Görkəmli kinooperator Arif Nərimanbəyov anıldı

Bugünlərdə Dövlət Film Fondunda Azərbaycanın görkəmli kinooperatoru, Əməkdar İncəsənət Xadimi Arif Nərimanbəyovun 100 illik yubileyinə həsr olunmuş tədbir keçirilib.

Mədəniyyət və Turizm Nazirliyinin, Dövlət Film Fondunun və Azərbaycan Respublikası Kinematoqrafçılar İttifaqının təşkilati dəstəyi ilə gerçəkləşən tədbirdə ölkəmizin tanınmış kino xadimləri, rejissorlar, aktyorlar və media nümayəndələri iştirak ediblər.

Əvvəlcə qonaqlar görkəmli kinooperatorun həyat və yaradıcılığına həsr olunmuş fotosərgiyə baxıblar. Daha sonra sənətkarın ömür yolunu əks etdirən videoçarx nümayiş olunub.

Kinematoqrafçılar İttifaqının icraçı katibi Cəmil Quliyev mərhum sənətkarı ən çətin səhnələrin mahir qurucusu, işinin peşəkarı operator kimi xatırlayıb. Qeyd edib ki, Azərbaycan kinosunun zəngin salnaməsini yaradanlar sırasında kinomuzun görkəmli kinooperatoru Arif Nərimanbəyovun xüsusi yeri var: "Azərbaycan kinosu çox böyük salnaməyə malikdir. Bu salnaməni yaradanlardan biri də kinooperatorlardır. Əvvəllər Azərbaycan kinosunda kinooperatorlar xaricilər olub. Ancaq sonradan Kinematoqrafiya İnstitutunun təşəbbüsü ilə bir çox azərbaycanlı kinooperatorlar təhsil aldı, yetişdirildi. Onlardan biri də Arif Nərimanbəyovdur. Mənə bu sənətə vəsiqə verənlərdən biri də məhz Arif müəllim olub. O, fərqli janrlarda, müxtəlif xarakterli filmlərdə operatorluq edib. Hansı janrda ssenari yazılırdısa, o janra uyğun öz təsvir üsulunu qururdu. Onun çəkdiyi filmlərin heç biri bir-birinə bənzəmir. O, çox maraqlı portretlərlə işləyirdi, dərin mizan səhnələrinin mahir qurucusu idi. Onun filmlərində dinamiklik, təsvir, dramaturgiya vəhdəti var idi. Bu vəhdətin yaradılmasında onun zəhməti böyükdür. O, həm də təsviri sənəti gözəl bilirdi. Arif müəllim hər zaman öz üzərində çalışır, mütaliəsindən qalmırdı. Buna görə də onun intellektual söhbətlərindən doymaq mümkün deyildi".

Kinoşünas Aydın Kazımzadə çıxışında görkəmli sənətkarın keçdiyi həyat yolu və yaradıcılığından söhbət açıb, xatirələrini bölüşüb. Bildirib ki, Arif Nərimanbəyov "Fətəli xan", "Bakının işıqları", "Arşın mal alan" bədii filmlərində ikinci operatoru, "Bəxtiyar", "Qızmar günəş altında", "Bir qalanın sirri", (M.Mustafayevlə birgə), "Leyli və Məcnun", "Möcüzələr adası", "Qaraca qız", "İnsan məskən salır", "Bizim Cəbiş müəllim", "O qızı tapın", "Həyat bizi sınayır", "Var olun, qızlar", "Ömrün səhifələri", "Ürək, ürək", "Dərviş Parisi partladır" (Z.Məhərrəmovla birgə), "Bayquş gələndə", "Onun bəlalı sevgisi", "Nizami", "17 yaşlı oğlan" bədii filmlərinin quruluşçu operatoru olub.

"Arif müəllim mənə həm həyatda, həm də yaradıcılığımda çox böyük kömək olub" - deyən televiziya rejissoru Oqtay Babazadə mərhumla ilk tanışlığından söz açıb, onun bir insan və sənətkar kimi özünəməxsus xüsusiyyətlərindən danışıb.

Kinorejissor Oqtay Mirqasımov mərhum sənətkarı sadə, təvazökar, işinin peşəkarı, kübar insan kimi dəyərləndirib və deyib ki, o, özündən daha çox xalqını, cəmiyyətini, sənətini sevirdi, özünü bu yolda fəda edirdi.

Tədbir boyunca A.Nərimanbəyovun lentə aldığı "Bəxtiyar", "Bir qalanın sirri" kimi Azərbaycan filmlərindən fraqmentlər nümayiş olunub.

Şahanə MÜŞFİQ

525-ci qəzet.- 2017.- 11 oktyabr.- S.7.