Pərvinin yeni kitabları təqdim olundu

Fevralın 7-də Azərbaycan Yazıçılar Birliyinin (AYB) "Natəvan" klubunda yazıçı və ədəbiyyatşünas Pərvinin "Qadın olmaq" və "Sevdim səni" kitablarının təqdimat mərasimi keçirildi.

Tədbiri Birliyin katibi, "525-ci qəzet"in baş redaktoru Rəşad Məcid açaraq Pərvinin yaradıcılığından, sözə və sənətə həssas, məsuliyyətli münasibətindən söz açıb. Qeyd edib ki, Pərvin istedadlı yazıçı olmaqla yanaşı, iti qələmə sahib publisist, öyrənməkdə, öyrətməkdə maraqlı pedaqoq, mahiyyətə vara bilən araşdırmaçıdır.

Yazıçılar Birliyinin sədri, Xalq yazıçısı Anar, AMEA-nın vitse-prezidenti, Ədəbiyyat İnstitutunun direktoru akademik İsa Həbibbəyli, Xalq şairi Nəriman Həsənzadə, yazıçı Seyran Səxavət, şair Vaqif Bəhmənli, AYB-nin katibi, yazıçı İlqar Fəhmi, Azərbaycan Dövlət Pedaqoji Universitetinin kafedra müdiri Himalay Qasımov, rejissor Ramiz Həsənoğlu, yazıçı Səyyad Aran, şair Paşa Qəlbinur, tənqidçi Vaqif Yusifli, filologiya üzrə fəlsəfə doktoru Təranə Əzimova çıxış edərək müəllifin yaradıcılığı, özünəməxsus üslubu, mətnə yanaşma tərzi barədə düşüncələrini bölüşüb, ona yeni uğurlar arzulayıblar.

Sonda Pərvin çıxış edərək kitabların ərsəyə gəlmə prosesindən danışıb, yaradıcılıq yolunda dəstək gördüyü insanlara və mərasim iştirakçılarına minnətdarlığını bildirib.

Cavid QƏDİR

525-ci qəzet.- 2017.- 8 fevral.- S. 2.