Mələk timsallı

Uca Tanrının verdiyi ömür payını ləyaqətlə yaşayan, həyatının mənasını nəcib, xeyirxah əməllərdə görən, xalqımıza xas yüksək əxlaqı, mənəvi dəyərləri parlaq xarakterində cəmləşdirən Tükəzban Cahangirova sözün həqiqi mənasında cənüb bölgəsinin nur çeşməsidir.

Bu işıqlı insanın öz vətəninə, millətinə bəxş etdiyi töhfələr sonsuzdur. O, təhsil və elm sahəsində fəaliyyəti olan dəyərli alim, nəcib ziyalıdır. Keçdiyi şərəfli həyat yolunun hər günü öz şirinliyi ilə qəlblərə sevinc və xoşbəxtlik gətirir. Eşqi, muradı yaratmaq olan yurdumuzun alim qızının büllur kimi saf əməlləri dünyanı gözəlləşdirməklə ürəklərdə xalqın səadəti naminə sevgi göyərdir. Elə yaxşılıq etmək Tükəzban xanımın ömür qismətinə Böyük Yaradan tərəfindən pay düşüb. Günəş nəfəsi aləmi isitdikcə, özü də kamillik və mənəviyyat zirvəsində daha parlaq görünür.

Zəka məşəli ilə həyatlara şölə saçan Tükəzban Cahangirova Lənkəran şəhərindəndir . O dil və ədəbiyyat müəllimi kimi fəaliyyətinə Lənkəran şəhər 6 saylı məktəbdə başlayıb. İlk gündən müəllim adı ona hər şeydən uca və əziz olub. Qəlbinin odunu şagirdlərin mənəvi dünyasına hopdura-hopdura millətin gələcəyi üçün çalışır. Tez də geniş dünyagörüşü, biliyi, gözəl əxlaqı, sözə və elmə olan sevgisi ona uğur qazandırır. Ən əsası dərs adlı sənət əsərində özünün bənzərsiz dəst-xəttini yaradır. Qəlbində gəzdirdiyi həyat eşqi, yaşatmaq, yaratmaq həvəsi də hər an onu müşayiət edir. Bir müddət məktəbdə şagirdlərin təlim-tərbiyəsi ilə məşğul olur. O rahatlığı , həyatın gözəlliyini şagirdlərinin uğurlarında, yeniyetmələrinin firavanlığında axtarır. Bir qayda olaraq geniş, çoxcəhətli pedaqoji fəaliyyəti, sənətinə vurğunluğu Tükəzban Cahangirova həmişə nüfuz gətirir. Və yurdu üçün qəlbində günəş odu yaşadır ki, dünyanın gözəlliklərini görməklə ömrümüz, günümüz mənalı olsun. Bütün bunlara görə Lənkəran elində böyük də , kiçik də onun zəngin daxili aləminə , davranış və ünsiyyət mədəniyyətinə, vətəninə olan sonsuz məhəbbətinə heyran kəsilir. Tükəzban xanımın ürəyindən keçən bütün işlər el-obasına , millətinə mənəviyyatına olan sevgidən başlayır. Yəni həyatda nə edirsə sevgi ilə edir.

T .Cahangirova 1999-cu ildə Pedaqoji elmlər namizədi elmi dərəcəsini alıb. Lənkəranın ilk alim qadınıdır. Parlaq istedad böyük ürək sahibi olan Tükəzban xanım 15 il Lənkəran Pedaqoji Texnikumunda çalışıb. Həmişə də tələbələrinə qayğı göstərib, arxa durub, uğurlarına sevinməklə onları xoşbəxt gələcəyə həvəsləndirib. Bəli, Tükəzban xanımın elmə sonsuz məhəbbəti , doğma yurduna qəlbən bağlılığı , xalqına təmənnasız xidməti texnikumda ondan layiqli nişanələr saxlayır. İndinin özündə də onun qoyduğu yadigarlardan yetərincə faydalanan müəllimlər çoxdur.

T.Cahangirova 2006-cı ildən Lənkəran Dövlət Universitetindədir. Vətənpərvər, milli qeyrət hissinə malik ziyalı, öz millətinin təəssübkeşi olduğuna görə burada böyük hörmət sahibidir. Həyatının mənasına nəcib xeyirxah əməllərdə taparaq bütövlükdə xalqının tərəqqisinə, maariflənməsinə əvəzsiz töhfələr verir. Universitetdə baş müəllim, pedaqogika üzrə fəlsəfə doktoru kimi elmi fəaliyyəti çox dəyərlidir. Fəqət, bəşər övladına xas yüksək mənəvi əxlaqi dəyərlər onun xarakterinə, ruhuna elə hopub ki, hər əməli paklıq, saflıq dünyasından xəbər verir. Xalq üçün çalışmaq, yazıb-yaratmaq insanlara səmimi xidmət etmək istəyi Tükəzban xanımın iş dünyasından mənəvi aləmindən qaynaqlanır.

Tanınmış alim, pedaqoq, şair Tükəzban Cahangirova hər an fəaliyyətdədir. Məqamında öz sözünü deməyi bacarır. Sözə , elmə olan sevgisi onu həmişə uzaq edir. O , elə insandır ki, onunla ünsiyyətdə olmaq adama zövq verir. Həyatda çox alicənab, mehriban, sakit təbiətli, xeyirxah bir Azərbaycan xanımıdır. Onun haqqında bir şeirdə gözəl deyilir:

Qadınlıq nümunəsi, bizim səcdə yerimiz,

Ey gözəllər gözəli, əziz müəllimimiz.

Doğma bir ana kimi qəlbimizdə qor oldun,

Üzünüzdəki gülüş yolumuzda nur oldu.

Onu da deyim ki, pedaqogika elminin bütün incəliyinə dərindən bələd olan, ensiklopedik bilik, dərin zəka sahibi olan Tükəzban Cahangirova 2008-ci ildə fəxri professor adina layiq görülüb. O, iki kitabın ,1 dərs vəsaiti, ali məktəblər üçün pedaqogika proqramının, 5 metodik tövsiyənin, onlarla elmi məqalənin müəllifidir. Hazırda yeni dərslik üzərində çalışır. Tükəzban xanımın son aylar çapdan çıxmış dəyərli dərs vəsaiti olan kitabı "Müasir təlim texnologiyaları" adlanır. Vəsaitdə təhsilin orta, orta ixtisas və ali məktəb pillələrində müasir təlim texnologiyalarının tətbiqi imkanlardan geniş bəhs edilir. Əsasən ali məktəblərdə "Müasir təlim texnologiyaları" adlı seçmə kursları aparan və bu tipli fənlərdən dərs keçən müəllimlər üçün nəzərdə tutulub. Kitabdan müəllimlər, tələbələr, dissertantlar, doktorantlar, pedaqoji və psixoloji sahədə tədqiqat aparanlar istifadə edə bilərlər.

Ümumiyyətlə, dərslik yazmaq çətin işdir. Müəllifdən dərin bilik, yüksək təfəkkür, böyük pedaqoji ustalıq tələb edir. Tükəzban xanım alim-pedaqoq olmaqla bərabər, həm də həssas psixoloq olduğu üçün bu işi layiqincə görə bilir.

Tükəzban xanımın bədii yaradıcılığı da zəngindir. Öz yaradıcılığında klassiklərə daim istinad edir. Odur ki , hər bir poetik əsəri oxucu qəlbinə tez yol tapa bilir. Millilik, dövlətçilik, vətənpərvərlik, doğma el-obaya sahiblik əsərlərinin ruhu və mahiyyətidir. Şeirləri, müxtəlif səpgili oçerkləri tez-tez mətbuatda dərc olunur. Bu da onu göstərir ki, xalqın tərəqqisi üçün Tükəzban xanım öz bacarığı, qabiliyyəti, eyni zamanda dərin zəkası ilə çox şeyə qadirdir. Gördükləri də ona xüsusi hörmət qazandırır. O, Yazıçılar Birliyinin, Azərbaycan Psixoloqlar Assosiasiyasının, Amerika " SORUS " proqramının, İstanbulda Azərbaycan Kültür Cəmiyyətinin üzvüdür.

Tükəzban xanım layiqli vətəndaş, nəcib ziyalı kimi bütün sevgilərə layiqdir. Tərbiyə etdiyi üç oğlu da öz xeyirxah, savab əməlləri ilə ananın adını ucaldırlar. Tükəzban xanım bütün işlərdə insanlara işıq tutur. Bu da çox gözəl ömürdür.

Zəfər ORUCOĞLU

Azərbaycan Jurnalistlər Birliyinin üzvü

525-ci qəzet.- 2016.- 29 mart.- S.8