Azərbaycan Dillər Universitetində ödənişsiz Yay məktəbi

AKADEMİK KAMAL ABDULLA: “BU, UNİVERSİTETİN HƏYATINDA İLK BELƏ ADDIM İDİ”

Azərbaycan Dillər Universitetində (ADU) iyulun 18-dən başlayan 2016-2017-ci tədris ilinin Yay məktəbi öz işini uğurla davam etdirir.

Universitetin rektoru, akademik Kamal Abdullanın qərarına əsasən, akademik borcu olan tələbələrin kəsrlərinin ödənilməsi məqsədilə təşkil edilən yay məktəbi ödənişsizdir. Yay məktəbləri universitet tərəfindən tələbələrin kəsirlərinin verilməsi üçün keçirilir. Yay semestrinə nəzəri kurslar üçün vaxt ayrılır və sonda imtahanlar təşkil olunur. Fakültələrdə artıq fənlər tədris edilir.

KƏSİRİ OLAN TƏLƏBƏNİN ÖDƏNİŞ PROBLEMİ HƏLL EDİLİB

Rektor Kamal Abdulla deyir ki, yay məktəbini ödənişsiz etməkdə məqsəd kəsirli tələbələrin ödəniş problemini həll etməkdir: “Bəllidir ki, kəsiri olan tələbələr yay məktəbinə cəlb olunurlar və buna görə universitetə müəyyən məbləğ ödəyirlər. Biz onları bu məbləğdən azad etdik. Bu, universitetin həyatında ilk belə addım idi. Faktiki olaraq bunun konsepsiyası ondan ibarətdir ki, əgər kəsrli tələbə kəsirinə görə universitetə borcludursa, eyni zamanda həmin kəsirə görə universitet də tələbəyə borcludur. Ona görə ki, tədris yaxşı qurulmayıb, müəllim tələbəni yaxşı hazırlamayıb, tələbəyə diqqətini lazımi şəkildə yetirməyib. Tələbə niyə kəsilir? Çünki o, müəyyən öhdəsinə düşən krediti doldurmur, deməli, müəllimin də burada hansısa məsuliyyəti var və bu məsuliyyət qarşılıqlı olmalıdır.

Universitet öz borcunu bu şəkildə, yəni məktəbi ödənişsiz etməklə kompensasiya elədi. Bunun müqabilində də tələbələr söz verdilər ki, yay məktəbində böyük nizam-intizamla çalışacaqlar və həqiqətən ciddi şəkildə tədris prosesində özlərində olan boşluğu dolduracaqlar. Ümumiyyətlə, bütün tədris prosesi tələbənin xeyrinə yönəlməlidir. Əgər müəllim tələbənin qiymətləndirməsi zamanı 2 rəqəm arasında qalırsa, son qərarı hökmən tələbənin xeyrinə vermək lazımdır. Qiymətləndirmədə müəllim ədalətli və səxavətli olmalıdır. Eyni zamanda, tələbə də məsuliyyətli olmalıdır. Ona yaradılan şəraitdən sui- istifadə etməməlidir. Heç nədən elə belə “mən belə istəyirəm”, əsaslandırılmamış şəkildə qiymət şişirtmələrinə yol vermədən tələbənin həqiqi qiyməti müəyyən güzəştli şəkildə verilə bilər”.

YAY MƏKTƏBİNƏ ONLAYN QEYDİYYAT

Azərbaycan Dillər Universitetinin Tələbə qəbulu və tələbə qeydiyyatı Mərkəzinin direktoru Rəna Fərəcovanın sözlərinə görə, rektor Kamal Abdullanın qərarına əsasən ödənişsiz təşkil olunan builki yay məktəbində mühüm yeniliklər tətbiq olunub. Bu yay semestrində ilk dəfə olaraq həm də onlayn şəkildə qeydiyyat aparılıb. Bu proses iyulun 10-dan 14-dək həyata keçirilib: “Onlayn qeydiyyat universitetimizdə ilk dəfə tətbiq olunub və bu, rayonlarda olan tələbələrin daha rahat və operativ qeydiyyatdan keçmələrinə şərait yaradıb. Bu yenilik tələbələr tərəfindən yüksək qiymətləndirilib. Xüsusilə də bölgələrdə yaşayan tələbələr məktəbə onlayn şəkildə qeydiyyat aparılmasını müsbət hal kimi dəyərləndiriblər”.

102 QRUP VƏ 61 MÜƏLLİM

Azərbaycan Dillər Universitetinin Yay məktəbinin rəhbəri, Təhsil fakültəsinin dekan müavini Bənövşə Məmmədova deyir ki, məktəb 102 qrup üzrə təşkil olunub. Fənləri tədris etmək üçün universitetin 61 nəfər peşəkar, yüksək ixtisaslı müəllimi prosesə cəlb edilib. Onun söylədiyinə görə, Yay məktəbi tələbələrə maksimal dərəcədə bilik vermək və imtahanlardan uğurla keçmək üçün onları yüksək səviyyəli dərs proqramı ilə təmin etmək məqsədi daşıyır: “Azərbaycan Dillər Universitetinin rektoru, akademik Kamal Abdullanın Təhsil, Tərcümə, Filologiya və jurnalistika, Regionşünaslıq və beynəlxalq münasibətlər, Magistratura fakültələrində yay semestrinin ödənişsiz keçirilməsi ilə bağlı qərarını yüksək qiymətləndiririk. Qeyd etmək istərdim ki, 2016-2017-ci tədris ilində yay semestrinin ödənişsiz təşkil olunmasında məqsəd əvvəlki semestrlərdən akademik borcu olan tələbələrin kredit borclarının əlverişli, rahat və dinamik şəkildə ödənilməsini təmin etməkdir. Bu il Yay məktəbində yalnız Azərbaycan Dillər Universitetinin tələbələri deyil, Bakı Mühəndislik Universiteti və Xəzər Universiteti, həmçinin Kanadanın Toronto Universitetinin tələbələri də iştirak edir”.

Onun dediyinə görə, Yay məktəbinin müvafiq qaydalara uyğun təşkil olunması, tədrisin keyfiyyətinə nəzarət, tədris olunan fənlər üzrə imtahanların keçirilməsi və bu zaman şəffaflığın, obyektivliyin təmin olunması üçün bütün lazımi tədbirlər görülüb.

HUMANİST ADDIM

ADU-nun II Xarici dil kafedrasının baş müəllimi Rəhimə Babayeva tələbələrin dərslərdə çox fəal iştirak etdiyini deyir: “Mən rektor Kamal Abdullanın Yay məktəbinin ödənişsiz keçirilməsi ilə bağlı qərarını dəstəkləyir və çox yüksək qiymətləndirirəm. Tələbələrin vəziyyətini nəzərə alaraq belə təşəbbüsün irəli sürülməsi humanist addımdır. Tələbələr əvvəlki illərdə keçirilən yay məktəbləri ilə müqayisədə 2016-2017-ci tədris ilinin Yay məktəbində daha aktiv və həvəslə iştirak edirlər. Tələbələr keçilən dərsləri diqqətlə dinləyib proqramı mənimsəməyə çalışırlar. Mən ümid edirəm ki, bu, onların imtahanları uğurla verməsinə şərait yaradacaq”.

İMTAHANI UĞURLA KEÇMƏK ÜÇÜN ŞANS

Azərbaycan Dillər Universitetinin Təhsil fakültəsinin 3-cü kurs tələbəsi Sədəf İsmayılovanın sözlərinə görə, bir ay ərzində dərslərdə mütəmadi iştirakın nəticəsi olaraq onlar imtahanı uğurla keçmək şansı əldə edirlər: “Bu il Yay məktəbinin ödənişsiz keçirilməsi barədə verdiyi qərara görə rektor Kamal Abdullaya çox minnətdaram. Kəsirə görə ödənilən məbləğ hər bir fənnin kreditindən asılıdır. Elə tələbə var ki, bu məbləği ödəməyə maddi imkanı yoxdur. Rektor tələbələrin maddi vəziyyətini nəzərə alıb bu addımı atdı. Yay məktəbini ödənişsiz etməklə Kamal müəllim maddi imkanı aşağı olan tələbələri böyük sıxıntıdan, çətin vəziyyətdən qurtardı. İndi akademik borcu olan hər bir tələbə rahatlıqla yay məktəbində iştirak edir. Dərsləri diqqətlə dinləyir və çalışırlar ki, rektorun onlara verdiyi ikinci şansdan istifadə edib kəsrlərini ödəsinlər. Mən də rektorun bizə verdiyi bu şansı dəyərləndirib imtahandan keçmək üçün dərslərimə daha ciddi yanaşıram”.

S.İsmayılovanın dediyinə görə, bu il ilk dəfə olaraq yay məktəbinə onlayn şəkildə qeydiyyatın aparılması isə tələbələrin işini daha da asanlaşdırıb.

REKTORA TƏŞƏKKÜR

Universitetin Təhsil fakültəsinin 4-cü kurs tələbəsi Gülnarə Cəfərova da Yay məktəbinin ödənişsiz olmasını müsbət hal kimi qiymətləndirərək bu məsələdə Azərbaycan Dillər Universitetinin digər ali məktəblər üçün örnək olduğunu vurğulayıb. G.Cəfərova bildirib ki, rektorun bu qərarından sonra tələbələrin məsuliyyəti daha da artıb, bunu görən müəllimlər isə işlərinə daha ürəkdən can yandırırlar: “Rektorun bu qərarı kəsiri olan bütün tələbələr tərəfindən böyük sevinclə qarşılanıb. Eşidəndəki yay məktəbi ödənişsizdir, mən də çox sevindim. Ödənişsiz yay məktəbində iştirak edən bütün tələbələr adından rektorumuz Kamal Abdullaya çox təşəkkür edirəm. İndi tələbələr kəsirə görə məbləğ ödəmədən yay məktəbində iştirak edir. İndi hər kəsin bir məqsədi var, yaxşı oxuyub imtahandan müsbət qiymət alıb kəsiri bağlamaq. Rektorun etimadını doğrultmaq”.

G.Cəfərovanın sözlərinə görə, yay məktəbində Azərbaycan Dillər Universitetinin tələbələri ilə yanaşı, Bakı Mühəndislik Universiteti və Xəzər Universiteti, həmçinin Kanadanın Toronto Universitetinin tələbələri də iştirak edir.

ALQIŞLANAN QƏRAR

“Azad müəllimlər” Birliyinin sədri, təhsil eksperti Məlahət Mürşüdlü Azərbaycan Dillər Universitetində təşkil edilən Yay məktəbinin ödənişsiz olmasını müsbət hal kimi qiymətləndirib: “Kamal Abdullanın akademik borcu olan tələbələr kəsrlərinin ödənilməsi məqsədilə təşkil edilən yay məktəbinin ödənişsiz olması barədə verdiyi qərarı ancaq alqışlamaq olar. Bu qərar maddi vəziyyəti aşağı olan, kasıb tələbələrə heç bir məbləğ ödəmədən kəsrlərini rahat ödəmək imkanı verir. Çox istərdim ki, bu, davamlı olsun. Yəni hər il Azərbaycan Dillər Universitetində Yay məktəbi tələbələr üçün ödənişsiz olsun”.

DİGƏR UNİVERSİTETLƏR DƏ BU TƏCRÜBƏDƏN İSTİFADƏ ETMƏLİ

Azərbaycan Təhsil Şurasının sədri, professor Əjdər Ağayev deyir ki, Azərbaycan Dillər Universitetinin rektoru Kamal Abdullanın müəyyən etdiyi yeni qaydalar tələbələrin fəaliyyətini stimullaşdıracaq və onların özünəinamını artırır. Yeni qaydalardan sonra artıq tələbələr üzləşdikləri problem qarşısında tək olmadıqlarını hiss edəcək və çətinliklərinin öhdəsindən daha tez gələcəklər: “Rektorun müvafiq qərarı ilə Azərbaycan Dillər Universitetində ödənişsiz yay məktəbi təşkil edilib. Mən bunu düzgün qərar hesab edirəm. Düşünürəm ki, bu, tələbələrin xeyrinə atılmış bir addımdır. Xüsusilə də maddi baxımdan imkanı olmayan tələbələrin”.

Ə.Ağayev qeyd edib ki, ola bilsin ki, yay məktəbinin ödənişsiz olması bəzi tələbələrdə semester imtahanları zamanı müəyyən rahatlıq hissi yaratsın ki, yay imtahanlarında iştirak edərəm. Bu, baş verməsin deyə, təlim prosesində tələbələrə ciddi nəzarət olmalıdır ki, onlar dərslərinə başdansovdu yanaşmasınlar: “Məndə olan məlumata görə, ADU-da prosesə ciddi şəkildə nəzarət olunur. Dərslər yüksək səviyyədə tədris edilir”.

Akademik Kamal Abdullanın bu addımını müsbət dəyərləndirdiyini vurğulayan professorun sözlərinə görə, bəzən obyektiv səbəblərdən semester imtahanlarında iştirak edə bilməyən, yaxud da dərslərinə hazırlaşmaq imkanı olmayan tələbələr artıq ciddi bir çətinliklə üzləşməyəcəklər: “Tələbələr üçün ən böyük problem ödəniş məsələsi idi. Artıq bu məsələ də öz həllini tapdı”.

Azərbaycan Təhsil Şurasının sədri qeyd edib ki, ölkənin digər ali təhsil müəssisələri də bu təcrübədən istifadə etməlidir: “Düşünürəm ki, digər universitetlər də bu təcrübədən istifadə etsələr, çox yaxşı olar. Nəticədə tələbələr ruhlanar və oxumağa həvəslənər. Bütün bunlar isə ümumilikdə, tədrisin keyfiyyətinə müsbət təsir edər”.

Qeyd edək ki, Azərbaycan Dillər Universitetində yay məktəbi 5 tədris həftəsi və 1 həftə imtahan sessiyasından ibarət olmaqla avqustun 25-nə qədər davam edəcək.

S.QARAYEVA

525-ci qəzet 2017.- 5 avqust.- S.8.