Fərqanə Mehdiyeva gənc ədiblərin qonağı oldu

Azərbaycan Yazıçılar Birliyinin "Natəvan" klubunda III Gənc Ədiblər Məktəbinin şair, "Ulduz" jurnalının poeziya şöbəsinin rəhbəri Fərqanə Mehdiyeva ilə görüşü keçirilib.

Tədbiri yazıçı Elçin Hüseynbəyli açaraq qonağı gənc yazarlara təqdim edib, F.Mehdiyevanın poeziyası barədə düşüncələrini bölüşüb: "Fərqanə xanımdan öyrənməli olduğunuz çox keyfiyyətlər var. O, həm sərbəstdə yazır, həm hecada. Ümumən Fərqanə xanımın sərbəst şeirində belə intonasiya duyulur. Bu gün Fərqanə xanımın şeirlərini dinləyəcək və həqiqi, yaxşı şeirlə təmasda olacaqsınız".

F.Mehdiyeva gənc ədiblərlə görüşdən məmnun olduğunu deyib: "Mənim Gənc Ədiblər Məktəbiylə görüşüm bir dəfə də keçirilib. Ümid edirəm ki, sizinlə görüş də maraqlı olacaq. Çünki gənclərlə bir yerdə olmaq onların enerjisini paylaşmaqdır. Gəncliyin üzünə heç bir dövrdə bu qədər geniş qapılar açılmayıb. Birliyin gənclər üzrə katibi Rəşad Məcidə minnətdaram ki, bu cür bir yaradıcılıq məktəbi yaradıb və neçə-neçə istedadın üzə çıxmasında böyük rol oynayır".

Tədbirdə iştirak edən şair Narıngül də qələm dostunun yaradıcılığından bəhs edib: "Fərqanə xanım sujetli şeirdə məharətlidir. Gənclərdə bu cür nümunələr stimul yaradır. Onlar gözəl şeirlər yazmaq arzusuna düşürlər".

Sonra F. Mehdiyeva gənc şairlər Zərifə İslam, Aydan Mayılova, Əbdüləli Əbdüləliyev, Vüsalə Vətənxan, Elnur Xəzri, Rəvan Cavid, Ulucay Akif və başqalarının şeirlərini dinləyib, onlar haqda fikirlərini bildirib.

Sonda F.Mehdiyeva öz peoziyasından nümunələr səsləndirib, gənclərin suallarını cavablandırıb və gənc ədiblərin şeirlərinin "Ulduz" jurnalında çapı mövzusunda onlarla müzakirə aparıb.

MÜŞFİQ

525-ci qəzet 2017.- 20 dekabr .- S.8.