Rumıniya səfiri Azərbaycan Milli Kitabxanasında

Rumıniyanın Azərbaycandakı səfiri Daniel Kristian Çiobanu və ikinci katib Luminita Çiobanu dekabrın 30-da Milli Kitabxanada olublar.

Milli Kitabxananın direktoru professor Kərim Tahirov səfirə Milli Kitabxana haqqında qısa məlumat verərək, dünyanın 70-dən artıq kitabxanası və ayrı-ayrı təşkilatları ilə beynəlxalq kitab mübadiləsi aparıldığını, 30-dan artıq ölkənin kitabxanaları ilə ikitərəfli qarşılıqlı əməkdaşlıq barədə Memorandumun imzalandığını bildirib.

Direktor təəssüflə qeyd edib ki, Rumıniya Milli Kitabxanası ilə əlaqə yaratmağa çalışsa da, cəhdlər uğursuz olub. O, səfirdən Milli Kitabxanalar arasında əlaqə yaratmağa yardımçı olmağı xahiş edib.

Daniel Kristian Çiobanu Azərbaycanda işləməkdən məmnunluğunu bildirib, Rumıniya ilə Azərbaycanın sıx, dostluq əlaqələri olduğunu nəzərə çatdırıb. O, Azərbaycan Milli Kitabxanasının həmişə xoş sədasını eşitdiyini söyləyib və Milli Kitabxana ilə əməkdaşlıq layihəsi təklif edib. Rumıniya Mədəniyyət günləri çərçivəsində Milli Kitabxanada "Rumın ədəbiyyatı gecəsi" keçirilməsi təklifini irəli sürüb. Milli Kitabxana rəhbərliyi tərəfindən bəyənilib qəbul edilən layihəyə əsasən, ədəbiyyat gecəsinin yanvar ayının 15-də keçirilməsi qərara alınıb.

Görüşdə xatirə şəkli çəkilib, qonağa "Fotoalbom" (Azərbaycan, ingilis və rus dillərində), Azərbaycanın xəritəsi, Azərbaycan xalçaları ilə bağlı nəşr təqdim olunub.

525-ci qəzet.- 2016.- 6 yanvar.- S.7.