Şeirin əfsunu

Yusif Nəğməkarın 60 yaşına

Otuz ildən artıqdır ki, istedadlı şair Yusif Nəğməkarı şəxsən tanıyıram.

Hər şey onun şeirlərinə vurğunluğumdan başlayırdı. Oxuyub gördüm ki, onun şeirləri axıcılığına, rəvanlığına, tez əzbərlənib yadda qaldığına görə biz bəstəkarlar üçün, necə deyərlər, göydəndüşmədir. Üstəlik o sadə, oynaq şeirlərin ağır fikir, məntiq yükü və məqbul hadisədir. Bu fərqli keyfiyyətlərinin nəticəsidir ki, onunla onlarla mahnı yazmışıq.

Yusif mənim üçün vaxtaşırı xüsusi nəğmə mətnləri yazır. Əslində isə onun əksər şeirləri məxsusi nəğmə mətnləri kimi yaranır.

Onun şeirlərinin bir özəlliyi və ən başlıcası da budur ki, o şeirlərdəki misralar, ayrı-ayrı ifadələr obrazlı dillə ifadəsini tapır:

Yaşıl otlar göyərir

Saralmış izlərindən.

Ay saçı topuğundan,

Ay çiçək dizlərindən.

(“Öpərdim gözlərindən”)

Bu bir bənddəki gözəlliyə diqqət yetirəndə, görün, xəyalımızda gözəlin təsviri necə ustalıqla canlandırılmışdır! “Yaşıl otların saralmış izlərdən göyərməsi “saralmaq”la, “göyərmək” kimi əks qütblü, əks mənalı sözlərin təzadlarından və bu təzadların ümumi vəhdətindən doğan poetik bir fikirdir.

Başqa şairlərdən fərqli olaraq Yusif müəllimin musiqi duyumu da güclüdür. Elə bunun nəticəsidir ki, o mövzuya görə musiqinin ritmini, bölgüsünü, xarakterini də müəyyən etməyi bacarır.

Xalqımızın gözəl şairi, mənim yaxın dostum Yusif Nəğməkarla onlarla mahnı yazmışıq. Bu şairlə çox işləməyimin səbəbi onun şeirlərinin mahnıya çox yaxın olmasıdır. Belə ki, mən onun sözlərinə mahnı yazarkən heç bir çətinlik çəkmirəm.

Bizim yazdığımız mahnıları Azərbaycanın bir çox müğənniləri - Ağadadaş Ağayev, Nazpəri Dostəliyeva, Yusif Mustafayev, Sabir Əliyev, Almaz Saraylı və adını çəkmədiyim bir çox başqa müğənnilər ifa ediblər.

Ümumiyyətlə, Yusiflə işləmək mənim üçün çox rahatdır. Onun yazdığı şeirləri mən bir dəfə oxuyan kimi dərhal yadımda qalır. Mən bu sözləri deyərkən yadıma bir əhvalat düşdü: Bir dəfə Ağadadaş Ağayevlə studiyada “Öpərdim gözlərindən” adlı mahnını lentə aldırırdıq. Birdən Ağadadaş mənə dedi ki, bəs sözlər yadımdan çıxıb evdə qalıb. Nə qədər fikirləşdi, mahnının sözləri bütövlükdə yadına düşmədi. Doğrusu, mahnı təzə yazıldığından mən də həmin an hamısını yadıma sala bilmədim. Birdən dedim ki, qardaş, mənə on-on beş dəqiqə vaxt ver, görüm yadıma sala bilirəmmi? Mən bir tərəfə çəkilib, sakit bir guşədə əyləşərək qarşıma qələm-kağız qoydum və mahnını bəstələdiyim anları xatırladım. Birdən-birə sanki möcüzə baş verdi. Şeir bütünlüklə yadıma düşdu. Sözlərini köçürüb, verdim Ağadadaşa. Dedim: - indi buyur, oxu. Mahnını yazdıq.

Axşam gəldim evə, baxdım ki, heç bir sözdə səhv etməmişəm. Hər şey öz yerində. Çox sevindim həmin vaxt.

Biz Yusiflə vətənə aid bir neçə mahnı yazmışıq. “Qarabağım” insanların qəlbində həmişə yaşayan mahnılardandır.

Türk dünyasının əvəzolunmaz müğənnisi İbrahim Tatlısəs bir neçə il bundan əvvəl Bakıya konsertə gəlmişdi. Biz onun gələcəyini bilirdik və əvvəlcədən ona bir mahnı yazmaq haqqında fikirləşirdik. Belə də oldu. O gəlməmişdən mahnını yazdıq və lentə aldıq. Konsertdən sonra mahnını İbrahim bəyə təqdim etdik. O, mahnını dinlədi və çox xoşuna gəldi. Bizə öz təşəkkürünü bildirdi.

Aradan bir müddət keçəndən sonra biz həmin mahnını efirdən dinlədik.

Biz hazırda bir neçə mahnı üzərində işləyirik. Qarabağa, şəhidlər mövzusuna, insana, həyata sevgi hissləri oyadan mahnılara daha çox üstünlük veririk.

Ümumiyyətlə, çox sevindirici hal kimi onu qeyd etmək istəyirəm ki, Yusif Nəğməkarın sözlərinə istər mənim, istərsə də başqa bəstəkarların yazdıqları mahnılar təkcə Azərbaycanın yox, dünya xalqları dinləyicilərinin də rəğbətini qazanmaqdadır.

Nəğmə gənclik, gözəllik, qəlbin genişliyi, hisslərin, sözlərin əfsunu deməkdir, sağlamlıq və həyat eşqi, düşüncə və müdriklik deməkdir; Xoşbəxtlikdən bunların hamısı Yusifdə cəmlənir.

Mən əziz qardaşım Yusif Nəğməkarı 60 yaşının tamam olması münasibətilə təbrik edirəm, ona cansağlığı və uzun ömür arzulayıram. Bir də ondan həmişəki kimi lətif, kövrək, doyumsuz, həm də fəlsəfi (çünki nəğmələrin də öz fəlsəfəsi var) mövzulu yeni mahnılar üçün şeirlər gözləyirəm.

Razim PAŞAYEV

bəstəkar

525-ci qəzet.- 2016.- 16 yanvar.- S.30