Şair Barat Vüsalın ikicildliyi təqdim edildi
Ötən gün Azərbaycan Yazıçılar Birliyinin
(AYB) "Natəvan" klubunda
şair, publisist Barat Vüsalın yeni kitabının təqdimat
mərasimi keçirilib.
İki cildlik
"Seçilmiş əsərləri"
seriyasında şairin
şeirləri, poemaları
və esseləri toplanıb.
Qeyd edək
ki, Barat Vüsal
1951-ci ildə Qazax rayonunda doğulub. Şair 1993-cü ildən AYB-nin Qazax bölməsinə rəhbərlik edir.
"Göz aydınlığı",
"Ürəyimdən bir
çay axır", "Yolumuz eşqə bağlıdı",
"Ömür bitər,
Yol bitməz",
"Qazaxda yaşadım
mən öz ömrümü", "Ruh
gəmisi" və
"Kufə əhli"
kitablarının müəllifidir.
1998-ci ildə Xəlil Rza Ulutürk, 2008-ci ildə Səməd Vurğun ədəbi mükafatlarına
layiq görülüb.
Tədbiri Birliyin katibi Rəşad Məcid açaraq şairin ictimai və ədəbi fəaliyyətindən
danışıb: "Barat Vüsal əyalətdə
- Qazaxda yaşamasına
baxmayaraq müasir ədəbi prosesə biganə deyil, ədəbiyyatımızı diqqətlə
izləyir və ədəbi hadisələrə
mövqeyini inamla ortaya qoyur. O, "525-ci qəzet"də ədəbi
mühitdəki olaylara
dəfələrlə reaksiyasını
bildirərək yazıları
ilə çıxış
edib. Barat Vüsal
bununla yanaşı ölkəmizin başqa bölgələrində yaşayan
şair və yazıçıların da
yaradıcılığına həssaslıqla yanaşır.
Onun gənc yazarların yetişməsində də
əməyi var. Yazıçılar
Birliyinin Qazax bölməsinə rəhbərlik
etmək, fəal ictimai mövqeyini qoruyub saxlamaq, əlbəttə, əzmkarlıq
tələb edir.
Bu fəallıq onun yaradıcılığında
da müşahidə olunur".
AMEA-nın müxbir üzvü, professor Nizami Cəfərov B.Vüsalı ədəbiyyatımızın
klassiklərindən adlandırıb:
"Barat çox zəngin,
yaradıcı bir ziyalıdır. O, bizim poeziyamızın klassiklərindən
biridir. Barat haqqında
deyilən hər bir söz böyük
ədəbiyyat barədə
deyilir".
Xalq şairi Nəriman Həsənzadə B.Vüsalın
istedadlı və səmimi bir şair olduğunu qeyd edib: "Baratın mətbuatda yazılarını oxuyarkən
bəzən sözün
psixologiyasını açdığına,
bəzən klassik şairlərimizin poetikasından
tutarlı fikirlər irəli sürdüyünə
rast gəlirik. Yəni, o yalnız şair deyil, həm də dəyərli publisistdir. Barat ürəkli, istedadlı,
səmimi və böyük bir şairdir".
Tədbirdə çıxış edən Tağı Əhmədov şairin yaradıcılığını yüksək qiymətləndirib:
"Qazax həmişə
şairlər məskəni
olub. Barat da
Qazax yurdunun yetirməsidir. Onun şeirlərinin
hamısı göz oxşayır, çünki
o, xalqdan, onun ruhundan, qəlbindən keçənləri yazır.
Baratın şeirlərində
bəzən elə bir təlatüm olur ki, az qalır fırtına qoparsın. Bu onun istedadının,
səmimiyyətinin nümunəsidir".
Birliyin katibi İlqar Fəhmi şairlə bağlı düşüncələrini
bölüşüb: "Barat Vüsal yaradıcılığında
ən çox bəyəndiyim detal budur ki, onun
poeziyası, şeirləri
bizim özümüzə,
ruhumuza məxsusdur. Onun şeirləri öz tariximizdən, etnoqrafiyamızdan,
milli düşüncəmizdən
gələn səmimi
duyğulardır".
Tənqidçi Rüstəm Kamal
bu gün Barat Vüsal poeziyasının
və ədəbiyyatımızın
bayramı olduğunu deyib: "Bəzi şairlər var ki, onların şeirlərində yalnız
cinsiyyəti görünür,
bəzi şairlər
də var ki, şəxsiyyəti, kimliyi, mənsubiyyəti ortaya çıxır. Barat ikincilərdəndir. Barat vətəndaş şairdir. O, bu milləti tanıdan, bütövləşdirən dəyərlərin
poetik salnaməsini yazan, yaradan söz adamıdır".
Qazax Xeyriyyə Cəmiyyətinin
sədri Vidadi Bayramov, millət vəkili Kamran Nəbizadə, akademik Teymur Bünyadov, professor Valeh Nəsibli, tədqiqatçı alim Salatın Əhmədli, şairlər Oqtay Rza, Əlirza Xələfli, Yusif Nəğməkar, Nizaməddin
Ziyadoğlu, Dərviş
Osman, mərhum şairimiz Xəlil Rza Ulutürkün həyat yoldaşı Firəngiz Ulutürk və başqaları da çıxış edərək şairin poeziyası və şəxsiyyəti barədə
xoş düşüncələrini
paylaşıblar, şeirlər
səsləndiriblər.
Sonda Vüsal
Barat çıxış edərək
tədbir iştirakçılarına
və təşkilatçılara
minnətdarlığını bildirib.
Müşfiq
ŞÜKÜRLÜ
525-ci qəzet.- 2016.- 29 iyun.- S.7.