İrfan Çiftçi: "Bu sərgi ilə bağlı gözləntilərimiz doğruldu" - Fotolar

"16-cı Beynəlxalq Turizm və Səyahətlər Sərgisi Türkiyə-Azərbaycan mədəni əlaqələrinin inkişafında müsbət rol oynadı"

Bugünlərdə - aprelin 6-dan 8-dək Bakı Expo Mərkəzində 16-cı Beynəlxalq Turizm və Səyahətlər Sərgisi (AİTF-2017) keçirilib. Beynəlxalq miqyasda turizmlə bağlı mühüm tədbirlərdən olan bu sərgi bir çox cəhətlərilə diqqətəlayiq hesab edilir.

Sərginin təşkilatçılarından olan Türkiyənin Azərbaycandakı səfirliyinin mədəniyyət müşaviri, şair və alim İrfan Çiftçi mədəniyyətin xalqlar arasındakı əlaqələrin möhkəmlənməsinə bilavasitə təsir etdiyini, bu sərginin iki qardaş ölkənin mədəni əlaqələrinin inkişafında müsbət rol oynadığını vurğulayıb: "Mən Bakıya təxminən bir ay əvvəl gələrək çalışmağa başladım. Bir il idi ki, bizim Müşavirliyin fəaliyyəti dayanmışdı.

Bu sərgi işlərimizi canlandırmaq üçün bir vəsilə oldu

Çünki bu, Azərbaycanda keçirilən ən böyük sərgidir. Sərgi çərçivəsində kiçik bir festival da təşkil etdik. Biz təkcə turizmin deyil, Türkiyə mədəniyyətinin təbliğini də həyata keçirmək istəyirdik. Bacardığımız qədər buna nail olduğumuzu düşünürəm. Sərgimizin ilk açılış gününə cənab prezident İlham Əliyev və vitse-prezident Mehriban xanım Əliyeva da qatıldılar, öz dəstəklərini bizdən əsirgəmədilər. Ümumilikdə götürsək, bu sərgi ilə bağlı gözləntilərimiz doğruldu".

İrfan Çiftçi sərgidə iştirak edəcək sənətçilərin Bakıya dəvət olunması və buradakı fəaliyyəti haqqında deyib: "Sənətçilərin hamısını mən dəvət etdim. Bu da bizim sahədə bir ilkdir. Hörmətli Mədəniyyət nazirimizə əvvəlcədən bu haqda məlumat verdik və onun da razılığını aldıq. Sərgi boyunca yanılmadığımızı da gördük. Teatr oyunlarımız Azərbaycan xalq rəqsləri ilə başlayıb, Türkiyənin xalq rəqslərinə çevrilir. Məncə biz mədəniyyətin, sənətin dəyişdirici, yaxınlaşdırıcı gücündən maksimum istifadə etməyə çalışmalıyıq".

İ.Çiftçi sərgiyə gənclərin marağını artırmaq üçün internetdə, sosial şəbəkələrdə reklamın gücləndirilməsinin vacibliyini vurğulayıb.

Mədəniyyət müşaviri əlaqələrin daha da gücləndirilməsi üçün təkcə Bakını deyil, bütün Azərbaycanı əhatə edəcək fəaliyyət planları hazırladıqlarını qeyd edib. Vaxt məhdudiyyətindən türkiyəli qonaqlara Bakını geniş tanıtmaq imkanı tapmadığını deyən İ.Çiftçi sadəcə şəhərin qədim hissəsini gəzdiklərini, sakinlərin teatr sənətçisi Mehmet Ustaya, ney ifaçısı Burcu Karadağa və digər qonaqlara diqqətindən məmnun qaldıqlarını bildirib.

Sərgiyə dəvət olunmuş qonaqlardan tanınmış teatr və kino aktyoru, "Zeytiburnu Gösteri Sanatları Merkezi"nın (Teatr Sənət Mərkəzi) baş rejissoru Mehmet Usta Azərbaycana səfərindən və bu kimi tədbirlərdə iştirakdan böyük məmnunluq duyduğunu deyib: "Bu, Azərbaycana ikinci gəlişimdir. On il öncə bir çəkilişlə əlaqədar ilk gəlişimdə Bakıda cəmi bir gün qala bildim. Ona görə də indiki gəlişimi ilk kimi qəbul edirəm. Son illər Bakı çox dəyişib, müasirləşib.

Azərbaycan bizə mənəvi baxımdan çox doğmadır

İnsanları çox mehriban, qonaqpərvərdir. Ona görə də özümü evimdəki kimi rahat hiss etdim".

Aktyor azərbaycanlı izləyicilərdən gördüyü münasibətdən də söz açıb: "Sosial şəbəkə vasitəsilə Azərbaycandan məni axtarıb tapan, əlaqə quran, öz sevgisini bildirən insanlar olurdu. Çünki gördüyümüz işlər, çəkildiyimiz filmlər Türkiyə qədər burada da izlənilir və sevilir. Keçən gün çox gözəl bir hadisə baş verdi. Getdiyimiz bir yerdə musiqi qrupunun bir üzvü həyəcanla bizə yaxınlaşdı, illər öncə çəkdiyimiz "Mommo kız kardeşim" filmini xatırladı və həmin filmə görə, çox sevdiyi gitarasına Mommo adını qoyduğunu dedi. Bu, əlbəttə, çox gözəl və qürurverici bir hissdir. Könül istərdi ki, işlə bağlı deyil, bir tətil zamanında gəlib, buranı daha dərindən tanımaq fürsəti əldə edək".

Rejissor rəhbəri olduğu teatr haqqında söz açaraq, səhnəciklərində Azərbaycanla bağlı mövzulara yer verilməsindən də bəhs edib.

Azərbaycan kino və teatr sənəti haqqındakı fikirlərini bölüşən M.Usta mərhum rejissor Tofiq İsmayılovu da xatırlayıb: "Buradakı rejissor və aktyorlarla yaxından tanış olma fürsəti tapmamışam, ancaq az zamanda tanıdıqlarım oldu. Ondan əvvəl isə deyim ki, bizim tələbəlik zamanlarımızdan bir böyüyümüz, müəllimimiz vardı - mərhum Tofiq İsmayılov. Zamanında onun tələbəsi olma şansı qazandım, iki il dərs aldım. Onu hər zaman rəhmətlə anıram".

Qeyd edək ki, Mehmet Ustanın səhnələşdirdiyi, Ramil Balakin, Engin Kut, Asalet Durmuş və Hilal Doyranın rol aldıqları "Perdeli Karagöz" və "Kavuklu-Pişekar" tamaşaları sərgi iştirakçılarına böyük zövq verib. Mahir ney ifaçısı Burcu Karadağın rəhbərlik etdiyi "Karadağ Musiqi Ansamblı"nın konserti də rəğbət doğurub. Qonaqlar bu sevgi və diqqətdən məmnun olduqlarını, Azərbaycana ilk gəlişlərinin unudulmaz xatirəyə çevrildiyini dilə gətiriblər: "Buraya gələndən sonra anladıq ki, "bir millət, iki dövlət" ifadəsi tam yerində deyilmiş bir ifadədir. Səhnəciklərimizə insanların marağı çox yüksəkdir.

Qayıdanda Türkiyədəki dostlarımıza mütləq Azərbaycana gəlməyi məsləhət görəcəyik"

Osmanlı və müasir türk üslubunda Ebru sənəti ustaları Ömər Faruk Dere ilə Emine Derenin hazırladıqları rəsmlər tədbirə xüsusi rəng qatıb. Onlar da Azərbaycana ilk gəlişləri olduğunu qeyd ediblər.

Türkiyədən XVI Beynəlxalq Turizm və Səyahətlər Sərgisinə qatılan "İstanbul shopping fest"in direktoru Hicran Özbük sərginin hər iki ölkənin turizm və mədəniyyəti üçün əlverişli imkanlar yaratdığını deyib. H.Özbük ilk dəfə qonaq olduğu Azərbaycan haqqında fikirlərini bölüşüb: "Azərbaycanla Türkiyənin kökləri o qədər dərinə dayanır ki, biz buraya gələrkən özümüzü heç də qərib hiss etmədik. Eyni mədəniyyətə sahibik, eyni dildə danışırıq. Buna görə də Mədəniyyət və Turizm Nazirliyindən bu sərgidə iştirakımız üçün təklif gələndə çox sevindik və məmnuniyyətlə qəbul etdik. Bakını dəniz sahilində olmasına, ab-havasına görə İstanbula bənzətdim. İnsanların üzündə xoş bir təbəssüm var. Türkiyəyə geri dönəndə dostlarıma danışmaq üçün Bakı və buranın insanları barədə zəngin təəssüratlarım var".

Şahanə MÜŞFİQ

525-ci qəzet.- 2017.-12 aprel.- S.4.