"Cəngi" etno-caz qrupu Fransada konsert verdi

 

Dekabrın 2-də Fransanın Uaz departamentinin Silly-Thillard şəhərində "Cəngi" etno-caz qrupunun iştirakı ilə Azərbaycan etno-caz musiqisindən ibarət konsert keçirilib.

 

Azərbaycanın Fransadakı səfirliyinin dəstəyi, Azərbaycanın Dostları Assosiasiyası (ADA) Xərçəngə qarşı Liqanın Uaz bürosunun təşkilatçılığı  ilə keçirilən konsert xərçəng xəstəliyinə qarşı mübarizə edən liqaya yardım üçün xeyriyyə məqsədilə həyata keçirilib.

 

Tədbiri giriş sözü ilə açan Silly-Thillard şəhərinin meri Jan Vertadye konsertin təşkilatçılarına, xüsusən , ADA-ya belə gözəl təşəbbüs üçün təşəkkürünü bildirib.

 

ADA-nın prezidenti Jan Fransua Mansel söz alaraq ilk öncə assosiasiyanın fəaliyyəti həyata keçirilən layihələri haqqında danışıb. O, ölkəmiz barədə tamaşaçılara məlumat verərək onun qədim tarixə mədəniyyətə malik olduğunu deyib. J.F.Marsel, həmçinin, Azərbaycanın Ermənistanla uzun illər davam edib, həllini tapa bilməyən Qarabağ münaqişəsi, ölkənin 20 faiz torpaqlarının işğal altında olması barədə tamaşaçıları məlumatlandırıb, qeyd edib ki, bu kimi layihələr Azərbaycan musiqisini Fransada təbliğ etməklə yanaşı, azərbaycanlıların qədim zəngin mədəni irsə malik olduqlarını sübut edir. O, Azərbaycan musiqisini Avropada təbliğ etmək üçün etno-caz layihəsinin maraqlı seçim olduğunu bildirib.

 

 Daha sonra ADA-nın baş katibi Mirvari Fətəliyeva Azərbaycan musiqisi Cəngi qrupu haqqında məlumat verib. O, Muğam sənətinin çox qədim köklərə malik olduğunu, muğamın UNESCO-nun qeyri-maddi mədəni İrs üzrə Reprezentativ siyahısına daxil edildiyini bildirib.

 

1992-ci ildə məşhur caz ustası bəstəkar Rafiq Babayevin yaratdığı "Cəngi" qrupu, 2002-ci ildən etibarən Əməkdar artist Mircavad Cəfərovun rəhbərliyi ilə fəaliyyət göstərir. Mircavad Cəfərov (ud), Mircavid Cəfərov (tar), İsgəndər Ələsgərov (zərb alətləri) Vasif Hüseynzadə (piano), Ruslan Hüseynov (bas gitara) kimi istedadlı musiqiçilərdən ibarət olan "Cəngi" qrupu, geniş kolorotli repertuarları ilə tamaşaçıların böyük rəğbətini qazanıblar.

 

Qrup müxtəlif beynəlxalq festivallarda iştirakı ilə Azərbaycanın milli sərvəti olan Muğam caz janrını sintez edərək onu yeni çalarlarla, özünəməxsus impovizasiyalarla musiqisevərlərə çatdırır.

 

Şahanə MÜŞFİQ

 

525-ci qəzet  2017.- 7 dekabr.- S.7.