İnsan kimi də, sənətkar kimi də
Nadir
RƏSSAM NADİR BAYRIŞOVUN 60 YAŞINA
Bu yaxınlarda bir tanışım, rəssam dostum
Nadirin 60 yaşının tamam olduğunu mənə
xatırlatdı.
Əvvəlcə inanmaq istəmədim. Yəni Nadirin Əzim
Əzimzadə adına Rəssamlıq Məktəbini
bitirib Həsənabad məktəbinə (o vaxt kənd
Sovetabad adlanırdı) işləməyə gəlməsindən
41 il keçib?! 19 yaşında müəllimliyə
başlayan görkəmcə dərs dediyi şagirdlərdən
fərqlənməyən məktəbin ən gənc müəllimi
nə tez 60 yaşa çatdı?! Təvəllüdünü
xatırladım - 1956-cı il. Hə, deyəsən mən səhv edirəm.
Doğrudan da o vaxtdan 41 il keçib,
doğrudan da, məktəbin "ən gənc müəlliminin"
60 yaşı tamamdır!
Telefonu
götürüb ona zəng edirəm:
- Nadir, 60
yaşını təbrik edirəm! Daha uzun illər
sağlam, mənalı ömür arzulayıram!
Səsimdən
tanıyır:
-
Qardaş, sağ ol! Nə yaxşı yadına
düşüb!... Görürsən də!
İndi atamdan da, anamdan da yaşlıyam... Rəhmətlik
İsmayıl (rəssam dostumuz İsmayıl Qasımovu deyir)
hər gün idman edərdi, yeməyində-içməyində
diqqətli olardı, ancaq 60 yaşa çatmadı...
Doğrudan da, dünyanın qəribə işləri var! Mənim
ağlıma gəlməzdi ki, bu qədər yaşayacam!
-
İnşallah, hələ neçə onilliklər
keçirəcəksən!
- Nə
bilim, vallah. 60-a çatmışamsa, demək üzüm bərkdir,
ola bilər...
Bir az susur. Sonra:
- Qardaş, qonaqlıq-filan keçirməmişəm. Keçirəsi olsam, sən başda olacaqsan.
- Sağlıq olsun, mütləq gələrəm.
Xudahafizləşirik.
Mən yaşca Nadirdən böyüyəm.
Onu uşaqlığından tanıyıram. Onların ailəsi ilə bibimgilin
ailəsi yaxın dost idi. Tez-tez
qonşuluğumuzda yaşayan bibimgilə ailəvi qonaq gəlirdilər.
Yay tətilini çox vaxt qardaşları ilə
birlikdə onlarda keçirirdilər. İllər
keçdikcə Nadirlə aramızda səmimi münasibət
yarandı, dostlaşdıq. Sonralar bibim
qızı ilə evlənən Nadirlə qohum da olduq. Nadirin müəllim işlədiyi vaxtlarda tez-tez
görüşür, oturub söhbətləşirdik. Ən çox o danışırdı. O
zamanlar fəlsəfə ilə, incəsənət tarixi ilə
maraqlanır, oxuduğu kitabları mənimlə müzakirə
edirdi. Müxtəlif cərəyanlardan,
onların yaradıcılıqlarından, klassik İtaliya,
Fransa, İspaniya rəssamlarından müasir Azərbaycan rəssamlarına
qədər mən ondan öyrənirdim. Rəssamlıq
bacarığım olmasa da, incəsənətin bu
növünə məndə maraq oyanırdı. Qəlbi yaradıcılıq eşqi ilə dolu olan
Nadiri rayon mühiti, müəllimlik sıxırdı. Ovqatından asılı olaraq bəzən bədbin
notlarda danışsa da, həm mənim üçün, həm
də özü üçün nikbin planlar da
cızırdı. Özü
üçün belə qərara gəldi ki, mütləq təhsilini
davam etdirməli, Bakı mühitində yaşamalıdır.
Elə də etdi. Ailəli,
iki uşaq atası olmasına baxmayaraq Azərbaycan Dövlət
İncəsənət Universitetinin Rəssamlıq fakültəsinə
qəbul olundu. Həm əyani oxumalı, həm
də ailə saxlamalı idi. Nadir
üçün də, ailəsi üçün də
çox çətin idi. Bütün
çətinliklərə dözərək təhsilini
tamamlayıb rayona döndü. Keçən
əsrin 80-ci illərinin axırları idi. Ölkədə ictimai-siyasi vəziyyət
qarışmışdı. Nadir həm sifarişlə
iş görüb ailə saxlayır, həm də
birotaqlı, təmirsiz emalatxanasında yaradıcılıqla
məşğul olur, yeni-yeni mövzular üzərində
işləyirdi, öz üslubunu tapmaq üçün
axtarışdaydı. Bəzən sifarişləri
çatdırmaq üçün aylarla yaradıcı işlərinin
üstü açılmır, yarımçıq işlərinin
üstünə örtdüyü qəzetlər
saralırdı. O vaxtlar Nadirin gileylənərək
söylədiklərini indi də xatırlayıram:
- Həvəslə
bir işə başlayırsan. Fikirləşirsən
ki, arzuladığım işi axır ki, ortaya qoya biləcəksən.
Ancaq dolanmaq üçün aylarla başqa
işlər görməyə məcbur olursan. Sonra həvəslə
başladığın işə yenidən qayıda bilmirsən,
qayıtsan da əvvəl fikiləşdiyin iş
alınmır.
Nadir
yaradıcılığının ilk illərində öz fərdi
üslubunu yaratmağa çalışır, daxili
dünyasını ifadə edə biləcək mövzular
üzərində işləməyə can atırdı. Əlbəttə, öz fikirlərini ifadə edə
biləcək kompozisiyalar, mövzular, rəng
çalarları vasitəsilə.
İki il əvvəl Vəcihə Səmədova
adına sərgi salonunda Nadirin fərdi sərgisi
açıldı. Görkəmli sənətkarların
onun haqqında dediyi xoş sözlər, televiziyada sərgi
haqqında, Nadirin yaradıcılığı haqqında
verilən verilişlər, görkəmli sənətşünas
alim Ziyadxan Əliyevin onun haqqında yazdığı məqalələr
dostumun arzuladığı uğura çatdığına məndə
inam yaratdı. Fikirləşdim ki,
Z.Əliyev kimi bir alim Nadiri B.Kəngərli ilə müqayisə
edirsə, demək, o bu uzun illərdə boşuna
yaşamayıb.
Z.Əliyev
Nadirə həsr etdiyi məqalədə yazır: "Onun
yaradıcılığında ötən əsrin
sonlarında respublikamızda baş verən olaylarla
bağlı neçə-neçə mövzunun yer alması
da bilavasitə onun bu hadisələrin içində
olmasından, müasirlərinin yaşadıqları təzadlı
anlara şəxsən şahidlik etməsindən irəli gəlirdi".
Bu sətirləri oxuyarkən onun çətin
keçən mübarizələrlə dolu əzablı həyatı
gözüm önündə canlandı. Nadir
SSRİ-ni dünyanın ən qəddar imperiyası hesab
edirdi. Məlum 80-ci illərin sonu, 90-cı
illərin əvvəllərindəki hadisələrdə o,
rayonda ən fəal hərəkatçılardan idi.
Mitinqə adam yığmaq
üçün rastına düşən maşına minib
kənd-kənd, küçə-küçə meqafonla gəzirdi.
Bir dəfə ikilikdə oturub dərdləşirdik. Birdən Nadir söhbəti
dəyişib dedi:
-
Qardaş, görürsən də! Ailəmizi,
öz işlərimizi atıb, gecə-gündüz təbliğat
aparırıq, hansı çətinliklərlə üzləşirik.
Hitlerin yıxa bilmədiyi imperiyanı yıxmaq
istəyirik. Neçə vaxtdır heç kim sifariş vermək istəmir. Hamısı xəbər göndərir ki, cəbhəçilərdən
uzaqlaş, nə istəyirsən verək. Mən də onlar istəyəni eləmirəm.
O, bir ara susdu. Sonra fikrini toplayıb dedi:
- İndi başımıza and içən oğlanlar
var ha, hakimiyyətə gəlsələr, görərsən,
bizə heç "zdrasti" də eləməyəcəklər.
Nadirin "öncəgörənliyini" sınamaq üçün çox gözləməli olmadıq. Bir neçə aydan sonra dostlarımız doğrudan da iş başına keçdilər. Nadir isə olan-olmazını yığıb Bakıya köçməli oldu.
Nadirin 90-cı illərdəki Bakı həyatını təsəvvür etmək üçün tanınmış şair, yazıçı-publisist Əjdər Olun "Börüsoy" hekayəsini oxumaq kifayətdir.
1990-cı il 20 Yanvar faciəsindən 5 gün sonra Neftçalada da qırğın oldu: 2 nəfər öldürüldü: 10 nəfərdən artıq adam ağır yaralandı, 30-dan artıq adam isə həbs edildi. Hərbi komendantlıq Nadiri və qardaşı Natiqi həbs etmək üçün hər yerdə axtarırdı. O zaman Natiq bizim evdə, Nadir isə qonşumuz rəhmətlik Ruhulla müəllimgildə gizlənirdi. 4 gündən sonra xəbər verdilər ki, onların yerini öyrəniblər. Biz Natiqi rəhmətlik İsmayılla gecə ikən Şirvan şəhərinə qaçırdıq. Nadir isə qaynı Bəxtiyarın Arzuman adlı tanışının motosikleti ilə Neftçaladan 30 kilometr aralıda olan Lerik obalarındakı çoban tanışının yanına pənah apardı. Bu gün o hadisələri - çoban itlərinin üstlərinə cummasını, onları canavarboğan itlərin ağzından oba adamlarının güclə xilas etməsini, yanvarın soyuğunda, gecənin zülmət qaranlığında motosikletlə birlikdə kanala düşmələrini... yumorla danışsa da, onun həyatında necə çətin günlərin olduğu göz önünə gəlir...
O günlər elə hamı üçün çətin keçirdi. Amma 90-cı ilin qanlı yanvarı Bayrışovlar ailəsinə daha ağır zərbələr endirdi. Böyük qardaşlar Natiqlə Nadir Neftçalada canlarını qoymağa yer tapmadıqları, yaxalarını təqiblərdən qurtarmaq üçün tez-tez yerlərini dəyişdikləri bir vaxtda onların kiçik qardaşları Ramizi Bakıda tutub Şüvəlan təcridxanasına salmışdılar. Təcridxanadan çıxdıqdan sonra fevralın şaxtalı, qarlı qış günlərində Ramizin itkin düşməsi xəbəri yayıldı. Bir neçə gündən sonra isə onun müəmmalı şəkildə donmuş cəsədini Bakının mərkəzi küçələrindən birindən tapdılar. Böyük qardaş Natiqin də səhhəti pozuldu, o sağalmaz bir dərdə düçar oldu. Natiq artıq neçə illərdir çarpayı dustağıdır, ailəsi ilə birlikdə o ağır günlərin əzabını çəkir...
Bu yaxınlarda Nadir rayona gəlmişdi. Bir neçə
dost-tanış bir yerə toplaşmışdıq. Ötən günləri xatırlayırdıq.
Lerik obalarındakı əhvalat da yada
düşdü. Nadir dedi:
- Hələ
siz obadan sonra başıma gələni bilmirsiz. İki həftədən sonra xəbər gəldi
ki, daha sakitlikdir, qayıt. Mən də evə
döndüm. Heç iki gün keçməmişdi
ki, dostlar xəbər çatdırdılar, bəs gəlməyindən
komendant xəbər tutub, səni həbs edəcəklər.
O vaxt fevral ayı çox soyuq keçirdi. Bu dəfə
də motosikletdə torpaq yolla Salyan rayonunun
Qızılağac kəndindəki qohumumuzgilə getməyi qərara
aldım. Biz kəndə çatanda səhər
təzə açılırdı, mal-qara örüşə
buraxılırdı. Motosikletin
üstündə ikimiz də donmuşduq.
Əl-ayağımızı hiss etmirdik. Arzuman
motosikleti saxlaya bilmirdi. Qarşımıza
çıxan qoyun sürüsünün içinə girərək
birtəhər dayana bildik. Bizi donmuş vəziyyətdə,
qucaqlarında evə apardılar...
İlk dəfə idi ki, başına gələnləri
yumorsuz nəql edirdi. Danışdıqca da o günlərin
soyuqluğunu, həyəcanını canında hiss edirdi.
Ötən ilin noyabrında Bakıya, Nadirin
emalatxanasına getmişdim. Mən orda olarkən görkəmli
rejissor Mərahim Fərzəlibəyov iş yoldaşı
Çingiz Ələsgərli ilə ora gəldi. Bir neçə saat bir yerdə olduq. Mərahim
bəylə ikilikdə söhbət edərkən Nadir
haqqında dedi:
- Rəhmətlik
İlhamın sağlığında (mərhum Xalq artisti
İlham Əsgərov) boş vaxtlarımızda həmişə
onunla gəzməyə çıxır, söhbətləşirdik.
İlhamın ölümündən sonra asudə
vaxtlarımda Nadirin yanına gəlirəm. Onun
yanında özümü rahat hiss edirəm, onunla söhbətləşmək,
işlərinə tamaşa etmək, zarafatlaşmaq mənə
xoş təsir bağışlayır. Çünki
Nadir səmimi insandır, dostluqda təmənnasızdır.
Belə fikir söyləyənlər var ki, insanın
adı ilə xasiyyəti, xarakteri arasında
bağlılıq var. Yəni insanın adı onun haqqında
nələrsə deyir. Mən heç vaxt bu fikirlə
razılaşmamışam. Ancaq dostum Nadir
haqqında düşünərkən mənə elə gəlir
ki, deyəsən, bəzi insanlarda doğrudan da belədir.
Çünki Nadir xarakteri,
dünyabaxışı, insanlara münasibəti və bir
çox başqa keyfiyyətlərinə görə fərqli
insanlardandır, yəni nadirdir.
Nadir, 60
yaşın mübarək! Sənə ailənlə,
sevimli nəvələrinlə birlikdə bol ruzulu xoşbəxt
ömür arzulayıram. Tezliklə aparıcı
mövzun olan Qarabağ mövzusunun ikinci hissəsini - Qələbədən
sonrakı dövrünü fırçanla əbədiləşdirəsən!
İnşallah, tezliklə bu günü görərik!
Fərhad
ƏZİZBƏYLİ
525-ci qəzet.- 2016.- 6 iyul.- S.6.