"Baku Shopping Festival" turist kontingentini artıracaq

Metyu Brayza: "Tax Free" sisteminin tətbiqi turistlərin cəlb edilməsi üçün əla düşünülüb

Məlum olduğu kimi, Azərbaycanın paytaxtında ilk dəfə ticarət festivalı - "Baku Shopping Festival" təşkil olunub.

Prezident İlham Əliyevin 2016-cı il sentyabrın 1-də imzaladığı "Azərbaycan Respublikasında turizmin inkişafı ilə bağlı əlavə tədbirlər haqqında" sərəncama əsasən keçirilən festivalın təşkili Mədəniyyət və Turizm Nazirliyinin nəzdində fəaliyyət göstərən Azərbaycan Konqreslər Bürosuna həvalə olunub. Bakıda belə festivalların keçirilməsi sözügedən sərəncamda və ölkə prezidentinin 2016-cı il 6 dekabr tarixli fərmanı ilə təsdiq edilən "Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi"ndə əksini tapıb.

"Baku Shopping Festival" Qafqazda və Orta Asiyada ilk belə təcrübədir. Festivala qonşu ölkələrdə, eyni zamanda, son dövrdə Azərbaycana böyük turist axınının müşahidə olunduğu Fars körfəzi ölkələrindən böyük maraq var.

Müxtəlif dövlətlərin təcrübəsi göstərir ki, ənənəvi şopinq festivalları turizmin inkişafına, xaricdən turist axınının artmasına müsbət təsir göstərir. Dünya Turizm Təşkilatının hesabatında da ticarət festivalları nəticəsində turist axınının 30 faizədək artdığı qeyd olunur. Festival çərçivəsində əcnəbilərlə yanaşı, Azərbaycan vətəndaşları da dünya təcrübəsində bir ilk olan "Tax free" (əlavə dəyər vergisinin qaytarılması) sistemindən istifadə etmək imkanı əldə ediblər.

Festival günlərində 100 manat və daha çox alış-veriş edən hər bir əcnəbi və ya Azərbaycan vətəndaşı bu sistemdən yararlana biləcək. Bakı Şopinq Festivalının internet saytı - "www.bakushopfest.com" Azərbaycan, ingilis, rus, ərəb dillərində fəaliyyət göstərir.

Aprelin 10-dan mayın 10-dək keçirilən festival həm xarici turistlərə, həm də yerli istehlakçılara əlverişli alış-veriş imkanı yaradıb. Eyni zamanda, Ticarət mərkəzlərində, Fəvvarələr meydanında və Dənizkənarı Milli Parkda gündəlik əyləncə tədbirləri keçiriləcək. Bu tədbirlər zamanı DJ-lərin və animatorların çıxışları, konsert proqramları, fləşmoblar, maskotların paradı, rəqslər, akrobatların çıxışları, kino nümayişləri və s. təşkil ediləcək. Festival müddətində paytaxtın mərkəzi küçələrində, mehmanxanalarda və şəhərin ticarət mərkəzlərində informasiya köşkləri fəaliyyət göstərəcək. Həmçinin, müxtəlif dillərdə Çağrı mərkəzi (Call Center) turistlərin və əhalinin, tərəfdaşların, sponsorların, ticarət nöqtələrinin, alıcıların və festivalın digər iştirakçılarının sərəncamına verilib. Festivalda iştirakçı kimi qeydiyyatdan keçən mağazalar "Tax free" nişanı ilə fərqlənir.

ABŞ-ın Azərbaycandakı keçmiş səfiri, ATƏT-in Minsk qrupunun sabiq həmsədri Metyu Brayza Bakı Şopinq Festivalı ilə bağlı fikirlərini bölüşərək qeyd edib ki, belə bir tədbirin Bakıda təşkil olunduğunu eşitmək çox xoşdur. APA-nın məlumatına görə, M.Brayza bildirib ki, festival boyu "Tax Free" sisteminin tətbiqi turistlərin cəlb edilməsi üçün əla düşünülüb.

Keçmiş səfir xarici turistlərin Azərbaycana cəlb olunması baxımından festivalın önəminin böyük olduğuna əminliyini ifadə edib: "İrandan və bəzi Ərəb ölkələrindən Azərbaycana əvvəllər də turistlər az gəlmirdi. Bu festivalla isə bu ölkələrdən Azərbaycana gələn turist kontingenti artacaq. Ümumiyyətlə, başqa ölkələrdən də festivalla maraqlanıb Azərbaycana gələn turistlərin sayında artım olacaq".

Ceyhun ABASOV

525-ci qəzet.- 2017.-19 aprel.- S.5.