İran yazıçısı Mustafa Məstur Bakıda oxucuları ilə görüşdü

Bu gün AMEA-nın Mərkəzi Elmi Kitabxanasında tanınmış İran yazıçısı Mustafa Məsturla görüş olub.

Görüş çərçivəsində ədibin ATV kanalı və "Parlaq İmzalar" Nəşriyyatının ortaq layihəsi üzrə işıq üzü görən "Tanrının ay üzündən öp" romanının imza günü də keçirilib.

Xatırladaq ki, Ariz Tarverdiyevin tərcüməsində, Seyfəddin Hüseynlinin redaktəsilə nəşr olunan roman bundan əvvəl "Dünya ədəbiyyatı" dərgisində çap edilib.

Mədəniyyət və Turizm Nazirliyi, ATV Kanalı, Azərbaycan Yazıçılar Birliyinin Bədii Tərcümə və Ədəbi Əlaqələr Mərkəzi, "Parlaq İmzalar" Nəşriyyatı və AMEA Mərkəzi Elmi Kitabxanasının dəstəyi ilə keçirilən tədbirdə yazıçı "Qloballaşma dövründə ədəbiyyat" mövzusunda mühazirə oxuyub, həmçinin iştirakçıların suallarını cavablandırıb.

Görüşdə Bədii Tərcümə və Ədəbi Əlaqələr Mərkəzinin sədri Səlim Babullaoğlu, “Parlaq İmzalar” Nəşriyyatının direktoru Nurman Tarıq “Dünya ədəbiyyatı” jurnalının baş redaktoru Seyfəddin Hüseynli, şairlər Qismət Rüstəmov, Fərid Hüseyn, tənqidçi Cavanşir Yusifli, oxucular və media nümayəndələri iştirak ediblər.

Çıxışlarda Mustafa Məsturun yaradıcılığından, Azərbaycan-İran ədəbi-mədəni əlaqələrindən söhbət açılıb.

Cavid QƏDİR

525-ci qəzet.-2016.-23 noyabr.-S.7.