Tahir Salahovun doğum günü qeyd edildi

 

Noyabrın 29-da "İçərişəhər" Dövlət Tarix-Memarlıq Qoruğunda yerləşən Tahir Salahovun ev-muzeyində rəssamın doğum günü münasibətilə İncəsənət Gimnaziyasının şagirdlərinin əsərlərindən ibarət sərgi açılıb şagirdlərin konsert proqramı təşkil olunub.

 

 Tədbirdə muzeyin direktoru Səadət Mirzəyeva çıxış edərək ev-muzeyin yaradılmasından qarşıda duran vəzifələrdən danışıb. Bildirib ki, muzeydə Tahir Salahovun Azərbaycan dövlətinə bağışladığı rəsm əsərlərindən şəxsi arxivindən ibarət kolleksiya nümayiş olunub.

 

Bildirilib ki, Tahir Salahov milli sənət xəzinəsinin qızıl fonduna daxil olan əsərləri ilə Azərbaycan mədəniyyəti tarixində yeni parlaq səhifə açıb. Onun dünyanın mötəbər muzeylərində qalereyalarında saxlanılan, müxtəlif sərgilərdə nümayiş etdirilən tabloları çoxəsrlik ənənələrə malik Azərbaycan incəsənətinin şöhrətini yüksəklərə qaldırıb.

 

Belə tədbirlərin ənənəvi olaraq hər il keçirildiyini bildirən Səadət Mirzəyeva qeyd edib ki, bu gün gənc rəssamların əsərlərinin görkəmli rəssam Tahir Salahovun əsərləri qarşısında nümayiş olunması simvolikdir, gələcəkdə onlar arasında da belə sənətkarların olmasına inam yaradır.

 

Sonra Azərbaycan Milli Konservatoriyası nəzdində İncəsənət Gimnaziyasının direktoru Aytən Əhmədova dünya şöhrətli sənətkar Tahir Salahovun ad günü münasibətilə bu cür tədbirin keçirilməsini yüksək qiymətləndirib. Şagirdlərin bu konsertə çox böyük həvəslə hazırlaşdığını deyən A.Əhmədova tədbirdə milli musiqilərimizlə yanaşı, dünya bəstəkarlarının da əsərlərinin səsləndiriləcəyini söyləyib.

 

Tədbir konsert proqramı ilə davam edib.

 

Xədicə RƏHMAN

525-ci qəzet.-2017.-1 dekabr.-S.8.