Dinləsin bəşər

90 yaşlı böyük şair Söhrab Tahirin şərəfinə

Köksünə iki-üç cahan yerləşər,

Düşməz yaxınına nə zülmət, nə şər.

Dinləsin planet,

Dinləsin bəşər

Vətən nəğməsini Söhrab Tahirin.

Millət ayılsa da hələ yatan var,

Halal el malını çalıb-çatan var.

Fəqət dəfinədən üstün tutan var,

Bircə kəlməsini Söhrab Tahirin.

Gah göyə qalxırıq, gah enirik biz,

Bəzən dayaqlara söykənirik biz.

Ömür kitabından öyrənirik biz,

"Yaxşılıq" dərsini Söhrab Tahirin.

Gec-gec fərəhlənib, tez-tez qəm yeyir,

Zili-zil çağırır, bəmə-bəm deyir;

Bütün uşaqlara Nəsibəm deyir,

Gördüm nəvəsini Söhrab Tahirin.

Verir fərmanını vaxt yavaş-yavaş,

Quzeyə xoş gəlir güneyli qardaş...

Bütövlük əsrinin hər günündə kaş,

Eşidək səsini Söhrab Tahirin!

Oqtay Rza

əməkdar müəllim

525-ci qəzet.- 2016.- 31 mart.- S.8.