Elnarə Abdullayevanın üç günlük konserti uğurla yekunlaşıb

Əməkdar artist Elnarə Abdullayevanın Heydər Əliyev Sarayında keçirilən üç günlük konserti başa çatıb.

Axşam.az-ın məlumatına görə, xanəndə gecəni muğamla açıb. Tamaşaçıları salamlayan E.Abdullayeva onu tək qoymayanlara təşəkkürünü bildirib:

“Qonaqlar, gələn ayaqlarınız var olsun. Allah sizə dəyməsin. Konsertimi heç bir sponsor təşkil etməyib. Mən sponsorum olan xalqıma minnətdaram. Sizi verən Allaha qurban olum. Yaxşı ki, varsınız. Hamınız xoş gəlmisiniz”.

İfası ilə yanaşı maraqlı söhbətləriylədə yadda qalan E.Abdullayeva konsertin 3 gün davam etməsinin səbəbini açıqlayıb:

“Burada xüsusi diqqətə ehtiyacı olan özəl qonaqlarımız var. Buraya qocalar evinin sakinlərini, qaziləri və şəhid ailələrini toplamışıq. Canımız dövlətimizə, millətimizə fəda olsun. İnsanlarımıza göstərdiyi qayğıya görə dövlətimizin rəhbərinə minnətdaram”.

E.Abdullayevanın konserti qalmaqalsız ötüşməyib. Özünü təşkilatçılardan biri kimi təqdim edən Akif adlı şəxs mətbuat nümayəndələrinə qarşı hörmətsizlik edib. O, fotokameraların içəri keçirilməsinə və çəkiliş edilməsinə icazə verməyib. Jurnalistlər gizli şəkildə fotoaparatları içəri keçirməyə çalışıblar.

525-ci qəzet.- 2016.- 31 mart.- S.7.