Mübarək

(Bəstəkar Tahir Əkbərin 70 yaşına)

Salamlayıb yüz mahalı, bölgəni,

Xəbər yayır xəyalımın yelkəni;

Bir ustadsan, yaratdığın incilər

Şərqə, Qərbə tanıtdırır ölkəni.

Zəng, teleqram, namə min-min: "Mübarək!",

Tahir Əkbər, yubileyin mübarək!

"Ya Rəbb", "Amin"... lal dindirən, dil açan,

Nəğmələrin eldən-elə yol açan.

Əsgərlərə ərməğanın hərbi marş.

Sevgi, vüsal bağımızda gül açan

Xoş məramın, saf diləyin mübarək,

Tahir Əkbər, yubileyin mübarək!

Yaz günümüz, sərt qışımız - xatirə,

Çiçək, alqış yağışımız - xatirə;

Sən Bakının, mən kəndimin adından -

Muğandakı çıxışımız - xatirə.

Ad, mükafat... daha nəyin mübarək?

Tahir Əkbər, yubileyin mübarək!

Geniş köksün gah dolub, gah boşalıb,

Mahnıların cüt qanadlı quş olub;

Gəncə, Zəncan, Qars, İstanbul, Qahirə...

Ay həzərat! Milyonlara qoşulub

Dönə-dönə siz də deyin: "Mübarək!",

Tahir Əkbər, yubileyin mübarək!

Oqtay Rza

əməkdar müəllim

525-ci qəzet.- 2016.- 28 yanvar.- S.7.