Cildlərə sığmayan şair
FİKRƏT QOCANIN ONCİLDLİK
"SEÇİLMİŞ ƏSƏRLƏR"İNİ
VƏRƏQLƏYƏRKƏN... OXUYARKƏN...
Fikrət Qoca ən çox oxuduğum, ən çox bəyəndiyim,
haqqında ən çox yazdığım, ən
yaxşı bildiyim, həyatda ən çox müşahidə
etmək imkanım olan şairlərdən biridir. Və bütün bu “ən”lər
onun son illərdə ardıcıl işıq üzü
görən “Seçilmiş əsərlər”ini vərəqləyəndə,
səhifə-səhifə oxumağa başlayanda qəribə
duyğular oyadır məndə.
Başa düşürəm ki, sevdiyimiz şeirlər,
yaxud ümumiyyətlə, əsərlər zaman keçdikcə
bizim - sadiq oxucuların bioqrafiyasına çevrilir.
Elə bu on cildin bir çox səhifələrində o
qədər də uzaq olmayan keçmiş misra-misra
gözümün önünə gəlir, fərqli fikirlərə,
hisslərə yol açır. “Bu şeirdən “Yüz gözəl
sevgi şeiri” esselərimdə yazmışam”, “bu poema haqda tələbələrimə
danışmışam”, “bu povesti İlham və Fərizə
barədə yazanda oxumuşam”, “bu şeiri smslə göndərmişəm”,
“bu mahnını dənizə gedəndə dinləmişəm”,
“bu şeiri haqqında çəkilmiş verilişdə
oxumuşam”, “bunu yubiley yazısında istifadə eləmişəm”,
“bundan sevinmişəm, bundan kövrəlmişəm”...
Axı necə olur, necə olur ki, biz dünyaya gəlməzdən
neçə on illiklər öncə yazılmış əsərlər
bu cür həyatımızın tərkibinə
çevrilir, ruhumuza, ürəyimizə, düşüncəmizə
daxil olur və daha ordan çıxmır?! Sadəcə
söz kimi, ovqat kimi yox, hadisə kimi, bioqrafik məlumat kimi.
Bunun yaxşı ya pis, xeyirli ya ziyanlı
olmasını demək çətindi. Bəlkə
ziyanlı tərəfi odur ki, ədəbiyyat həyatımızın
içinə girdikcə o ilahi sehrini itirir, bir az
adi, gündəlik işə çevrilir. Amma Fikrət müəllimin
on cildliyini oxuduqca düşünürəm, həm çox
şey tanışdı, həm də yenidi... Hətta:
“Payız
gəldi,
Uçdu
getdi quşlar” - da...
Rəsul Rza haqlı imiş. İlk şeirləri çap olunan
Fikrət Qoca haqda uzaqgörənliklə: “F.Qocanın
şeirlərində məni sevindirən bu şeirlərin əksəriyyətində
olan qüvvətli yenilik hissidir... Onun ən yaxşı
şeirlərində mədəni bir şairin, ürəyi
sözlə dolu
bir insanın, nəyə isə məhəbbət,
nəyə isə nifrət aşılamaq istəyən bir
şairin səsini eşidirik”, - yazmışdı. Hələ barmaqla sayılacaq qədər şeiri
işıq üzü görən gənc şair barədə
deyilənləri bu gün on cildliyin müəllifi olan 80
yaşlı Fikrət Qoca haqda da olduğu kimi təkrar edə
bilərik. Və heç şübhəsiz ki, illər
öncə yazdıqlarının da, lap yaxın vaxtlarda qələmə
aldıqlarının da bu gün köhnəlməməsinə
səbəb Rəsul Rza söylədiyi “qüvvətli yenilik
hissidir”.
Fikrət Qoca yeni bir fəlsəfə uydurmaq, yeni bir dünya yaratmaq, yeni bir dil icad etmək, yaxud heç kəsə bəlli olmayan janrda yazmaq iddiasından uzaqdı. Yeni olan onun özünəməxsus tərzi, deyim forması, ifadə vasitəsidir. Dünya qədər qədim mövzuların, həyatın özü kimi köhnə dərdlərin, sevinclərin, ümid və təsəllinin yeni, orijinal şəkildə sözə çevrilməsidi şərt. Hansı vəzndə, hansı formada yazmasından asılı olmayaraq. Əsasən sərbəst vəzndə yazan Fikrət Qocanın şeirlərində nəzərə çarpan əsas cəhətlərdən biri çərçivəsizliyidir. Amma bu çərçivəsizliyin də “çərçivəsində” elə bir zərgər dəqiqliyi var ki... Forma və məzmun vəhdəti, ritm, temp, ahəng, musiqi, sanki şair bunların hamısını yüz ölçüb, bir biçib:
Çıq, çıq, çıq
Qalxsana,
Baxsana.
Göy açıq,
Yer açıq,
Yol açıq,
Yola çıx
Gül açıb.
“Saat danışır” şeirindən gətirdiyim bu misralarda saat əqrəbinin “yerişini” eşidirik, şairin də məqsədi vaxtı saatın “diliylə” danışdırmaqdı və bunun üçün seçdiyi orijinal forma şeirin uğurunun yarısıdı bəlkə də.
Amma birdən
saat elə gedə-gedə:
Səhərəcən üzünə-gözünə
yağıram... - deyir. Orijinallıq da elə bundadır, yeni fərqli
dildə, şəkildə bu cür dərin mətləbləri
ifadə etmək, çatdırmaq. Sözdən
tutub “Vals” oynamaq, sözə qoşulub saat kimi
“çıqhaçırıq” qaçmaq. Yəqin Fikrət
müəllimin sözlərinə saysız-hesabsız musiqilər
bəstələyən Emin Sabitoğlu, Ramiz Mirişli, Oqtay
Kazımi, Polad Bülbüloğlu, Ruhəngiz Qasımova,
Telman Hacıyev kimi bəstəkarları da məhz bu ritm, ahəng,
harmoniya cəlb edib. “Seçilmiş əsərlər”inin
bir cildi bütövlüklə mahnı mətnləri təşkil
edən (bura daxil edilməyənləri də var) şair bu
işi kollektiv əməyin məhsulu saysa da, daha
yüngül janr hesab etsə də, söz
yaradıcılığına deyil, musiqi
yaradıcılığına aid eləsə də dəxli
yoxdu. Dəqiq sayını bilmədiyi
yüzlərlə nəğmə millətin
zövqünün formalaşmasına, onlarda gözəl hisslərin
aşılanmasına xidmət edib.
Minlərlə
gənc uzaqda olan sevgilisindən ötrü darıxıb dənizə
baxıb, “bu dənizin gözü yaşlı sənsiz”
zümzümə edib öz-özünə, küsüşəndə
“məndən küsüb, özgələrdən halım
soruşanım mənim” dinləyib, qəmlənib, uzun gecələrdə
həsrət çəkib “gecə yaman uzundur” deyə gileylənib...
Bu siyahını uzatdıqca uzatmaq olar. Bir
sözlə bütün bu mahnılar, sözlər milli-mədəni
irsimizin ayrılmaz hissəsidir və onlar mənəvi tərbiyəmizdə
daha ciddi, daha dərin əsərlərdən az
rol oynamayıb.
Bu mətnləri bir yerə toplayan, bəzən
mahnıları dinləyib söz-söz köçürən,
redaktə edən şairin həyat yoldaşı Raya
xanımdı.
Raya xanımın bu nəcib hərəkəti
Fikrət Qocanı o qədər həyəcanlandırıb
ki, ona çəkdiyi zəhmətə görə minnətdarlığı
növbəti cilddə bildirib. O kiçik təşəkkür
mesajını oxuyanda gülümsəyirəm. Axı bu vəfa, etibar, minnətdarlıq hissi
yaxşı şeir yazmaq qədər (bəlkə ondan daha
artıq) mühümdür. Və görəsən
“dahiyəm, hamı mənə borcludu”, “millətə xidmət
eləmişəm, durun qulluğumda” düşüncəsiylə
yaşayanlar bu insani hissdən məhrum olduqlarının fərqindədirlərmi?
İllərdi ki, “Yaşa prezidentim, yaşa”
misrasını şairə irad tutanlar bunun sadəcə minnətdarlıq
duyğusu, vəfa borcu olduğunu anlamırlar yəni?
Çox
güman ki, sənətkara bu cür yanaşma (yəni həqiqi istedadın
varsa nankor da, yalançı da, tərbiyəsiz də ola bilərsən,
olmalısan da) xeyli dərəcədə Qərbin
günahıdı. Qərbdən, Avropadan bu
cür insanlıqdan uzaq nələrisə götürmək
nəyimizə lazım axı?!
Şəxsən məni sevdiyim şairin bu cür nəcib
hərəkəti, jesti çox təsirləndirmişdi. Axı zamanında Fikrət
Qoca ölümlə üz-üzə duranda, yaşamaq
şansı az qala sıfıra enəndə
Ulu öndər Heydər Əliyev ona kömək eləmiş,
şairin təbirincə desək, ikinci həyat vermişdi. Heydər Əliyev xəstələnəndə
şairin əlindən başqa nə gələ bilərdi
ki? Sadəcə şeir yazmaq,
sözüylə dayaq olmaq, “Yaşa prezidentim, yaşa” deyə
dua etmək. Və bunun özü də
Fikrət Qoca qələminin, şəxsiyyətinin
bütövlüyünü göstərir. Ümumiyyətlə, şair ölkəsində, vətənində
baş verən heç bir hadisəyə biganə qala bilmir.
Xoş olaylara, əlamətdar hadisələrə,
bir sözlə ölkəsinin uğuruna adi bir vətəndaş
kimi sevinir, adi olmayan şair kimi sözüylə reaksiya verir.
Məsələn, son illərdə Qəbələdə
Musiqi Festivalının keçirilməsinə, yaxud Bakıda
Birinci Avropa Olimpiadasının baş tutmasına, Azərbaycanın
dünyanın diqqət mərkəzində olmasına görə
fəxarət hissi keçirərək yazır:
İndi
Olimp Bakıdır...
Bu gün
bizə zillənib
Bu dünyanın baxışı.
Gənclərimiz
yağdırır
Qızıl, gümüş yağışı.
“Mehriban Əliyevaya açıq məktub” adlı
şeirdən gətirdiyim bu parça doğrudan da şairin
sevincini, qürurunu ifadə edən məktubdur. Bu cür
şeirlərin də şairin
yaradıcılığında öz yeri var. Zaman-zaman klassik
yazıçılarımız, şairlərimiz də necə
deyərlər gündəmə uyğun, günün nəbzini
tutan bu tipli əsərlər qələmə alıblar.
Bəlkə də belə əsərlər
poeziya hadisəsi olmaqdan daha çox tarixi hadisədir, ədəbiyyatın
yox, tarixin tərkibidir. Etiraf etməliyəm
ki, bu dəfə Fikrət müəllimin
yaradıcılığından görünən şair
xarakterində məni hər şeydən artıq məhz bu təsirləndirdi.
Hədsiz həssaslığı, bu gün, indi
baş verənlərə anındaca reaksiyası, hadisəni
işıq sürətiylə təkrarsız şeirə
çevirməsi. Həm də bunu
yaşının heç bir çağında “Cəsarəti
təqaüdə göndərmədən” etməsi. Çünki onun istəyi “əhalinin xalq,
torpağın vətən olmasıdı”. Ona görə
bu xalqın ən balaca uğuruna da, çox böyük dərdinə
də, vətənin xoşbəxt və bədbəxt
gününə də laqeyd ola bilmir. Axı bir vaxt “Uzaq Şərqin üfüqlərində
Cavidi xatırlayıb” “Neyləyim mən, əzizim?” - deyən şair böyük Hüseyn Cavidin nəşinin
vətənə gətirilməsinə necə biganə qala
bilərdi?!
Tale, nə
gözəl gündü bu,
sən
insafa gəldin,
Qırx
ildi gəlirdin, gəl a Cavid,
səfa
gəldin.
...Torpaq
gözün aydın,
Onu al
qoynuna, torpaq!
İtkin
düşən oğlun gəlir,
Yoldan gəlir, yorğun gəlir.
Ey ulu torpaq, ana torpaq.
Cavid gəlib
aç qoynunu,
Bas
bağrına torpaq!
Elə bircə “yoldan gəlir, yorğun gəlir”
misrası Cavidin taleyinin, “yorğunluğunun” ən sadə,
amma həm də ən təsirli ifadəsidir. Rəsul Rzanın
üzünə çəkilmiş ağ
mələfənin ağ yuxuya bəzədilməsi kimi:
Çarpayıda
Rəsul
Rzanın
Üzünə
çəkilib
Yüz
illərin
Ağ yuxusu.
Anar təslim
olub
Qısılıb
küncə...
Saçlarından,
üzündən
Axıb
tökülür
Neçə
ildi ürəyində
Gəzdirdiyi qorxusu.
Böyük bir nəsr, proza hadisəsidi bu şeir. Və bu
cür nəsr təfərrüatçılığını,
yaxud publisistik təsvirləri “tələb edən” səhnəni
belə təsirli şeirə çevirmək Fikrət Qoca qələmindən
ötrü sadədir. Ümumiyyətlə, onun müxtəlif
janrları poeziyaya, şeirə “təslim etmək”
bacarığı xeyli maraqlı,
düşündürücü məqamdı:
Yayda
yaylağa gedərlər,
Səni sürdülər arana.
Yayın
cırcırama çağı
Mən də duz basdım yarana.
Xəyalın
dağlar qoynunda
Yarpızlı
dovğa bulayır,
Dağda
sənsiz qalan yurdun
Axşam qurd olub ulayır.
Evi viran
qalan bacım,
Gözü-könlü
talan bacım...
Ala
gözə bulud qonur,
Göz
yaşın qəlbinə axır
Sinəni
yandırır, yaxır
Yuxarıdan
Tanrı baxır
“Yaxan
düymələ, düymələ”
“Qaçqın
gəlinə” adlı şeirdən gətirdiyim parçada
informasiya var - Qaçqınların Aran rayonlarımıza
köçürülməsi, xarakter var - kədərini gizlədən,
göz yaşı səssiz-səssiz qəlbinə axan
qadının xarakteri, kino var - viran qalmış obalarda, kimsəsiz
qalmış dağlarda tənha qurdun ulaması, folklor var -
“yaxan düymələ, düymələ”... Amma daha çox
şairin dərdi, ürəyini parçalayan
ağrısı var. Bu
şeirin yaranmasına da səbəb həmin
ağrıdı. Torpaq itkisindən doğan dərddi,
sağalmayan yaradı. Qarabağ dərdi,
Xocalı faciəsi, Qanlı yanvar bəlasıdı.
Xatirələrindən
birində Fikrət Qoca yazır:
“1986-cı ildə özüm çox ağır bir cərrahiyyə
əməliyyatına məruz qaldım. Ayılanda
gördüm səsim heç yoxdu.
Verilən narkozun təsiri dörd ilə yaxın məndən tam getməmişdi. Yaddaşım qırılırdı, özümü yuxulu kimi hiss edirdim. Bir müddət şeir yaza bilmədim. Çünki mən şeir yazanda misraları bərkdən oxuyub, dinləyib, rəndələyib, düzəldib yazırdım. İndi isə səsim çıxmırdı. Misraların dadını, tamını hiss eləmirdim. Başımı qatmaq üçün “Taleyin ağır taleyi” adlı romanımı yazdım. Məni o xəstəlikdən və əməliyyatdan sonra ayağa qaldıran xalq hərəkatı oldu. Azadlıq meydanı, insanların birliyi, 1989-cu il ərəfəsində yenidən şeirə qayıtdım. Özü də bu şeirlə:
Daş olarmış nadan səsi,
Sındı könlümün şüşəsi.
Qanmaz başlara düşəsi,
Allahın bir daşı yoxdu.
“Dərd əlindən çıxdım dağa”
Dərdim var dərd dağlamağa.
Görürəm ey...ağlamağa,
Gözlərimin yaşı yoxdu.
Bu günlərdən ötən yazıq,
Yetməyən vay! Yetən yazıq.
Neyləsin bu vətən yazıq,
Başçımızın başı yoxdu”.
Ağır əməliyyatdan sonra səsini itirmiş şair millətin həyatında baş verən bu hadisəyə laqeyd ola bilməzdi, susa bilməzdi bu haqda. Necə ki, sonralar da susmadı. 90-cı ildə 20 Yanvar faciəsi olanda da, Xocalı qətliamı törədiləndə də, Qarabağ torpaqları itiriləndə də. Və bu cür, millətin ağır günlərini də şairin şüarsız, pafossuz yazması yüksək peşəkarlığın, əsl sənətin göstəricisidir. Məsələn, Qanlı Yanvar müsibətinə Fikrət Qoca İlham və Fərizənin taleyindən, onların dünyasından baxır və “Bütün yollar ölümdən keçir” adlı povest yazır onlar haqda. Bu məqamda bir haşiyəyə çıxıb vurğulayım ki, ara-sıra nəsr əsərləri də yazan, bəzi mövzuları nəsrlə söyləməyi uyğun bilən Fikrət müəllim şair Fikrət Qocadan “ayrılmır” heç vaxt. Və bu da onun nəsrinin fərqli xüsusiyyətlərindən biridir. Elə haqqında danışdığım “Bütün yollar ölümdən keçir” povestində Fərizənin intiharqabağı düşüncələrini bu cür yazır:
“Bu gecə mütləq getməliyik, oğlum, mütləq, sonra gec olar. Nə yaxşı sən varsanmış, oğlum. Yoxsa lap tək qalardım. Sən mənə arxasan, mənə qüvvət verirsən. Sən mənim balaca İlhamımsan, sən mənim nurumsan, sən mənim içimdə yanan işığımsan, oğlum!”
Fərizə bətnindəki iki aylıq, hələ heç formalaşmamış, ağzının, burnunun, qulağının yeri bilinməyən körpəsiylə danışır bu yerdə. İlhamı, yarını, sevdiyini itirmiş qadının tənhalığını, dərdini ayrı necə yazmaq olardı ki? Məgər bu kiçik “dialoq” şeir deyilmi? Şeirdi! Dərd şeirə sığmayanda poemalar yazıb Fikrət Qoca.
“Seçilmiş əsərləri”nin altıncı cildini bütünlüklə poemaları təşkil edir. Və burada ən müxtəlif mövzuda poemalar arasında “Şəhidlər Xiyabanı” diqqətimi çəkir. Yenə də böyük faciəyə bir nəfərin duyğularından yanaşması, “ucsuz-bucaqsız” xiyabandan bir qəbrin iri plana gətirilməsi... Bütün faciənin Milli qəhrəman Çingiz Mustafayev kamerasıyla göstərilməsi:
Körpə bir qız qar üstündə
Donub zərif çiçək kimi,
Çingizin qolları üstə
Ölüm
yuxusunda yatır
Balaca bir mələk kimi.
Yerlə
göyün arasında
Dəhşət
içrə Çingiz çaşıb
Tale kimi, fələk kimi.
Yerlə göyün arasında çaşıb qalan təkcə
Çingiz deyil, həm də Fikrət Qocadı. Axı millətin
başına gətirilmiş o müsibətlərdən necə
çaşmayasan, başını necə itirməyəsən?!
İlham yalın əliylə, Çingiz
kamerası ilə, Fikrət Qoca qələmi ilə
çıxış yolu axtarır. Əslində ən
böyük vətəndaşlıq mövqeyi budur. Sənə aid olanı, bacardığını etmək,
əlindən gələni əsirgəməmək.
Lazım gələndə şeirlə döyüşmək,
yara sarımaq, lazım gələndə yanan alovun
üstünə su səpmək, yaxud da şeirlə dua etmək,
dua pıçıldamaq:
İki
yerə parçalanıb
Bədəndə
ruh, ürəkdə can.
Bir yol Azərbaycan
desəm,
Mən yarımcan görünürəm.
Ona
görə gərək deyək:
Azərbaycan,
Azərbaycan! - deyən
şair nə qədər emosional, nə qədər çılğındırsa,
Düşmənə
insaf ver, bizə səbr ver
Qəddar böyüməsin balalarımız... - deyəndə o qədər təmkinli, sakitdir. Bunların hamısı Fikrət Qocaya aiddi və bir şairə bütün bu hisslər palitrası hava, su kimi lazımdı, amma daha mühüm olan bunların oxuculara aşılanmasıdır.
On cildliyi birincidən onuncuya, onuncudan birinciyə vərəq-vərəq
elədim. Amma demək olar ki, heç bir şeirin altında
tarix görmədim. Yəni hətta
hansısa konkret tarixlərlə bağlı əsərlərini
də Fikrət Qoca bütün zamanlar üçün
yazır. Və şeirin mövzusuna gələndə o
heç vaxt “Yaş o yaş deyil” demir. Yəni
hər yaşda, hər mövzuda şeirlər yazır.
Anar Fikrət Qoca haqqında məqaləsində bu məsələni
belə şərh edir:
“Şair,
doğrudan da şairdirsə - onun 16 yaşında
yazdığı şeirlə 46, yaxud 66 yaşında
yazdığı şeirlər arasında, şübhəsiz,
fərq olacaq. Amma bu fərq - əzəmətli,
qollu-budaqlı, qocaman bir ağacın yarpaqlarıyla həmin
ağacın çox illər, bəlkə çox əsrlər
bundan qabaqkı pöhrə vaxtının yarpaqları
arasında fərq kimidir.
Ağac həmin ağacdır - qovaq, çinar, əbrişim
ya palıd. Yaşı başqadır, görkəmi
başqadır, illərinin sayı fərqlidir. Şair həmin şairdir, poeziyasının alın
qırışları çoxalıb, şeirinin başı
ağarıb, amma şairin sifəti həmin sifətdir.
Əsl şairin üzü olur, bu üz dəyişir,
amma başqalaşmır, ya başqalaşır, amma
yadlaşmır”.
Doğrudan da zaman Fikrət Qoca ilə oxucusu
arasındakı doğmalığa, yaxınlığa, məhrəmliyə
ziyan edə bilmir, bilməz də. Çünki şairin oxucusuna sevgisi,
ona xoş duyğular, fərqli hisslər yaşatmaq arzusu bitib
tükənmir:
Mənim
xoş üzə
ehtiyacım var,
Sənin xoş sözə.
Götür
kitabımı,
Oturaq
üz-üzə!
Son dərəcə təvazökar insan olan Fikrət
müəllim şeirinin “xoş söz” olduğunu dəqiq
bilir, həm də oxucusunun onunla üz-üzə xoş,
mehriban simada oturacağını da təxmin edir. Nə
yazdığının, necə yazdığının fərqindədi
çünki. Sadəcə bu barədə
danışmır, aləmə car çəkmir, bunu bizlərə,
oxuculara, tənqidçilərə buraxır. Bu on cildlik ədəbi xəzinəni hərtərəfli
açmaq, araşdırmaq isə asan deyil. Bunun üçün bəlkə elə on cild həcmində
yazmaq, yazmaq, düşünmək, sonra yenə yazmaq
lazımdı. Amma bəlkə də məsələ
həcmdə deyil. Çünki o “Dörd addım” kimi
uzun fəlsəfi poema ilə də, iki misra ilə də eyni
dərəcədə təsirləndirə,
düşündürə bilər adamı:
Gülün gözəlliyi öz qatilidi,
Bülbülün qəfəsi şirin dilidi.
Yaxud,
İntihar fərarilikdir...
Və ya,
Bəs bu namərdlər hardandı?
Bu cür aforizmə çevrilmiş misralarıyla, cavabını tapmaq mümkün olmayan suallarıyla Fikrət Qoca bir neçə on illiklərdir ki, düşündürür oxucusunu. Və “Seçilmiş əsərləri”ni oxuduqca onu da aydın başa düşürdüm ki, onun nə özü, nə də qələmi fasilə vermək fikrindədi. Çünki Fikrət Qoca baxdığı yerdən görünən dünya, onun duyduğu ağrı, yaşadığı sevinc, sevgi, həsrət, ayrılıq, kədər cildlərə sığmır. Qələm də yazmağa imkan verirsə...
... Fikrət müəllimin sevgi lirikasından, şeirlərində qadını ilahiləşdirməsindən, dünya dərdlərini sadələşdirməsindən, əsərləriylə yaşamağa həvəs yaratmasından daha öncəki esselərimdə, məqalələrimdə yazmışam. Və essemin əvvəlində vurğuladığım kimi bütün bu yazılar mənim bioqrafiyamın işıqlı, sevincli səhifələrinə çevrilib. Amma oncildliyi ardıcıl oxuyanda şairin əsərlərinin mövzu genişliyi, dərinliyi, çoxqatlılığı bir daha düşündürür məni. Fikrət Qoca nəğməkardı! Fikrət Qoca sevgi şairidi! Fikrət Qoca vətən şairidi! Filosof şairdi! Dostdu! Kişidi! Ziyalıdı!
... Və bütün “çox”ları on cildə sığışdırmaqdan daha böyük möcüzə bir ömrə sığışdırmaqdı!
PƏRVİN
525-ci qəzet.- 2016.- 19 mart.- S.10-11