Dahi sənətkara sonsuz
ehtiramla...
Heydər Əliyev 18 sentyabrın Azərbaycan xalqının
milli bayramı, mədəniyyət, musiqi
bayramı olduğunu vaxtilə xüsusi vurğulayıb.
Milli professional bəstəkarlıq
məktəbimizin banisi
dahi Üzeyir Hacıbəyli 1885-ci ilin
18 sentyabrında, Azərbaycanın
dilbər guşələrindən
biri olan Ağcabədidə dünyaya
göz açıb və bu gün
məhz onun adıyla əlamətdardır. Bu mühüm tarix bizim möhtəşəm
bayram günümüzdür.
Opera sənətimizin, opera teatrımızın yaradıcısı
olan Üzeyir Hacıbəyli bütün
ömrünü xalqının
mədəniyyətinin, musiqisinin
inkişafına həsr
edib.
O, Azərbaycan mədəniyyətinin
nadir simalarındandır. Üzeyir Hacıbəyli
bəstəkar, musiqişünas-alim,
publisist, müəllim,
jurnalist, ictimai xadim kimi çoxşaxəli
fəaliyyəti ilə
tariximizdə əvəzsiz
rol oynayıb.
Azərbaycan musiqisinin inkişafı naminə gözəl əsərlər - operalar,
operettalar, romanslar, müxtəlif simfonik nümunələr, mahnılar
yaradıb. Opera və
musiqili komediyamızda
şah əsərlər
müəllifi Üzeyir
Hacıbəylinin ədəbi
irsinin böyük və dəyərli bir hissəsini də məhz onun publisistikası təşkil edir. Hər zaman yüksək amallarla yaşayan və bu amallar
uğrunda mübarizə
aparan böyük bəstəkar insanın arzuları ilə əxlaqını üzvi
vəhdətdə götürürdü.
Üzeyir Hacıbəyli məqalələr,
felyetonlar vasitəsilə
mühüm məsələləri
oxucuların nəzərinə
çatdırmağı özünə
borc bilirdi. Onun sənətlə bağlı
yazdığı məqalələrin
əsas mövzu və ideyasını - Azərbaycan musiqisinin inkişafı problemləri
təşkil edirdi.
Üzeyir Hacıbəylinin musiqi yaradıcılığında və onun nəzəri
fəaliyyətində xəlqilik,
millilik kimi məsələlər daim
ön plana çəkilib. Xəlqilik problemi dahi bəstəkarın estetik
konsepsiyasının təməlidir.
Üzeyir Hacıbəyli özünün
bəstəkarlıq və
elmi-pedaqoji fəaliyyəti
boyu ardıcıl olaraq musiqidə xəlqiliyin əsas prinsiplərini qoruyub, bu problemə xüsusi məqalələr
həsr edib. 1945-ci ildə Üzeyir
Hacıbəylinin "Azərbaycan
xalq musiqisinin əsasları" adlı
fundamental elmi əsəri
nəşr edilib.
Bu əsərlə bir daha onun
musiqişünas-alim kimi
mükəmməl fəaliyyətini
yaxından izləyə
bilirik. Üzeyir Hacıbəyli təkcə
öz dövrü üçün deyil, hər dövrün nəbzini tuta biləcək əbədiyaşar
əsərlər ərsəyə
gətirib.
Milli musiqi mədəniyyətimizdə yeni
sahənin - Avropa anlamlı peşəkar bəstəkarlıq məktəbinin,
musiqi təhsili sisteminin, çağdaş
musiqişünaslıq üzrə
elmi-estetik baxışların
yaranması, inkişaf
etməsi məhz Üzeyir bəy Hacıbəylinin adı ilə bağlıdır.
Dahi bəstəkar musiqi təhsilimizin təşəkkülü
üçün gənc
kadrlar yetişdirir, bu sahədə irəliləyişlərin yaranmasına
can atırdı .
Üzeyir
Hacıbəyli fikirlərinin
birində söyləmişdi:
"İlk gözəl
nəğmə və
rəqs melodiyalarının
yaradıcısı xalq
özüdür. Bizə bu
gün nümunə olan xalq nəğmələri
əsrlərdən bəri
işlənə-işlənə yaradılmış və
yalnız bizim zəmanəmizdə həqiqi
bədii formalar almışdır. Bəstəkarlar
öz əsərlərini
yaradarkən unutmamalıdırlar
ki, bizim yaradıcılığımızı xalq qiymətləndirir. Çünki xalq yalnız
yaradıcı, yalnız
bəstəkar deyildir.
Xalq eyni zamanda misilsiz
tənqidçi və
musiqi əsərlərinin
ən yaxşı
"istehlakçısıdır".
Xalq musiqi əsərlərinə
diqqətlə yanaşır,
yaxşını pisdən
seçir".
Dahi bəstəkarın
yaşadığı hər
gün milli musiqimiz üçün böyük bir fayda, töhfə idi. Onun barəsində nə
qədər bəhs edilsə də, saysız məqalələr
yazılsa da, bütün bunlar dahi bəstəkarın əvəzsiz xidmətlərinin
qarşısında kiçikdir.
Dahi Üzeyir
Hacıbəylinin ruhu
qarşısında baş
əyir, sonsuz ehtiramımı ifadə edirəm. Professionallıq yolunda addımlayan
bir insan kimi Üzeyir Hacıbəylinin yolunu layiqincə davam etdirməyi özümə
müqəddəs bir
borc, şərəf bilirəm.
Aysel
KƏRİM
525-ci qəzet.- 2016.- 20 sentyabr.-
S.8.