Daşkənddəki festivalda Azərbaycan da təmsil olunub

Daşkənddəki ingilisdilli Beynəlxalq Vestminster Universitetində ənənəvi olaraq “Xalqların mədəniyyəti və adət-ənənələri” adlı festival keçirilib.

"Report"un məlumatına görə, tədbirdə ölkəni Azərbaycanın Özbəkistandakı səfirliyinin nəzdindəki Heydər Əliyev adına Mədəniyyət Mərkəzi təmsil edib.

Azərbaycan üçün ayrılmış otaqda ölkənin mədəniyyətinə dair stend, Qarabağ geyimləri, suvenirlər, Azərbaycanın müxtəlif regionlarında toxunmuş xalçalar nümayiş etdirilib.

Nümayiş etdirilən videoçarxda Azərbaycanın füsunkar mədəniyyəti, turizm gözəllikləri göstərilib.

Tədbirin bədii hissəsində Daşkənddəki Azərbaycan Mədəniyyət Mərkəzinin nəzdindəki "Azərbaycan qızları" rəqs ansamblı milli rəqslərimizi ifa ediblər.

525-ci qəzet.- 2016.- 3 may.- S.7.