Səndən qeyri kimim var, Vətən?!
Əziz
oxucular! Ağlasığmaz, xəyalagəlməz 20 Yanvar gecəsinin dəhşəti məni yaman günə qoymuşdu. Bu müdhiş gecədə
gözlərim qan ağlayır, ürəyim
sinəmi döyür,
döyəcləyirdi.
Gecəni diri gözlü açdım. Dan sökülər-sökülməz
mürgülədim, vəhydən
bir bayatı gəldi qondu sinəmə, ayıldım:
Qan sızlar,
Sinəm qandı, qan sızlar.
Qansıza bel bağlama,
Qansız olur qansızlar.
Bu misralarda ünvan
aydın, hədəf
aydın, törədilən
vəhşilik, cinayət
açıq-aydın. Hər şey
unudulsa da, bu qanlı tarixi
xalqımız nə unudar, nə yaddan çıxarar.
Xəyanəti qiyamətə qoymazlar.
Artıq
həmin gündən
iyirmi yeddi il keçir.
Yaralarımız sağalmır ki,
sağalmır. Ürəyimizdə qövr edir, sızıldayır. Bu illər ərzində bayatı mənim ürək dostum, can sirdaşım, könül
qardaşım olub.
"Anam birdi,
vətən tək",
"Xan çinar kölgəsində", "Başı
çalmalı dağlar"
adlı üç cildliyim işıq üzü görüb, sizlərə təqdim edilib. Hazırda qələmə aldığım bayatılarım
"Ana laylası, beşik
nəğməsidi" adlı
dördüncü cildini
çapa hazırlayıram.
Onlardan torpaqla, vətənlə bağlı bəzilərini
sizlərə ərmağan
etməkdən şərəf
duyuram.
Açılmır,
Tökülür qan açılmır,
Qarabağın tilsimi
Tilsimlənib, açılmır.
Candan yanan,
Ürəkdən, candan yanan.
Ölsə də of söyləməz,
Vətənə candan yanan.
Çətin qaya,
Çətinim, çətin qaya.
Sinəm
səngərin olsun,
Mərd qaya, çətin qaya.
Dağlaram,
Dağ çəkərəm,
dağlaram.
Vətənə göz dikənin
Gözlərini dağlaram.
Dar bəndim,
Dar keçidim, dar
bəndim.
Ulularım ulusu,
Dəmirqapım, Dərbəndim.
Daşına,
Qayasına , daşına.
Canım
qurban vətənin,
Torpağına, daşına.
Dəyən oğlu,
Yetişən, dəyən oğlu.
Nə çoxdu Kəlbəcərin,
Canlara dəyən
oğlu.
Dil bir ol,
Dilim, bir ol, dilbir ol.
Hər nə var birlikdədi,
Elim bir ol, el, bir ol.
Əsir
hey,
Hey dolanır, əsir hey...
Gah Xəzri, gah Gilavar,
Qəlbimizə əsir hey.
Fərəhim,
Qürur yerim, fərəhim.
Bu xalqım, bu vətənim,
Adım-sanım, fərəhim.
Gələcək,
Bir az da döz, gələcək.
Böyük uğur, qələbə
Qarşıdadı, gələcək.
Gəlmişəm,
Gəncədəyəm, gəlmişəm.
Cavad xanın qəbrini
Ziyarətə gəlmişəm.
Gedirəm,
Yol yormağa,
gedirəm.
Ana vətən gözləyir,
Qorumağa gedirəm.
Gedirəm,
Yollar açıq
gedirəm.
Anam Təbriz gözləyir,
Anamgilə gedirəm.
Görəcəm,
Vətən, Sizi görəcəm.
Tanrıdan möhlətim var,
Şuşam, səni görəcəm.
Götürər,
Şərəf bilər, götürər.
El yolunda şəhidi
El tökülər götürər.
Hayqırır,
Haray salır,
hayqırır.
Dalğalar savaşında
Xəzər coşur, hayqırır.
İman
yerim,
Din yerim, iman yerim.
Taleyimsən, ey vətən,
İnamım, iman yerim.
Kimim var,
Qurban sənə,
kimim var?
Ana vətən, can vətən.
Səndən qeyri kimim var?
Köç gedək,
Sür atını,
köç gedək.
Bizsiz qalan dağlara
Elim-obam, köç gedək.
Köçəköçdü,
Hay-haray, köçəköçdü.
Elat yaylağa qalxır,
Qovqahov, köçəköçdü.
Kurqanlar,
Şiş təpələr, kurqanlar
Oğuzda
yan-yanadı
Altı məzar kurqanlar.
Qalalar,
Qayalıqda qalalar.
Ər-ərənlər yığnağı,
Qürur-məğrur qalalar.
Qalalar,
Dar keçidlər, qalalar.
Qəbələyə arxadı,
Ər-ərənlər qalalar.
Qalalar,
Mərd igidlər, qalalar.
Hamısı canlı tarixdi,
Qəbələdə qalalar.
Qalandı,
Qalacaqdı, qalandı.
Tarix görmüş bu qala,
İgidlərdən qalandı.
Qan salan,
Qan-qan deyən, qan salan,
Od-ocağın boş qalsın,
A yurduma qan salan.
Qan varsa,
Qanlı oğul, qan varsa.
Vətən ağ günə çıxar,
Torpağında qan varsa.
Qan uddur,
Qana bələ,
qan uddur.
Torpağıma göz dikənin,
Torpağında qan uddur.
Qarşına,
Yan-yörənə, qarşına...
Vətən üçün şəhid
ol,
Ölüm çıxsa qarşına.
Qız qala,
İsmət qala, qız qala.
Əl çatmaz,
ün yetməzdi.
Dağ zi rvəsi, Qız qala.
Qoca dağlar,
Qocadan qoca dağlar.
Xocamdı, əfəndimdi,
Müdrikdi, qoca dağlar.
Yollarımda,
Azadlıq yollarımda.
Qırar,
parçalayaram
Zənciri qollarımda.
Qoynunda,
Qalam dağlar
qoynunda.
Ömrümün qürub çağı,
Gedəm, öləm qoynunda.
Qovuşur,
O tay, bu tay qovuşur.
Nə gözəldi, İlahi,
Araz Kürə
qovuşur.
Məlhəmdi,
Məlhəm kəndi məlhəmdi.
Min bir dərdin dəvası,
Həm təbib,
həm məlhəmdi.
Məzarı,
Nəzrədədi məzarı,
Şair,
alim, xocanın
Bədrəddinin məzarı.
Nargində,
Qana batdı
Nargin də.
Neçə can, neçə ürək,
Güllələndi Nargində.
Nə dərdim,
Nə məlhəmim,
nə dərdim?
Kəlbəcəri alan gün
Ölsəm, getsəm, nə
dərdim7
Neynirəm,
Mülkü-malı neynirəm?
Vətən yoxsa, el yoxsa,
Yaşamağı neynirəm?
Ocağa
dön,
Pirə dön, ocağa dön.
Baba yurdu ocaqdı,
Ocaq çat, ocağa dön.
Öpərlər,
Vətən bilər, öpərlər.
Qarşısında diz çöküb,
Al bayrağı öpərlər.
Uca tutun,
Ucaldın, uca tutun.
Bayraq dövlət rəmzidi,
Bayrağı uca tutun.
Ürəyim,
Gözüm, könlüm, ürəyim.
Xalqımı xoşbəxt görsə,
Dönər dağa ürəyim.
Ürəkdən,
Bağlan qəlbdən, ürəkdən.
Ana vətən sevilər
Canı-dildən, ürəkdən.
Vətəndi,
Qanım-canım vətəndi.
Ürək boyda bu qala
Dünya boyda vətəndi.
Vətəndi,
Müqəddəsdi, vətəndi.
Dalğalanır al bayraq,
Bayraq da bir vətəndi.
Yaşasın,
Ömür sürsün, yaşasın.
Xalqını yaşadanlar
Xalqım qədər yaşasın.
Yal-yamac,
Dərə-təpə, yal-yamac.
Gözəllik sərgisidi
Dağ sinəsi,
yal-yamac.
Yanmasaq,
Alov saçıb yanmasaq.
Yurdumuz kor qalmazmı
Od tutmasaq, yanmasaq?
Samirə,
Şəhri-Bağdad, Samirə,
Babəki öldürəndə
Ağladımı Samirə?
Təbrizdə,
Şəhri-qədim Təbrizdə,
Nə ola gedəm, görəm.
Öləm-qalam Təbrizdə.
Teymur
BÜNYADOV
525-ci qəzet.- 2017.- 14 fevral.- S.6.