bildikləri
kimi aramla öz işlərini görürdülər. Mağazadan
bir qədər kənarda dayanmış yük
maşınına yaxınlaşır, bir neçə
yeşiyi hıqqana-hıqqana qaldırıb çiyinlərinə
götürür, mağazanın altında olan anbara
aparıb yığırdılar.
Görünür ki, belə-belə söyüşləri,
özlərinə qarşı olan belə kobud rəftarı
çox görmüşdülər, çox
eşitmişdilər deyə, artıq heç nəyə əhəmiyyət
vermirdilər.
Belə münasibət onlar üçün adi
bir vərdiş halını almışdı.
Üzüyanıqlı
yükdaşıyan kişi, nəyə
görəsə hərdən bir zənnlə mənə
baxır, yenə də öz işi ilə məşğul
olurdu. Onlardan bir qədər aralı, mənə
məxsus olan bayraqlı səfir maşınına söykənib,
siqaret çəkir, gedib-gələnlərə baxır,
sürücü-mühafizəçimə
tapşırdığım ərzaqların mağazadan
alıb gətirilməsini gözləyirdim. O, nəyə
görəsə ləngiyirdi. Üzüyanıqlı
yükdaşıyan, birdən ayaq saxladı. Daha da diqqətlə mənə baxmağa başladı.
Mən də ona baxdım. Amma
məhəl qoymadım. Üzümü yana
tutdum: “Yəqin ki, məni kiməsə oxşadır. Ola bilər” - deyə düşündüm. Ya
da, ola bilsin ki, söykəndiyim
maşınıma sancılmış bayraqla
maraqlanırdı.
Əlləri belində olan oğlanlardan biri çəkib
qurtardığı siqaretin kötüyünü ona tərəf
ataraq, yenə də söyüş söyərək onu tələsdirdi. O da laqeydcəsinə əyilərək,
yerə qoyduğu yeşiyi qaldırıb çiyninə
götürərək, bir də mənə baxıb zirzəmiyə
düşməyə başladı.
...Artıq
neçənci dəfə idi ki, bu hadisə təkrarlanırdı.
O, gözlərini mənə zilləyib baxır, yenə də
öz işi ilə məşğul olurdu. Aradabir,
deyəsən, mənə yaxınlaşmaq da istəyirdi.
Lakin görünür, cürət etmədi, hiss olunurdu ki, mənə
nəsə demək istəyir... Amma sonra yenə
də çəkilib gedirdi.
O, niyə
belə edir? Axı nə olub? Bəlkə pul istəyir? Burada pul istəməyə
məgər başqa adam yoxdur? Bəs görmür ki, xariciyəm? Bayraqlı maşındayam? Bəlkə
mən uzaq ölkələrin birindənəm? Bəlkə heç onun dilini də bilmirəm?
Və nə istədiyini heç başa
düşməyəcəyəm?
Birdən o, çiynindəki yeşikləri yerə
qoyub, qəddini düzəldib, axsaya-axsaya mənə tərəf
yaxınlaşmağa başladı. O mənə yaxınlaşdıqca
gözlərimi ondan ayırmırdım. Duruxmuşdum.
Mənə tam yaxınlaşıb dayandı.
Diqqətlə mənə baxırdı. Mən də heç nə başa düşmədən,
onun üzünə baxırdım. Gülümsədim.
- Tovariş
starşiy leytenant Vagabadze... Eto vi?
Özümü itirdim. Ciddiləşdim.
35 ilə yaxın bir vaxt idi ki, heç kim mənə belə müraciət
etmirdi. Doğrudur, vaxtı ilə
çoxları, mənə belə müraciət edərdi.
“Starşiy leytenant”. Amma 35
ildən sonra bu sözü, demək olar ki, unutmuşdum.
Hərdənbir evdəki, köhnə, saralmış,
ağ-ara şəkillərə baxandan-baxana bu söz
yadıma düşərdi. Amma
çalışırdım ki, o günləri tez-tez
xatırlamayım, unudum. Özü də
Vagabzade yox, məhz Vagabadze. Ay amaan!..
Bu nə deyir? Əvvəllər əlavəsiz
olaraq adımı, sonralar İsfəndiyar Bəxtiyaroviç,
bir az sonra professor Vahabzadə və son
vaxtlar isə “Cənab səfir” müraciətlərini
eşidirdim. İndi Vagabadze sözünü eşidəndə...
Hmm...
Özü də “starşiy leytenant Vagabadze”... Özümü itirdim. Diksindim.
İstər-istəməz xəyalən, təxminən 35 il bundan əvvəlki vaxtlara -
Əfqanıstana, Qəndahar, Cəlallabad ətrafında gedən
döyüşlərə, Sələnq dağının
aşırımlarına qayıtdım. Dərhal
qulağıma qəfil güllə səsləri, daha
doğrusu, güllə yağışı, atışma,
çığırtı, qışqırtı,
qaçaqaç, ana söyüşləri... ay.. oy... uy... ax... Hələ
üzlərinə ülgüc dəyməyən,
ömründə əlinə silah götürməyən, o,
necə deyərlər, çiçəyi burnunda gedən,
cavan oğlan uşaqlarının ah-nalə ilə yerə sərilmələri,
tankların, BTR-lərin səs-küyü, kontuziya
alanların gözləri hədəqəsindən
çıxmış halda qan içində
başlarını tutaraq qalmaları, ifadəsiz
baxışları bir anlığa yaddaşıma
qayıtdı. Kino lenti kimi gözlərim
önündən qəlib keçdi. O günlərin
vahiməsindən diksindim. Dərhal da “film” bitdi...
Elə bu zaman sürücü-mühafizəçim bizə
yaxınlaşdı. Sən demə, o,
yükdaşıyanın mənə yaxınlaşdığını
hələ uzaqdan görüb dərhal bizə tərəf gəlib.
Elə əl atıb onu itələmək, məndən
uzaqlaşdırmaq istəyirdi ki, yükdaşıyan
üzünü ona çevirdi, üzr istəyib uzaqlaşmaq
istədi. Qoymadım:
- Postoy...
Sonra
üzümü sürücü-mühafizəçimə
tutub:
- Podojdi,
Lyoşa, tanış
çıxmışıq.
Bayaqdan bəri
amiranə göstərişlər verən idmançıya bənzər
cavan oğlanlardan biri cəld ona yaxınlaşmaq istəyirdi
ki, sürücü-mühafizəçim əli ilə
“dayan” göstərişi verdi.
Yükdaşıyan:
-
Tovariş starşiy leytenant, məni tanımadız?
Gözlərimi
döyərək ona baxırdım:
Tanıdım.
- A...
Serjant Sorokin. Oy... Syema... eto tı?
Tanıdım. Əlbəttə, tanıdım. Qollarımı açıb onu qucaqladım. Heç nəyə əhəmiyyət vermədən
onu bağrıma basdım. O isə əvvəl bilmədi
ki, nə etsin. Məni qucaqlasın, yoxsa yox.
Bəlkə də ehtiyat edirdi ki, çirkli
kombinezonu ilə məni çirkləndirə bilər. Sonra o da məni qucaqladı. Sürücü-mühafizəçim,
bayaqdan bəri o söyüşlə amiranə göstərişlər
verən, o iki nəfər bığı-burma cavan
oğlanlar, yoldan ötənlər, diqqətlə-təəccüblə
bizə baxıb yanımızdan ötürdülər.
Mən bayraqlı səfir
maşınının yanında, diplomat, özü də səfir
(bayraqlı maşından toxunulmazlığına görə
ancaq səfir istifadə edə bilər), kostyum, qalstuk,
yanımda mühafizəçi, o isə yükdaşıyan.
Özü də bir qədər içkili... Həm
də cırıq, çirkli kombinezonda. Yanımızdan
keçənlər, yəqin düşünürdülər
ki, bunları bir-birinə bağlayan nədir? Bunlar bir-birini haradan tanıyırlar? Axı bu
necə ola bilər? O iki nəfər
bığıburma cavan oğlanlar da, özlərini bayaqdan bəri
bu mağazanın sahibi kimi aparanlar da bizə təəccüblə
baxır və inana bilmirdilər ki, nökər kimi rəftar
etdikləri bu yükdaşıyan indi səfirlə
görüşür, hətta onun - yükdaşıyanın
özünü belə qoruyurlar. Serjantdan ucuz
çaxır iyi gəlirdi.
-
Yoldaş baş leytenant, siz burda nə edirsiniz?
Sonra
başı ilə qara BMW markalı avtomobilimi göstərərək:
- Bu
maşın sizindir? - deyə soruşdu.
Köks
ötürərək:
- Hə...
Syoma, mənim maşınımdır, - dedim. - Mən indi
burada,Minskdə işləyirəm. Azərbaycanın Belarusdakı səfiriyəm.
Təəccüblə
duruxub gözlərini mənə zilləməyindən
başa düşdüm ki, kim
olmağımı anlamadı. Səfir sözünün mənasını
heç bəlkə bilmədi də...
- Afərin
sənə, Syoma, necə oldu ki, məni tanıdın? Axı aradan 35 ildən də çox bir vaxt
keçib. Mən axı çox
yaşlaşmışam. Saçım-saqqalım
ağarıb.
- Yox... mən
sizi elə bayaq maşından düşən kimi
tanımışdım. Amma gözlərimə
inanmamışdım. Doğrudur... Siz
çox dəyişmisiz. Saçınız
ağarıb. ... Amma... Axı 84-cü ildə
biz elə bilirdik ki, sizi öldürüblər. Sonra
kimsə dedi ki, yox... Sizi əsir
götürüblər. Siz Paktiya tərəflərdə
əsirlikdəsiniz... Hə... O vaxtlar siz yaman cəsur, qorxmaz
idiniz. Heç nədən qorxmurdunuz. Ehtiyat etmirdiniz. Çox cəsarətli
idiniz. Hətta o da yadıma gəlir ki, o
vaxtlar siz 8-10 metr uzaqlıqdan əla bıçaq da
atardınız. Yaxşı
döyüşürdünüz. (Eh Syoma, Syoma... O zaman
mənim cəmisi 28-29 yaşım var idi. Özgənin
torpağında qəhrəman olmağa nə var ki? Çalış öz torpağında qəhrəman
ol. Heç nədən qorxma. O zaman
isə işğalçı idik.)
Sonra
sözünə ara verərək, mənə
diqqətlə baxıb:
- Hmm... Doğrudan bu sizsiniz? Siz
sağsınız? Sizi öldürməyiblər?
- deyə suallar yağdırdı. -
Heç inanmağım gəlmir. Çünki
o tapşırıqlara, o döyüşlərə ki, siz
gedirdiniz, sizi çoxdan öldürməli idilər.
O
çox səmimiyyətlə danışırdı. Səsində, danışığında heç bir
sünilik yox idi. Hətta hiss edirdim ki, məni görməyinə
görə olduqca sevinir. Hətta kövrəlib
də, gözləri dolub. Elə mən
özüm də kövrəlmişdim. Gözlərim
dolmuşdu. O deyirdi ki, sizdən sonra (hmm... yəni mən
öləndən sonra?..) mən də
döyüşlərin birində ağır yaralandım. Uzun müddət müalicə olundum. Amma heç bir faydası olmadı. Ordudan tərxis olundum. Sonra... Sonra
isə yararsız bir adama çevrildim. O zaman mənim cəmisi
24 yaşım var idi. Cavan oğlan idim. Həəəə...
Sonra... Eh, sonra ailəm
dağıldı... İndi isə belə... Bəs siz haralarda olmusunuz?
Danışmağımın mənası yox idi. Ona nə deyəcəkdim
ki... Hansı yolları keçməyimdən
danışmalıydım? Onsuz da heç
nəyi başa düşməyəcəkdi. Yamanca səmimi danışırdı. Hər şey necə vardısa, eləcə. Köntöy suallar və qondarma ifadələr
olmadan. Heç dəyişməmişdi.
Dəyişən mən idim. Mənsə
onunla səmimi ola, səmimi danışa
bilirdimmi? Əlbəttə, yox.
Birdən ağlıma çox qəribə bir fikir gəldi. Bax bu saat, elə bu saat bu
mağazaya girib ən ucuz, göy şüşəli bir araq
alaq (bu arağa buralarda “pominka” arağı deyirlər),
konserv, pendir, bir az kolbasa, qara çörək
götürüb gedək uzaq bir yerdə oturaq. Adamsız, kimsəsiz bir yerdə.
Maşınla da yox, avtobusla... Heç kim
bizə qulaq asmasın. Heç kim bizə
mane olmasın. Heç kim bizi görməsin.
Özü də taxta yeşiklərin
üstündə oturaq. Yeşiyin üstünə bir qəzet
parçası sərək... Biz içkini adətən
bizim üçün ayrılmış diplomatik mağazadan
alırıq. Amma əgər indi bu saat
içkini diplomatik mağazadan alsaq, lap elə deyək ki,
dollarla alınan bahalı araq, viski, konyak götürsək,
bizim yeşik üstə oturub, içib
danışacaqlarımız öz marağını itirəcək.
Mənasız bir şeyə çevriləcək.
Səmimiyyətdən uzaqlaşacaq. Əlbəttə, yeşik hara, qara çörək
hara, viski hara? Mən isə onunla lap əvvəllərdəki
- baş leytenant kimi içib sərxoş olmaq istəyirdim.
Dünyanın ölüm-itim qorxusundan yox,
dünyanın əclaflığından danışmaq istəyirdim.
Ürəyimi tam boşaltmaq,
qorxusuz-ürküsüz danışmaq istəyirdim. Amma bilirdim ki, bu saat
bu dünyada bundan mümkünsüz bir şey yoxdur. Bunu eləmək mümkün deyil. Çünki mən səmimiyyətimi çoxdan
itirmişəm.
Mən təbiət etibarı ilə ateistəm. İnanmıram.
İnana bilmirəm. Bu barədə
dəfələrlə demişəm də, yazmışam da.
Hətta bu barədə atamla mübahisəm də
olub. Əlbəttə, mən bunu
özüm üçün fəxarət hissi saymıram.
Bu mənim öz şəxsi işimdi.
Amma elə ki, dilimə 50 qram içki dəyir... Hə... O
zaman Allaha inanmağa başlayıram. İnanıram.
Çünki Allah o zaman mənə o qədər şirin vədlər
verir, qulağıma o qədər şirin sözlər
pıçıldayır ki, elə bil ayrı aləmə
düşürəm... Aman Allah! Amma səhər
ayılıb görürəm ki... Ehh... yenə
də aldanmışam. Sən demə, bu dünyada ən
çətin iş - yaşamaq imiş.
Yox, ürəyimdə tutduğum bu “içib-keflənmək
arzusu”nu Syomaya təklif etmədim. Əlbəttə, yox.
Mən belə bir səmimiyyətə gedə
bilməzdim. Kimə lazımdı belə
səmimiyyət? Səmimiyyət dövrü çoxdan ötüb.
Mən, lazım gələrsə,
özümü səfeh kimi göstərə bilərəm,
amma axmaqlıq etmərəm. Syoma ilə nə
danışacaqdım ki? Arada 5-10 dəqiqəlik
söhbətimiz qalmışdı. 30-35 il
bundan əvvəl hər şey ayrı idi, hər şey
başqa cür idi. Mən akademik oğlu idim,
deputat oğlu idim. O isə adi bir elektrik-fəhlə
oğlu idi... Nə bilim, kimin oğlu idi... Atalarımızı
bir kənara qoyaq. Bizim
özümüzün aramızdakı fərqimiz isə
yalnız mənim çiynimdəki ulduzların sayında idi.
Qarşı tərəfdən atılan güllə
isə bilmirdi kimə dəyəcək. Fəhlə
oğluna, ya akademik oğluna. Biz
hamımız bərabər idik. Ölüm
bizi bərabərləşdirmişdi. Biz
bir idik.
Həəə...
Bilirdim ki, hara getsək, söhbətimiz onsuz da
baş tutmayacaq. Eh... O bütün həyatını,
keçmişini, gələcəyini, sabahını,
bugününü itirmişdi. Sabahlarında
heç nə qalmamışdı. Ancaq
yeşik daşımaqdan başqa. Mən də
ömrümün ən yaxşı illərini, cavanlıq illərimi,
Syoma demişkən, ən cəsur, dəliqanlı, qorxmaz
vaxtlarımı İran inqilabında, Əfqanıstan
müharibəsində itirmişdim. Qorxa-qorxa
itirmişdim. Olan olmuşdu artıq. Və bir daha geri qayıdası deyildi.
Əlimi cibimə salıb pul çıxartdım. Onun çirkdən
qaralıb bozarmış, döş cibinə qoydum. Deyəsən 50-lik dollar idi. Mən
bundan artıq ona heç nə edə bilməzdim.
- Yox, yox,
yoldaş baş leytenant, lazım deyil...
Əlimi geri qaytarmaq istədi.
- Nə
“baş leytenant, baş leytenant” deyirsən? Sənə
“götür” deyirəm, götür. Mən
bu mağazaya tez-tez gəlirəm. Sabahda-
birigündə yenə gələcəyəm. İndi isə pulu götür. Hökmən
görüşəcəyik səninlə. Mənim burada əlaqələrim pis deyil. Sənə
bir iş düzəldəcəyəm. Hökmən
kömək edəcəyəm. İndi isə
bu pulu götür. Hökmən
görüşəcəyik səninlə. -
Onu bir də qucaqladım. - Di yaxşı, sağ ol...
Maşına əyləşdim. Yağış çisələyirdi. Maşın uzaqlaşırdı. Yan güzgüdən baxıb gördüm ki, o hələ də arxamca baxır. Həm də gülümsəyir. Hər ikimiz, 5-10 dəqiqəlik, dünənə qayıtmışdıq. Dünəni yaşayıb bu günə keçmişdik. O, bəlkə də bu günə qayıtmaq istəmirdi. Onu mən qaytardım. Fikirləşirəm, axı bu mənasız müharibə nəyə lazım idi? Kimə lazım idi? Ən ümdəsi, nə üçün lazım idi?..
Mən yalan demişdim. Bir də o mağazaya getmədim. Fikirləşdim ki, keçmişi yada salmağın nə mənası var, onsuz da hər şey bitmişdi. Onsuz da mən ona heç nə edə bilməyəcəyəm. Onunla heç yana gedən deyildim. Oturub içki içən də deyildim. Onsuz da ildə bir dəfə 50 qram içə bilirəm, ya yox. Yaşım o yaş deyil. Mən onun xatirində döyüşkən bir zabit kimi qalmışdım. Vəssalam. O isə mənim yadımda... Yadıma gəlir ki, yaxşı gitara çalardı. “Davay zakurim, soldat” mahnısını ona dəfələrlə oxutdurardıq. İndi isə “davay zakurim” mahnısını “Kent”, “Marlboro” çəkib dinləməli idik. Bu isə tamam səmimiyyətdən uzaq çıxardı.
lll
Ay aman,
dünyamız nə yaman kiçik imiş. Bizə
elə gəlir ki, dünyamız böyükdür. Həddən artıq böyükdür. Yox. Əlbəttə, yox. Dünyamız çox kiçikdir. Mən
vaxtı ilə İranda işləyəndə
tanıdığım bir İran zabitini qocalmış halda
İsveçrədə, İşveçrədə işlədiyim
bir diplomatı Moldovada, Əfqanıstanda evimdə işlətdiyim
bir fəhləni Pakistanda, Moldovada birgə işlədiyim
Çin səfirini Belarusda və digərlərini başqa
yerlərdə görmüşəm. Dünyamız nə
yaman kiçikdir! Bəs bizə niyə elə gəlir ki, dünyamız
böyükdür?! Bəs bu
kiçik dünyada biz niyə bir-birimizlə yola gedə
bilmirik?! Niyə vuruşuruq?! Niyə dil tapmırıq?! Sanki bir-birimizin
üzərində hökmranlıq, hegemonluq etməkdən
zövq alırıq...
Minsk,
2015-ci il
İsfəndiyar
VAHABZADƏ
525-ci qəzet.- 2016.- 27 fevral.- S.18-19