Gəncədə BMT-nin iqtisadi forumu başladı

Ölkəmiz dünyanın iqtisadi və humanitar inkişafı məsələlərinə dair mötəbər beynəlxalq tədbirlərə ev sahibliyi etməkdə davam edir.

Respublikamızın ikinci şəhəri Gəncədə BMT-nin Mərkəzi Asiya ölkələrinin iqtisadiyyatları üçün Xüsusi Proqramının "Əməkdaşlıq vasitəsilə davamlı inkişaf məqsədlərinin həyata keçirilməsinin gücləndirilməsi" mövzusunda 2016-cı il üzrə İqtisadi Forumu öz işinə başlayıb.

Forumda müxtəlif ölkələri təmsil edən mərkəzi və yerli icra hakimiyyəti orqanlarının, beynəlxalq təşkilatların, yerli və xarici şirkətlərin 100 nəfərədək nümayəndəsi iştirak edir.

Forumun açılışında ölkəmizin BMT ilə əlaqələrinin yüksək səviyyədə olduğu, Azərbaycanın BMT-nin ixtisaslaşmış qurumları ilə fəal əməkdaşlıq etdiyi, BMT-nin bir çox təşəbbüs və proqramlarına qoşulduğu bildirilib. Qeyd edilib ki, 2002-ci ildən BMT-nin Mərkəzi Asiya ölkələrinin iqtisadiyyatları üçün Xüsusi Proqramına (SPECA) üzv seçilən Azərbaycan digər iştirakçı ölkələrlə ikitərəfli və çoxtərəfli əməkdaşlıq əlaqələri qurub, proqrama üzv ölkələrlə iqtisadi-ticarət əlaqələrini daha da genişləndirib. Həmçinin İqtisadi Forum çərçivəsində təşkil edilən sessiyalarda müzakirəsi nəzərdə tutulan məsələlər barədə də məlumat verilib.

BMT-nin davamlı inkişaf məsələləri üzrə regional qurumlarının nümayəndələri və ekspertləri BMT-nin dünyada davamlı inkişaf məqsədlərinə nail olmaq üçün üzv dövlətlərlə fəal əməkaşlıq etdiyini bildirərək, Azərbaycanın BMT-nin fəal üzvlərindən olduğunu vurğulayıblar. Həmçinin Azərbaycanın qısa müddətdə iqtisadi və sosial sahələrdə böyük uğurlar qazandığı, BMT-nin təşəbbüslərinin Azərbaycanda həyata keçirilən müxtəlif proqramlarda öz əksini tapmasının böyük əhəmiyyət kəsb etdiyi qeyd edilib, qurumun yerli nümayəndəliyi ilə işgüzar əlaqələrin yüksək səviyyədə olduğu bildirilib.

"Dünyanın regionları bir sıra problemlərlə - iqtisadiyyat, təhlükəsizlik, iqlim, ekologiya, demoqrafiya və digər məsələlərlə bağlı çətinliklərlə üzləşir. Ona görə də ölkələrin bu istiqamətlərdə birgə fəaliyyət göstərməsi zəruridir. Elə SPECA-nın da məramı bununla bağlıdır. Gəncədəki illik forumun yüksək səviyyədə təşkil olunması buradakı işgüzar ab-havanı tamamlayır.Bunun üçün Azərbaycan hökumətinə və yerli hakimiyyət qurumlarına minnətdarıq"-deyə, BMT-nin Avropa regionu üzrə İqtisadi Komissiyasının icraçı katibi Kristian Fris Baxa bildirib.

BMT-nin Asiya və Sakit okean regionu üzrə İqtisadi və Sosial Komissiyasının (UNESCAP) icraçı katibinin Davamlı inkişaf üzrə müavini Kaveh Zahidi forumda müzakirə olunan məsələlərin həlli baxımından ölkəmizdəki durumu yüksək qiymətləndirib. O, 2000-ci ildə yoxsulluğun əhalinin 47 faizinə sirayət etdiyi Azərbaycanda 15 il ərzində bu rəqəmin 10 dəfə azaldılmasına nail olunduğunu da təqdirəlayiq hal kimi xarakterizə edib.

"Davamlı inkişaf məsələlərinin həyata keçirilməsində Azərbaycandan çox şey öyrənmək olar. Azərbaycanda bu istiqamətdə nazirliklərarası sura da yaradılıb. Məsələlərin konseptual həlli üzrə bu cür təcrübədən digər ölkələr faydalı şəkildə yararlana bilərlər"-deyə, K. Zahidi qeyd edib.

Sonra İqtisadi Forum sessiyalarla işinə davam edib. "Dayanıqlı inkişaf məqsədlərinin uğurla həyata keçirilməsi üçün milli səviyyədə görülməli olan işlər, strategiyalar" mövzusunda təşkil edilmiş sessiyada çıxış edən iqtisadiyyat nazirinin müavini Sahil Babayev qeyd edib ki, ölkəmizdə iqtisadi, sosial, ekoloji sahələrdə qarşıya qoyulmuş hədəflərə nail olmaq məqsədilə 2012-ci ildən "Azərbaycan - 2020: Gələcəyə baxış" İnkişaf Konsepsiyası qəbul olunub. Konsepsiyanın əhatə etdiyi əsas sahələr vətəndaş cəmiyyətinin ölkənin siyasi və iqtisadi məsələlərində rolunun artırılması, insan hüquq və azadlıqlarının təmin edilməsi, iqtisadiyyatın strukturunun təkmilləşdirilməsi və qeyri-neft sektorunun inkişafı, İKT-nin inkişafı ilə informasiya cəmiyyətinə keçidin təmin olunması və s. istiqamətlərindən ibarətdir.

Forum noyabrın 23-də "Bərabərlik, inklyuzivlik və sosial ədalət üçün inkişafın tarazlaşdırılması" və " SPECA-nın qiymətləndirilməsi" sessiyaları ilə işini davam etdirəcək. Sabah həmçinin, BMT-nin Mərkəzi Asiya ölkələrinin iqtisadiyyatları üçün Xüsusi Proqramının (SPECA) Rəhbərlər Şurasının 11-ci iclası keçiriləcək. Şuranın təşkilati məsələlərinə baxılacaq, növbəti il üçün sədr ölkə və Şuranın 12-ci iclasına dair qərar qəbul olunacaq. İşgüzar görüşün yekunu kimi, "Əməkdaşlıq vasitəsilə davamlı inkişaf məqsədlərinin həyata keçirilməsinin gücləndirilməsi" Gəncə Bəyannaməsi qəbul ediləcək.

Zakir Muradov

Gəncə

525-ci qəzet.-2016.-23 noyabr.-S.6.