İmir Məmmədlinin 60 yaşı...

... AZƏRBAYCAN YAZIÇILAR BİRLİYİNDƏ QEYD EDİLİB

Dünən Azərbaycan Yazıçılar Birliyinin (AYB) "Natəvan" zalında şair, yazıçı, dramaturq İmir Məmmədlinin 60 illik yubileyinə həsr olunmuş tədbir keçirilib.

Mərasimdə tanınmış ziyalılar, mədəniyyət və ədəbiyyat xadimləri, oxucular, yubilyarın ailə üzvləri və media nümayəndələri iştirak ediblər.

Yubiley tədbirini giriş sözü ilə açan AYB-nin katibi İlqar Fəhmi İ.Məmmədlinin həyat və yaradıcılığı haqqında geniş məlumat verib. Deyib ki, yubilyarın yaradıcılığı hər zaman gənclik nikbinliyi, pozitivliyi ilə seçilib: "Onun nəsrində qaranlığın içərisində işıq tapmaq cəhdləri var. İmir müəllimin hekayələrində viziuallıq var ki, bu da kino sənəti üçün çox vacibdir. Artıq rejissorların ayrıca ssenariyə, dramaturji əsərə ehtiyacı yoxdur".

Bədii Tərcümə və Ədəbi Əlaqələr Mərkəzinin sədri, şair Səlim Babullaoğlu yubilyarın tərcümə fəaliyyətindən söz açıb: "İmir Məmmədli həm Azərbaycan, həm Gürcüstan ədəbiyyatı, həm də iki ölkənin əlaqələri kontekstində mühüm işlər görüb. Rustavelinin "Pələng dərisi geyinmiş pəhləvan" kimi nəhəng əsərini, bir sıra gürcü şairlərinin əsərlərini dilimizə, Yunus Əmrə, Aşıq Ələsgər kimi şairlərimizi gürcü dilinə tərcümə edib". S.Babullaoğlu İ.Məmmədlinin poeziyasından da danışıb, onu istedadlı şair adlandırıb: "Onun poeziyasının alt qatı ikidilli olduğu üçün onu kimsə ilə müqayisə etmək olmur. Hər iki xalqın poetik stixiyasını öz yaradıcılığında əks etdirir".

Xalq şairi Nəriman Həsənzadə yubilyarla tanışlığından, onun Azərbaycan ədəbiyyatındakı yerindən söz açaraq deyib ki, İmir Məmmədli anadan şair doğulan insandır. O, iki xalqın ədəbiyyatına canını, qanını, həyatını sərf edir, fədakarcasına çalışır. İmir Məmmədlini özündən öncə əsərləri ilə tanıyıb sevdiyini bildirən millət vəkili Aydın Mirzəzadə deyib: "Yaradıcılığında klassiklərimizin izləri olsa da, o, bəhrələndiyi insanları təqlid etmədi, özünü yarada bildi".

"Borçalı" cəmiyyətinin sədri Zəlimxan Məmmədli çıxışında İmir Məmmədlinin şəxsi bütövlüyünün, mənəvi zənginliyinin yaradıcılığı ilə vəhdət təşkil etdiyini vurğulayıb.

Şair Musa Ələkbərli yubilyarı sözə qənaət edən, hisslərini pıçıltı ilə deyən, səmimi söz adamı adlandırıb.

İctimai Radionun əməkdaşları Kamil Nehrəmli, Samir Bağıroğlu, Xalq artistləri Səidə Quliyeva, Amaliya Pənahova, şair Oqtay Rza, Azərbaycanın Gürcüstandakı keçmiş səfiri Hacan Hacıyev və başqaları İmir Məmmədlini yubiley münasibəti ilə təbrik edib, onun yaradıcılığı və şəxsiyyəti haqqında öz düşüncələrini bölüşüblər. S.Bağıroğlu şairin "Günora" kitabından bir neçə şeirini, Oqtay Rza isə şairə həsr etdiyi şeirini oxuyub.

Sonda yubilyar ona göstərilən diqqət və qayğıya görə, başda AYB-nin rəhbərliyi olmaqla, təşkilatçılara, çıxışçılara təşəkkürünü bildirib.

Şahanə MÜŞFİQ

525-ci qəzet 2017.- 5 dekabr.- S.7.