Lənkəranda səhər

     

Dəniz çağlayırdı duman içində,

Dalğalar uzaqda köpüklənirdi.

Əsgərlər nizamla ötüb keçəndə

Yaşıl Lənkərana nur ələnirdi.

 

Al-əlvan çiçəklər görürdüm ki, mən,

Orda da, burda da işıq saçırdı.

Sanki planetin hər tərəfindən

Bizim qarşımızda güllər açırdı.

 

Çiçəklər cürbəcür - qırmızı, sarı,

Heyva, nar gülünü hələ demirəm.

Sözlə demək olmur bütün bunları,

Rəssamlıq etməyi bilsəydim qəm.

 

Xoş ətir tutmuşdu yaşıl şəhəri,

Coşurdum baxdıqca çiçəyə, gülə.

Qızıl Lənkəranın gözəl səhəri

Fikrimdə, ruhumda nur saçır hələ.

 

Vurğunu dilimə çevirəndə mən

 

Evimə işıqlı bir bahar gəlir,

Dəyişir dünyada hər şey təzədən.

Qəlbimdə bir şirin nəğmə yüksəlir

Vurğunu dilimə çevirəndə mən.

 

Əzəmətli Şuşa durur önümdə,

Dağların döşündə nəğmə yuvası.

Külək şıltaqlıqla ötür yanımdan,

Dolur ciyərimə təmiz havası.

 

Yenə çinarlar verib səs-səsə,

Arpaçay suyundan içirəm yenə.

Yenə duyğular gəlib həvəsə,

Cumuram suların dərinliyinə.

 

Görürəm bu yerlər mənə tanışdır,

Surəti hələ qalıb gözümdə.

Sərhəddə keşikçi bir vaxt qalmışdım,

Çapmışdım atımı Muğan düzündə.

 

Qəlbimə baharlı bir gənclik gəlir,

Yer tapa bilmirəm sonsuz sevincdən.

Dəyişir gözümdə hər şey təzədən

Vurğunu dilimə çevirəndə mən.

 

Zastava

 

Günəşdən ağarmış

yovşanlı qayaların qaşında,

Dağların döşündə

Əzəmətli bir qala kimi

qalxır zastava.

Bax, orda - Muğanda,

Sədaqətli köhlən atlar bir anda

Bizi aparırlar səhərlərin aydınlığına,

Gecələrin qaranlığına.

Hər qarış yerinə bələd olduğum

Otlaqlardan daha səs-səmir gəlmir.

Yenə zastava girir yuxuma,

Görürəm sərhəddə keşik çəkirəm.

 

Petro QORETSKI

(Ukrayna)

 

525-ci qəzet.- 2017.- 5 aprel.- S. 7.