Məktəblilər Pərvinin pyesini oynadılar

HEYDƏR ƏLİYEV ADINA MÜASİR TƏHSİL KOMPLEKSİNDƏ GƏNC DRAMATURQUN “MAUQLİNİN YENİ İLİ” PYESİ SƏHNƏLƏŞDİRİLDİ

Dekabrın 25-də Heydər Əliyev adına Müasir Təhsil Kompleksində gənc dramaturq Pərvinin "Mauqlinin Yeni ili" pyesi səhnələşdirilib.

İngilis yazıçısı Redyard Kiplinqin “Cunqliya kitabı” əsərinin qəhrəmanı Mauqli bu dəfə tamam yeni təhlükələrlə qarşılaşdı. Amma sonda uşaqlara qoşulub yeni ili qarşıladı. Təhsil Kompleksinin bağçasında təhsil alan uşaqlar da tamaşaçılar arasında olublar. Uşaqların cizgi filmlərindən də sevdiyi personaj, onun başına gələnlər balaca tamaşaçıların marağına səbəb olub..

Qeyd edək ki, pyesə Əməkdar artist, Gənc Tamaşaçılar Teatrının aktrisası Gülər Nəbiyeva quruluş verib. Rolları isə Təhsil Kompleksinin şagirdləri canlandırıblar. Meymunları Abdinova Gülsu, Budaqzadə Leyli, Babacanova Alisa, Lətifli Məryəm, Məmmədova Nurgün, Məmmədzadə Fidan, Əsgərova Leyla, Əlizadə Aliyə, Şükürlü Aysel, canavarları İmanlı Leyla, Verdiyev Eldar, Şirxanı Məmmədova Aydan, Baqiranı Nasirli Alisa, Balunu Dəvəli Banu, Çaqqalı Qəribova Sofiya, Mauqlini İsmayılzadə Məhəmməd ifa ediblər.

Tamaşadan öncə pyesə quruluş verən Gülər Nəbiyeva çıxış edərək uşaqları salamlayıb: “Bu gün sizlərin hər birinizin bu səhnədəki dostlarınıza dəstək olmanızı istəyirəm. Həmçinin əsərin müəllifi Pərvin xanım da bizlərlədir. İstəyirəm sonda onunla da söhbət edib fikirlərinizi bildirəsiniz.”

Tamaşadan sonra isə pyesin müəllifi Pərvin səhnəyə çıxıb uşaqları təbrik edib: “Ulu öndərin adını daşıyan, müasir Azərbaycan təhsil sistemində özünəməxsus yeri olan bu məktəbdə, sizlərlə bərabər olmaqdan məmnunam. Bu gün sizinlə bərabər tamaşaya baxdım və gülüşləriniz, alqışlarınız məni də uşaqlaşdırdı elə bil. Tamaşa başlamazdan əvvəl valideynlər məndən uşaq yazarı olub-olmadığımı soruşdular. Uşaq mövzusunda yazdıqlarım azlıq təşkil edir. Amma mənə elə gəlir ki, nə yazılırsa, nə yaranırsa hamısı sizin üçündü, sizin daha savadlı, daha işıqlı, xoşbəxt gələcəyiniz üçündü. Ona görə bu gün tamaşada oynayan uşaqların istedadı, həvəsi məni xeyli ruhlandırdı. İlk növbədə məktəbin direktoruna, müəllim heyətinə təşəkkür edirəm ki, bu cür istedadlı uşaqların üzə çıxması üçün əllərindən gələni əsirgəmirlər. Həmçinin pyesimi seçən, ona quruluş verən Əməkdar artist Gülər Nəbiyevaya da minnətdaram. Sizlərdən çox böyük fərəhlə ayrılacam. Sizə qoşulub uşaqlaşdığımı söylədim, ona görə sonda Mauqlinin məşhur sözlərini bir az dəyişərək hər birinizə ünvanlayıram: Biz səninlə eyniyik – SƏN VƏ MƏN!”

Qeyd edək ki, “Mauqlinin yeni ili” pyesi ilk dəfə Gənc Tamaşaçılar Teatrının səhnəsində uşaqlar üçün yeni il tamaşası kimi səhnələşdirilib.

NƏZRİN

525-ci qəzet.-2017.-27 dekabr.-S.7.