Ağdamda nəyim qaldı?
Arvad şəhərə köçüb gəlməyini
nə özünə bağışlaya bilirdi, nə Papama. Bəlkə də
demişəm, amma təkrarın ziyanı yoxdu, arvad “erməni-gürcü”
deyəndə erməni öz yerində, gürcü
sözü Faynşteynlərə aid idi, cuud əvəzinə
gürcü deyirdi.
Beləliklə,
bütün həyət bildi ki, məsələ xeyli ciddidir:
Almazla Robert arasında sevgi yaşanır, hələ bu
azmış, sevgililəri gecənin bir aləmində,
bütün məhlənin yatdığı vaxt həyətin
hansı küncündə isə öpüşən
görmüşdülər. Görən də kim olsa yaxşıydı? Əlbəttə, Qəzənfər!
Arvadı “qaçandan” sonra uzun gecələrini haralardasa
qısaldan bu subay kişi evə
qayıdanda Robertlə Almazı həyətin qaranlıq bir
yerində qucaqlaşıb öpüşən
görmüşdü. Səhərisi Dəyirman
həyəti Qəzənfərin informasiyasından dik
dayanmışdı.
Əvvəl-əvvəl həyət bu macəra
haqqında pıçıldaşırdısa, bu
öpüşmə məsələsi hadisələrin
gedişini qızışdırıb konflikti dərinləşdirdi. Hadisələr
sürətlə kuliminasiyaya yaxınlaşdı. Gizli danışılanlar aşkarda səsləndi.
Bu məhlədə heç vaxt elə bir
aktuallıq kəsb etməyən milli məsələ
gündəmə gəldi. Azərbaycanlılar
Almazı qınayır, ermənilər Roberti. Bir Knarik məsələyə
dözümlü yanaşır, indiki dillə desək
yüksək tolerantlıq nümayiş etdirir:
- Qələt
eliyir onu deyən! Noolsun erməni dəyil, zato
yaxşı qızdı. - Bu yerdə səsindən
alır və ermənicə davam eləyir. - Bir az ailəsi tayımız dəyil, amma neynim,
uşağım istiyir.
O vaxtlar
Knarik hələ Baqratı süpürgə ilə
döyüb, yekə dalını ona göstərib ədəbsiz
təklifdə bulunmamışdı. Aralarında
diplomatik münasibət kəsilməmişdi, hərdən
Arusyakla dərdləşirdi erməni dilində. Beynəlmiləl məhəbbət məsələsi
ümumi müzakirəyə çıxanda Arusyak Knarikə məsləhət
görür ki, Roberti çəkindirsin bu yoldan, onlar evlənsələr
də, axırı yoxdu. Heç vaxt erməni ilə
türk xoşbaxt ola bilməz. Knarik cavabında deyib ki, axçi, cəhənnəmə,
istəməzlər, boşanarlar. Robert qız deyil ki! Qoy qızın dədəsi Səfər fikir eləsin.
Onda Arusyak kəskin bir arqument qoymuşdu ortaya: bəs
uşaqları olsa, onda necə? Damarında
türk qanı axan nəvəni sən necə doğman biləcəksən?
Knarik duruxub: axçi, bu heç mənim ağlıma gəlməyib.
Arusyak isə sakitləşmir, bıçağını dərinə
işlədir:
- Bu
zarafat-zarafat oyunu deyil, axçi, ciddi məsələdi. Türk bizim qan düşmənimizdi.
Knarik bu sözün qabağında deməyə söz
tapmayıb, bəlkə də ağlından keçirib ki, bu
türk necə qan düşmənidir ki, Arsen davada olanda Yunus
onu heç nədən korluq çəkməyə
qoymadı. Balalarını da öz balaları kimi saxladı,
yoxsa acından ölərdilər. Arsen qayıdıb gələndə
də kişi balası kimi dedi ki, ə,
Arsen, arvadını da, oğlanlarını da sağ-salamat
qaytarıram özünə. Bəlkə də Knarik heç
belə düşünməyib, amma Arusyakın dediyini də
qəbul eləyə bilməyib və əlacsızlıqdan
sağ əlini iri döşlərinin ayrıcına qoyub
Mariya Maqdalina kimi üzünü göyə tutub:
- Vay
astuvas!
Bu söhbətlərin tərcüməsini mənə
nərd oynayanda Surayya danışırdı. Papama da
çatdırmışdı. Papam hirslənmişdi:
- O Baqrat
yaxşı kişidi, arvadı poxunyəəndi! Daşnakdı kopaqqızı, gözlərinnən
kin, xəbislik yağır. Barı bir arvad ola adamı yandırmaz, g...ü iki yüz
qramdı.
Burda Surayya Papamın sözlərinə ciyərdən gələn
bir qəhqəhə çəkir. Qıraqdan söhbətə
qulaq verən və heç vaxt Arusyakı sevməyən
Knarik də Surayyanın qəhqəhəsinə qoşulur.
Papam ilhama gəlib davam eləyir:
- Sən
öl, Baqrat kişi adamdı ki, o arvada
yaxın dura bilir. Yüz il arvadsız qalam
ha, ona gözümün üjüynən də baxmaram. Az, Surayya, sən bilmirsən ey, adam kişilikdən
düşər ey! - Arvadlar partlamaq dərəcəsinə gəlirlər.
- Nəyə gülürsünüz, az, bəlkə
yalan deyirəm? Bu sifətdə arvad olar? -
Üzünü uğunub getmiş Knarikə tutur. - Bəlkə
düz demirəm, Knarik? O arvaddı? Arvad olar sənin kimi! Yanına bir şapalax çəkif gedəsən
bazara, qayıdıf görəssən ki, hələ titriyir
quyrux kimi. - Arvadlar deyəsən artıq
tumanlarını islatmışdılar. Papam isə
sakitləşmir. - Elə Surayyanın
özü də pis dəyil, istifadə müddəti hələ
bitmiyif.
-
Axçi, ta mən öldüm! - Surayya gülüşün
arasından çırt-pırta oxşayan qəribə səslər
çıxardır harasındansa.
- Allah
güldürsün səni, Mamed! - Knarik nə təhər
qızışırsa, çoxdan evdə geydiyi rəngi
solmuş nazik krepdişin donunun ətəyi ilə
özünü yelləyir, sonra elə həmin ətəyini
xeyli yuxarı çəkib tərləmiş
buxağını, yaşarmış gözlərini silir. Ağlığından göyə çalan dizləri
də çöldə qalır. Papam yumru-yoğun ağ dizləri görüb yeni qüvvə ilə
cuşə gəlir:
- Bə mən
kopolu bəyaxdan nə deyirəm?!
Qəzənfərlə
söhbətdə isə, Papam məsələyə daha
ciddi, milli təəssüb hissi ilə yanaşır:
- O Səfər
də oğrac adamdı, qınına çəkilib
tısıb, guya bu qız onunku dəyil. Denən
niyə çəkmirsən ipini? Qızdı
dayna, indi onun pis vaxtıdı, sineyvaz yemişi kimi yetişən
vaxtıdı, bircə pıçax üjünə bənddi
ki, paralansın ortasınnan. Düz demirəm,
Qəzənfər?
- Bə nədi,
Mamed dayı?!
- İndi
o qızın heylə yaşıdı, bir az
da qızıxıfdı, qanmır neynədiyini, bəs denən
sən atası dəyilsən bu bihəyanın? Nədi, bəlkə erməniyə yeznə demək
istiyirsən, beynamıs kopolu? Gədə də bir gədə
ola! Avara, nəşəxor, qumarbaz!
Qəzənfər kişilənir:
-Sən öl, Mamed dayı, heylə
bir şey ola ha, mən Səfər-zad
tanıyan dəyiləm, o qızı da, o erməni
dığasını da inək balasın tafdıyan kimi tafdıyajam,
bax, bu həyətin ortasında.
Papamın
üzündən istehzalı bir təbəssüm keçir:
- Səndəki
qeyrətə bələdəm, Qəzənfər, amma
nahaqdan qan tökmə, gül kimi balan var.
Qəzənfər
istehzanı hiss eləyəcək naziklikdə deyildi. Odur ki,
şöşələnməkdə davam edir:
- Mamed
dayı, sən bizim ağsaqqalımızsan, amma bu işdə,
mən ölüm, sən qıraxda dur, qarışma!
Bu xamır çox su aparacaqdı, əgər Almaz
özü məsələyə nöqtə qoymasaydı.
lll
Bir gün yenə qonşuların həyətin
ortasında oturub qeybətləşdiyi vaxt söhbət gəlib
çıxdı hələ də aktuallığını
saxlamış Almaz və Robert məhəbbətinin
üstünə. Tədricən söhbət müzakirəyə,
müzakirə mübahisəyə, mübahisə davaya
çevrildi. Ağız deyəni qulaq
eşitmirdi. Söhbət elə
qızışmışdı ki, Almazın və ya Robertin
danışılanları eşidə biləcəkləri də
heç kəsin vecinə deyildi. Yaxşı
ki, Robert evdə yoxdu, bulvarda idi, yoxsa möhkəm dava
salardı. Hətta öpüşmə məsələsini
həyətə Qəzənfərin yaydığını
biləndə bıçaqla ona hücum eləmiş,
yumşaq yerini bir balaca cızmışdı. Onda qan görən Qəzənfər bərk
qorxmuş, xalası Fatmanın həyətinə soxulub
qapını daldan bağlamışdı. Arvadların qara-qışqırıqlarının
müşayiəti ilə kişilər cumub Roberti tərkisilah
etmişdilər. Onda Robert yerdə
çox çapalamış, torpağı kürəyi ilə
çox eşmiş, nəhayət,
gücsüzlüyünü hiss eləyib
hönkür-hönkür ağlamışdı.
Həmin hadisə, Qəzənfərin
bıçaqdan qorxub bir “erməni dığasının”
qabağından qaçması, hələ azmış kimi
qaçıb “Fatmanın g...nə girməsi” (ifadə Papama məxsusdu)
bir müddət Robert-Almaz məsələsinin
özünü belə kölgədə qoymuşdu.
Papam
bütün bu məsələni bir ağsaqqal müdrikliyi ilə
yekunlaşdırmışdı:
- Ə, Qəzənfərin
yekə-yekə qırıldatmağına baxmıyın ey,
dızqağın biridi!
Bu yekunla da Qəzənfər avtoritetinin bir hissəsini
bıçağın cırdığı şivyot
şalvarı ilə bir yerdə itirmişdi, özü də
həmişəlik. Elə Papamla söhbətdə Qəzənfər
cavanları “tafdıyajam” deyəndə kişinin istehza ilə
qımışıb “Səndəki qeyrətə bələdəm”
deməsinin səbəbi də buydu.
Qayıdaq açıq müzakirəyə. Artıq ağız
deyəni qulaq eşitmir. Elə bu yerdə Nənəm
dörd oktavalıq öskürəyini “si” pərdəsində
bitirib sinəsini boşaldır və
açıq-saçıq bir sual qoyur ortaya:
- Az, ay
beyınsaflar, bir maa da deyin görüm kim
kimi öpüf dayna?
Çox gərgin bir məqamda verilən bu sual dramatik məclisə
bir komediya havası gətirir. Surayya ciyərdən gələn
bir qəhqəhə ilə gülür, qalan arvadlar da ona
qoşulur.
- Nədaaz, nəyə
gülürsünüz, g...ü açılan var burda?
Arvadlar daha bərkdən qaqqıldaşır. Onda həmişə Nənəmə
istehza ilə yanaşıb onu ciddiyə almayan
Gülöyşə arvad az qala
qışqıra-qışqıra deyir:
- Ay arvad,
sən fil qulağında yatmısan?
- Harda,
harda?
- Az, sən
hələ bilmirsən ki, Səfərin qızı Knarikin
oğluynan gejə hamı yatandan soora həyətdə
öpüşürmüş.
Nənəm
sağ əlini dizinə çırpır:
- Buy, əvin
yıxılsın, fələk! Az, erməniynən
öpüşürmüş?
Arusyak qarışır söhbətə:
- Nə
olub, az, erməniyə, Zıynat xala?
- Az, ta
bunnan artıx noolajax?
Gülöyşə Robertdən
bıçaq əhvalatına görə yanıqlı
olduğundan fürsəti əldən vermir:
- Balam,
öpüşənnər qalıf qıraxda,
pıçaxlanan mənim oğlumdu.
-Elə
onu de! - Bu, Nənəşin replikasıdı.
-Onda dedim, indi də
deyirəm, qurban olsun Knarikə! Yoxsa Qəzənfərin
öz canıyçün basdırardım qoduxluğa o
qudurğan gədəni!
-
Çox sağ ol, Gülöyşə
xala! Yanında üzüqarayam! Allax
balalarını saxlasın, ağbirçəyimizsən.
- Təbii ki, bunu Knarik deyir.
Nənəm
gəlmək istəyən öskürəyini çətinliklə
boğmağa nail olur:
- Az, bəs
qızın dədəsi, o beqeyrət nə deyir buna?
Papam Nənəmə
təpinir:
- Az, sən
kiri, təzdən qan salma! Yeri get evə, sənin burda
tayın-tuşun yoxdu.
- Nədəə,
dustağam mən? Yoxsa dilim yoxdu
danışmağa?
-Niyə
yoxdu, var, özü də şah ərşinidi, amma ta
xalxın kişisinə beqeyrət nədi deyirsən bu qədər
adamın içində?
Nənəm
az qala qışqırır:
- Ə, bəs erməniynən öpüşən
qızın dədəsi beqeyrət dəyil nədi?
Hardansa,
kulisdən Səfərin artıq davakarlığına
yaxşı bələd olduğumuz həyasız və
söyüşcül, elə ona görə də
hamının, elə Papamın da çəkindiyi arvadı
Şeydanın hirsdən-hikkədən uzaq rahat,
arın-arxayın səsi gəlir:
- Səfərə
beqeyrət deyənin dədəsinin goruna s...m!
Həyətə
qəfil sükut çökür və handan-hana Papamın
nitqi özünə qayıdır:
- Aldınmı, az, payını?
Nənəm deyəsən birdən ayıldı. Söyüş ona gec çatmışdı.
-Kimdi az, s...mağa yer axtaran o qancıx? Çıxsın qabağıma cabaf versin görüm qızı gejələr həyət-bajada erməni dığasıynan öpüşən kişi beqeyrət dəyil bə nədi? Hələ demirəm ki...
Nənəm doğrudan da demədi, daha doğrusu, deyə bilmədi, amma qorxudan yox, Nənəm hələm-hələm qorxan arvad deyildi, öskürək bağladı arvadın gül ağzını. Həm də qəfildən elə bir hadisə baş verdi ki, çox sonralar da , Dəyirman həyəti onu həyəcansız danışa bilmirdi.
Bəli, Nənəm elə təzəcə öskürəyə başlayıb, Əlibaba Məmmədov demiş, “mi” pərdəsinə çatmışdı ki, bir az əvvəl Şeydanın səsi gələn tərəfdən qəfil qara-qışqırıq qopdu; qabaqda paltarı su içində ayağıyalın Almaz, dalınca bir az əvvəl səsi, indi özü çıxan əyriayaq raxit Şeyda, onun dalınca dördüncü sinfə qədər bir yerdə oxuduğum yoğun bədənli, qısa ayaqlı Gülər, onların da dalınca bir sürü müxtəlif yaşda, ölçüdə uşaq nəsə deyə-deyə, qışqıra-qışqıra həyətin ortasına yüyürdü. Yürüş iştirakçıları, deyəsən, Almazı saxlamaq, əlindən nəyisə almaq istəyirdilər, amma ona çata bilmirdilər.
Mən Almazın əlində kibrit qutusunu birdən gördüm. Qız qaça-qaça kibriti yandırmağa çalışırdı. Deyəsən tək mən deyildim kibriti görən. Arvadların qışqırığı ilə Almazın oda bələnməsi bir oldu. İndi bildim ki, onun üstü-başı sudan yox, nöyütdən islanıbmış.
Əli Əmirli
525-ci qəzet.- 2016.- 5 mart.- S.23.