“Uşaqlıqdan yaddaşıma yüklənmiş
poetik mənzərəni
canlandırıram”
ŞAHNAZ ŞAHİNLƏ İLHAM QƏHRƏMANIN SÖHBƏTİ
Şahnaz Şahin Sabirabadda yaşayır. İmzası oxuculara çoxdan tanış olan şairin indiyə qədər 3 şeir və bir publisistika kitabı nəşr olunub. Azərbaycan Yazıçılar Birliyinin üzvüdür.
Şeirlərinə mahnılar bəstələnib.
Onunla söhbətimi
oxuculara təqdim edirəm.
- Şahnaz xanım,
bir qədər ədəbi taleyinizdən
danışın.
- 1997-ci ildən şeirlərim mətbuatda çap olunur. Bir dəfə yerli
“Suqovuşan”qəzetinin redaksiyasına
getmişdim, baş redaktor da dəyişmişdi,
əvvəlki soyuq havalar isinmişdi. Demək olar, qolumdan tutub zorla Pakizə
xanımın kabinetinə
gətirdilər. Şeirləri
verdim az
keçmiş “Tanış
olun: Şahnaz Nəsirova” başlığı
altında şeirlərim
dərc olundu. Respublika mətbuatına çıxışım isə
bir az
çətin oldu. Əvvəl “525-ci qəzet”,
“Rezonans” məni doğmaları kimi qəbul etdilər. Rəşad Məcidlə görüşdüm,
qayğı, diqqət
gördüm ondan.
Sonra “Ədalət” qəzeti də səhifələrində
mənim yaradıcılığıma
səxavətlə yer
ayırdı. Ardıcıl hər üç qəzetdə çap olundum. “Kirpi”də
isə satirik şeirlərlə təmsil
olundum. İllər
sonra “Ədəbiyyat qəzeti”nin qapısını döydüm
və burada da şeirlərim çap olunur. Arzu arzudan doğur deyirlər, mən şeirlərimə mahnı
ömrü vermək istədim. Bu istək məni Tahir Əkbər, Nailə və Hikmət Mirməmmədlilərlə,
Rauf Məmmədovla görüşdürdü. Nəticələr çox uğurlu
oldu. 2005-ci ildə ilk kitabım nəşr olundu, daha sonra ikinci,
üçüncu və
hələlik dördüncü.
Amma heç birinə təqdimat eləmədim.
İndi
internet, sosial şəbəkələr,
müxtəlif saytlar,
çox saylı qəzetlər var, çap olunmaq da, tanınmaq da dəfələrlə asandı.
-Sizin şeirlərinizə
daha çox sevgi mövzusu hakimdir desək yanılmarıq - ayrılıq,
həsrət, təklik,
boşluğa yağan
yağış, yandırılan
quş lələyi...
Burda reallıqla şair fantaziyasının sərhədləri
arasında məsafə
çoxdurmu?
-Mənim taleyimdə ikisi bir taleyi
bölüşür, reallıq
və fantaziya - reallıq yoxdursa, fantaziya işə yaramır məncə. Dünya sevgi üzərində qərar tutub və demək sevgi varsa, ayrılıq
da, həsrət də qaçılmazdır.
Ardıyca da digər təbii duyğular gəlir - təklik, göz yaşları, nağıllara,
möcüzələrə inam hissi,düşdüyü
çətinlikdən çıxış
yollarının aranması...
Şairdə altıncı
duyğu həmişə
ayıq olmalıdı
- gördüyü, eşitdiyi
başqa, “ürəyinə
daman” isə tamam ayrı ola
bilər. Reallıqla fantaziyanın qarışığından
gozəl poetik nümunələr yaratmaq
olur. Qalır özünün və özgə yaşantıları kı,
bunları da şair qanından keçirərək özəlləşdirir
və deməli bütün yaradıcılığı
boyu öz ağrılarını, əzablarını,
yaşadığı sevgi
və həsrətləri,
ayrılıq və iztirabları yazır.
-Şeirlərinizi oxuyanda
şəlləyində körpəsi,
əlində milçə
canlıq, corab toxuyan nənələrimiz
yada düşür. Burda sizin
ədəbi taleyinizlə
bir bağlılıq
varmı?
-Bəli, var. Mən evin sonbeşiyi olmuşam. Uşaqlığım anamın bir
qədər yaşlı
dövrünə düşüb.
Atamı
erkən itirmişəm,
anam evin həm kişisi, həm də qadını olub. Ana mövzusu çox
həssas yerimdi.
Şeirə həvəs də
ondan gəlir. Baxmayaraq ki, adının başdan ikicə hərfini yaza bilirdi, amma sinədəftər
idi, laylalar, şeirlər dilinin əzbəri idi, coxlu nağıllar danışırdı. Sovet hökumətinin
qadağaları dövründə
belə evimizdə
Quran kitabı görmüşəm.
Atam müqəddəs kitabı
xüsusi avazla oxuyarmış. O zamanın
insanları indikilərdən
daha saf, daha duru olublar.
Yaddaşımda ömürlük
qalan xatirələr
var. O vaxt televizor yox idi, axşam
qadınlar həyət
və cöl işlərindən evə
yığılanda corab,
canlıq toxuyar, ağ parça
üzərində saplarla
müxtəlif tikmələr,
rəsmlər işləyərdilər.
Anam isə bu işin
ustası idi. Əyrilmiş yun sapları
özü təbii boyalarla boyayar, hana qurub xalça,
kilim toxuyardı.
Ərişin üstünə
yumru top kimi sallanan rəngbərəng
sap yumaqları fikrimi çox çəkirdi, saplar gözümdə yollara çevrilər, uzandıqca uzanardı. Vaxt tapan kimi anamın
yanında oturub toxumağı öyrənməyə
çalışırdım. Onun toxuduğu xalca və kilimi indi də evimizdə
saxlayıram. Anam məni
mahnı ilə oxşayar, şeirlə dindirərdi. Bəzən mənə
elə gəlir ki, bu gün
uşaqlıqdan yaddaşıma
yüklənən poetik
mənzərəni canlandırıram.
Yadıma Qabriel Qarsia
Markes düşdü.
Deməli, hələ
ilk gənclik çağlarında
yaşayış yerini
iş axtarmaq üçün dəyişən
gələcək dünya
şöhrətli yazıçı
anası ilə görüşərkən sanki
yuxudan oyanır, hiss edir ki, o qoyub
gəldiyi məkana qayıtmalıdı, taleyi
onu məhz orda, bütün uşaqlıq xatirələrinin
yaşadığı yerdə
gözləyir. “Polkovnikə məktub yoxdur” və digər nəhəng əsərləri yazıçı
öz taleyindən ilmə tutaraq yazmışdır. Mən ixtisasca
həkim olduğumdan bilirəm ki, insanda bir çox
bacarıq genetik kodlaşdırılır, hər
hansı qabiliyyət illərlə gizli qala bilər, amma bir təkan
- məsələn, sarsıntı,
ayrılıq, həyəcan
bu gizlini aşkara çıxarır.
- Şahnaz xanım,
regionda yaşayan qələm adamına ölkənin ədəbi
mənzərəsi necə
görünür?
-Bir ədəbi mühit var mənə görə, ana mühit. Amma çox təəssüf
ki, təbiət kimi bu aləmi
də kirləndirənlər
yox deyil. Gərəksiz qovğalar, özündən
razılıq, özünü
dahi sayıb başqasını kiçiltməyə
çalışmaq var. Yazarların
çoxu bir-birinə
qısqanclıqla yanaşır.
Gərək belə olmasın.
Hər çiçəyin
öz ətri olduğu kimi hər şairin də öz dünyası var. Bəzən
əlinə yenicə
qələm alan
biri tanınmış
yazıçını lağa
qoyur, eynən şou aləmində olduğu kimi gündəmə gəlmək
üsulu sayır bunu, amma onun
bu hərəkəti gendən ikrah hissi doğurur. Ümumiyyətlə insanlarda
sevgi qıtlığı
hiss edirəm və bol təkəbbür.
-Hər şairin öz yaradıcı siması var. Bu mənada sizin yaşadığınız
məkan simanızda -
yaradıcılığınızda əksini tapırmı?
-Şair məkana
sığmaz ki. Amma yaşadığım,
doğulub böyüdüyüm
yerləri və bu yerlərin ömrümdə iz buraxan insanlarını qələmin ucundan, ürəyimin içindən
keçirmişəm - mənəvi
borcum kimi. Mən mənəvi saflığı,təmizlik
və nəcibliyi o sadə insanlardan almışam. Hər kiçik uğuruma
sevinən insanlardan nümunə götürmüşəm.
Bu gün nəyim
varsa, o saf insanlara borcluyam.
-Bu gün qələm adamlarının hamısının
ortaq yaralı yeri gəncliyin bizim dövrlə müqayisədə kitaba marağının azalmasıdır.
Yerlərdə bu hadisəni
əks istiqamətə
döndərmək üçün
hansı işlərin
görülməsini vacib
hesab edərdiniz?
-Elədir yeni texnologiya - telefon, internet bir sıra keyfiyyətləri
üstələyib. Kitaba marağı
geridə qoyub. İctimai yerlərdə hərdən
kitab oxuyan gəncləri görmək
məni çox sevindirir. Biz rayonda kitaba marağı artırmaq üçün səyyar
kitabxanalar təşkil
edirik, bir növ kitabı insanların görüşünə
aparırıq, bu çox vacibdir. Təsəvvür edin adamlar hər yerə gedir, çayxanaya, parka -
biz də səyyar kitabxanamızı gətirib
qururuq onların gözünün qabağında,
nəticəsi olur.
Bu işdə kütləvi informasiya vasitələrinin də rolu böyükdür, gərək maraqlı layihələr işlənsin,
bu gün efir məkanını əsasən şou-proqramlar
zəbt edib. Bir nüansı qeyd edim, kitab enerji
paylayır, əlinin bir toxunuşu ilə dəyişirsən.
Lazım
gəldikdə qeydlər
apara bilirsən, kompyuter kimi şüası yoxdu, adamı yormur. Ümumiyyətlə kitabın hər
nə qədər alternativi olsa belə o, gələcəyə
daşınan elm mənbəyidir,
dəbdən düşməyi
müvəqqətidir.
-Sizə görə ölkə mətbuatında
ədəbi-tənqidi yazılar
regiondakı yaradıcı
qüvvələri özündə
ehtiva edə bilirmi?
-Real danışsaq çox az... O əvvəllər
olub lap bizdən də
əvvəl, kimsə hansısa istedada arxa ola, yol
göstərə. Bir dəfə Xalq şairi Sabir Rüstəmxanlı rayona
gəlmişdi, qonağımız oldu, ona kitabımı verdim. Dedi oxuyub fikrimi
yazaram. Aradan xeyli keçəndən sonra zəng etdim, kitab haqqında gözəl fikirlər söylədi,
şeirlərimin səlis, aydın dillə
yazıldığını, qüsursuz olduğunu vurğuladı, amma
vaxtının az olduğundan
haqqımda yazı yaza bilməyəcəyini
söylədi. Sonra Barat Vüsal,
bu yaxınlarda hörmətli filoloq alim Vaqif
Yusifli kitabım haqqında yazdılar, onlara təşəkkür edirəm, sağ olsunlar dəyərli
fikirləri üçün. Əsəd
Cahangirə, Zakir Məmmədə
hörmətim var, dəyərli insan, gözəl ziyalıdırlar. Mən
sınan, inciyən, maneələrdən qorxan
adam deyiləm və hər hansı
çətinlik məni daha da gücləndirir. O baxımdan özüm görmədiyim qayğını
ehtiyacı olan istedadlı yazardan
əsirgəmirəm. Bu pilləkəndi,
hər kəs onun birinci
pilləsində dayanıb haçansa, bunu unutmaq olmaz.
İlham
QƏHRƏMAN
525-ci qəzet.- 2016.- 24 sentyabr.- S.15.