Cildlərə sığmayan ömürlər
"Səhər-səhər"
rubrikası
İş elə gətirdi ki, bu yay iki sanballı əsəri
ard-arda oxumağa imkan tapdım.
İki əsər
deyəndə altı kitabı nəzərdə tuturam:
türk yazıçısı, tarixçi Şevkət
Süreyya Aydəmirin Mustafa Kamal Atatürkə həsr
olunmuş “Tək adam” üçcildliyini və Azərbaycan
yazıçısı, publisist Elmira Axundovanın Moskvada nəşr
edilmiş “Qeydar
Aliev. Liçnost i epoxa” (Heydər Əliyev.
Şəxsiyyət və dövr) üçcildliyini...
Hər
iki dəyərli tədqiqatda - onları sənədli roman da
adlandırmaq olar - XX əsrin iki böyük dövlət
xadiminin, xalqlarının taleyində müstəsna rol
oynamış siyasətçilərin ömür yolu ilbəil
izlənməklə bərabər, eyni zamanda, dövrün geniş mənzərəsi əks
etdirdilər. Çünki hər iki şəxsiyyəti
yaşadığı illərdən kənarda təsəvvür
etmək mümkün deyil. Hər iki şəxsiyyət
Zamanın özünü müəyyənləşdirən,
yönəldən, dəyişən dahi insanlardır.
Ş.S.Aydəmirin
və Elmira xanımın kitablarını əlimdə qələmlə
mütaliə edərkən düşünürdüm ki, məsafələr
və illər Atatürklə Heydər Əliyevi ayırsalar
da, onların ömür yolu, taleləri, məmləkətlərinin
tarixində yerləri bir-birinə çox bənzəyir.
Atatürkə
şamil edilən “tək adam” ifadəsi
Heydər Əliyevi də səciyyələndirə bilər.
Heydər Əliyev də çağdaş tariximizdə zirvə kimi ucalan TƏK ADAM
idi. Böyüklüyü, bənzərsizliyi, etibarıyla
da, hakimiyyət Olimpində tənhalığı ilə də...
Hər
ikisi zəngin və gərgin, çətinliklərlə, təhlükələrlə,
risklərlə, eniş-yoxuşlarla dolu, amma sonucda zəfərlə nəticələnən,
cildlərə sığmayan
bir ömür
yaşamışlar...
Hər
ikisi fəaliyyətlərini bir siyasi rejimdə başlamış,
tamamilə başqa, fərqli
siyasi quruluşda davam etdirmişlər.
Mustafa Kamal Osmanlı səltənətinin, Xəlifətin
əsgəri, zabiti, paşası-generalı olmuş, bu
quruluş devriləndən sonra cümhuriyyət Türkiyəsini
dağılmaq, parçalanmaq təhlükəsindən xilas
etmiş, yeni bir dövlətin əsasını qoymuşdur. Heydər Əliyev sovet sisteminin
generalı, Sovet Azərbaycanının, sonra da SSRİ-nin ən
yüksək siyasi mərtəbəsinə yüksəlmiş
siyasətçi, daha sonralar müstəqil Azərbaycanın
ölkəni bəlalardan qurtaran rəhbəri və qurucusu
olmuşdur.
Atatürk
dövlətin
möhkəmliyinin, təhlükəsizliyinin, asayişinin
qarantı olan ordunun əhəmiyyətini yetərincə dəyərləndirirdi.
Heydər Əliyev hələ sovet
dövründə Azərbaycanda Hərbi məktəblər
açmaqla, gəncləri hərbi məktəblərə
göndərməklə gələcək müstəqil Azərbaycanın
güclü orduya ehtiyacını öncədən
görürdü.
Mustafa
Kamal vətən şairi Namik Kamalın poeziyasından təsirləndiyi,
məclislərində
şairlərlə, yazıçılarla durub
oturmağı xoşladığı kimi, Heydər Əliyev
də ədəbiyyatımızın klassiklərinə dərin
hörmətlə yanaşır, ədəbiyyat və sənət
adamlarıyla ünsiyyətdən zövq alırdı.
lll
Nazım
Hikmətin gənclik arkadaşı (sonralar yolları
ayrılsa da), 20-ci illərdə Azərbaycanda da
yaşamış və bu barədə “Suyu arayan adam” adlı
kitab yazmış Şevkət Süreyyanın “Tək adam”
üçcildliyini neçə il qabaq Türkiyədə
almışdım, amma oxumağa macal tapmamışdım. Elmira isə Moskvada yenicə çıxmış
kitabını mənə bu yay hədiyyə etmişdi.
Şevkət
Süreyya Aydəmir kitabının hər cildində Qazi
ömrünün üç mərhələsini əks etdirir: Birinci cild
doğum günündən Türkiyənin xilası yolunda
mücadilənin başlandığı zamana - Mustafa
Kamalın Samsuna çıxışına qədər olan
dövrü əhatə edir (1881-1919). İkinci
cild Qazinin rəhbərliyiylə Qüvveyi milliyənin
Samsundan İzmirə qədəri keçən zəfər
yolunu canlandırır (1919-1922). Və nəhayət
üçüncü cild Cümhüriyyət elan
olunmasından Atatürkün vəfatına qədər
keçən dövrdən bəhs edir (1923-1937).
Mustafa Kamalın tarixdə
rolunu tam dərk etməkçün Osmanlı dövlətinin
XIX əsr və XX əsrin əvvəllərində
nə vəziyyətə düşdüyünü dəqiq
təsəvvür etmək gərəkdir. 1825-1855-ci illərdə
hakimiyyətdə olan rus çarı Birinci Nikolay Peterburq sarayında bir bal
zamanı ingilis səfiri ser Hamilton Seymurla söhbətində
Türkiyəni “Avropanın xəstə adamı”
adlandırır və bu təbir Türkiyənin durumunu səciyyələndirmək
üçün uzun sürə Avropa şüuruna hakim kəsilir.
Türkiyəyə qarşı əsrlər
boyu davam edən bu siyasətin son məqsədi Türkiyəni
parçalamaq, bölməkdir. Bu məqsədlə gah
Balkan hadisələrindən, gah yunanların Bizansı bərpa
etmək xəyallarından,
gah erməni xəyanətindən istifadə olunurdu. Çar Rusiyasının gözü də həmişə
İstanbul-Konstantinopolda idi, ən böyük istəyi
Boğazları ələ keçirmək idi. Boğazlara tək Rusiya yox, İngiltərə,
başqa Avropa dövlətləri də tamah salırdı.
“Tək adam” kitabında bu siyasi məqsədlərlə
bağlı konkret faktlar gətirilir. XIX əsrin
siyasi ərazi iddiaları XX əsrdə də davam etdirilir.
1918-ci ildə İngiltərənin məşhur siyasi xadimi
Lord Kerzon bəyan edirdi: “Türkiyənin Avropada yerləri
Türkiyədən alınmalı, İstanbul və
Boğazların idarəsi başqalarına verilməlidir”.
Bu məşum niyyət həyata keçirilməyə başlamışdı
- İstanbul, Nazım Hikmətin ifadəsiylə desək,
“qırx həraminin” ingilislərin, fransızların,
italyanların, yunanların əsiri idi.
Mustafa
Kamal: “Bir millət əsirliyə düşürsə, o millətdən
olan hər kəs heç olur. Mən bir yabançının evindən çıxarkən
arxamdan güldüklərini duyar kimi olurdum” - deyirdi.
Türk xalqı kimi məğrur xalq milli heysiyyətinin
alçaldılmısına dözə bilməzdi.
İstanbulun
bu zülmət gecəsində milli mücadiləyə həsr
edilmiş “Atəşdən göynək” romanının
müəllifi Xalidə Ədib işğal olunmuş şəhərin
balkonundan xalqa səslənirdi:
“Gecənin ən qaranlıq və əbədi kimi
göründüyü zaman, gün işığının
ən yaxın olduğu andır. Qardaşlarım, mən
görünməyən, fəqət yenilməz ruhlara xitab
edirəm. Qardaşlar, evladlar, sizə dünyanın verdiyi
hökmü dinləyiniz: Avropa dövlətlərinin
işğalçı siyasəti, xəyanətlə və
haqsız olaraq Türkiyəyə qarşı
çevrilmişdir. Əgər ayda və
ulduzlarda da türk və müsəlman olduğunu bilsələr,
istila ordularını oralara da göndərərlər”.
Yazıçı sözünə dəstək əsgər
silahı oldu.
Kiçik bir dəstəylə Samsuna çıxan Mustafa
Kamal bütün Anadolunu bürüyücək zəfər
yürüşünə başladı və bu
yürüş İzmirdə qəsbkar yunan ordularının dənizə
tökülməsiylə
tamamlandı.
Mustafa Kamalın böyüklüyü tək sərkərdə
istedadında deyildi. O, həm də dünyaya, o cümlədən, öz mənəvi
dəyərləriylə öyünən Avropaya yalnız döyüşmək dərsi yox,
həm də əxlaq dərsi
verirdi. İşğaldan azad olunmuş
İzmirdə Kamal paşanın ayaqları altına yunan
bayrağını atırlar. Paşa sərt
baxışlarla: -bu nədir?* - deyə soruşur.
- Yunan
bayrağıdır, paşam - deyirlər. - Bu evdə yerləşən
yunan kralı Konstantin buraya gələrkən
ayağının altına türk bayrağı səribmişlər,
o da bayrağı tapdalayaraq keçmişdir.
Mustafa
Kamal: - Kral xəta
etmiş -deyir - Mən bu xətanı təkrar edəmmərəm.
Bayraq millətin şərəfidir, nə olur
olsun, yerlərə sərilməz və tapdanmaz.
Qaldırın!
Paşa yunanlara başqa bir dərs də verir. Məğlub
olub əsir düşmüş yunan generalı Trikopislə
son dərəcədə nəzakətli və nəcibliklə
davranır. Şahidlərin etirafına görə, Trikopis Kamal
paşaya açıq bir
heyranlıqla baxırdı: - Mən sizin bu qədər gənc
olduğunuzu bilmirdim - deyir.
Mustafa
Kamal isə ona hətta
təsəlli verirmiş kimi: hər komandan yenilə
bilər - deyir. Bundan çox illər sonra general Trikopis
Türkiyənin Cümhuriyyət bayramının hər
ildönümündə Afinada Türk səfirliyinə gəlir,
Atatürkün şəkli
qarşısında baş əyir
və onu düşmən deyil, dünyanın ən fəzilətli,
həm də ən qəhrəman insanı kimi dəyərləndirirmiş.
1937-ci ildə, ölümünə az
qalan zaman Atatürkün dediyi sözlər də bu geniş qəlbli
insanı səciyyələndirir:
“İnsan
mənsub olduğu millətin varlığını və səadətini
düşündüyü qədər, bütün cahan millətlərinin
hüzur və rifahını düşünməli və kəndi
millətinin səadətinə nə qədər qiymət
verirsə, bütün dünya millətlərinin səadətinə
xidmət etməyi
də əlindən gəldiyi qədər
çalışmalıdır”.
Atatürk rejimi müəyyən dərəcədə
avtoritar sistem idi. Tək adam təbiri də elə bu
statusu təsdiq edir. Amma Müstafa Kamalı
öz çağının başqa siyasi rəhbərlərindən
fərqləndirən cəhət məhz dar çərçivədə
deyil, dünya miqyasında düşünmək və hərəkət
etmək fəziləti idi.
Türk tarixinin ən şərəfli səhifələrindən
biri Çanaqqala döyüşləridir. Çanaqqala
döyüşlərindən qabaq Mustafa Kamalın əsgərlərə
dediyi məşhur sözlərini bilirdim: - Sizə mən təəərüz
(hücüm etmək) əmr etmirəm, ölməyi əmr edirəm.
Biz ölüncəyə qədər keçəcək
zaman içində, yerimizi başqa qüvvələr və
başqa komandanlar ala bilir.
İngiltərənin
baş naziri Uinston Çörçillin sözlərini isə
Aydəmirin kitabından öyrəndim.
Çörçil: - Türklər elə
döyüşürdülər ki, canlarını verir, amma
vətən torpaqlarından bir qarış belə vermirdilər.
Çörçil
Çanaqqala döyüşündə həlak olan
işğalçıların 200 min nəfər olduğunu
bildirir, Türklərdən isə 186869 şəhid,
yaralı və itkin düşən olub.
Bir
neçə il qabaq Çanaqqalanı
ziyarət edərkən Atatürkün burda həkk olunmuş
sözlərindən çox təsirləndim. Vətən
yolunda şəhid düşmüş türk “məhmədciklərinin”
məzarlarıyla yanaşı, işğalçı ingilis,
ANZAQ (Avstraliya, Yeni Zelandiya) ordularının həlak olmuş əsgərləri
də səliqəli qəbirlərdə yatırlar. Onların barəsində
Atatürkün dediyi sözlər bəlkə də tarixin ən
şərəfli kəlamlarındandır. Qazi türk
torpağına tapşırılmış yadellilələri
hərbçi kimi dəyərləndirir:
“Bu məmləkətin torpaqları üstündə
qanlarını tökən qəhrəmanlar! Burada dost bir vətənin
torpağındasınız. Hüzur və
sükut içində uyuyunuz. Sizlər məhmədciklərlə
yan-yana, qucaq qucağasınız. Uzaq diyarlardan
övladlarını müharibəyə göndərən
analar! Göz yaşlarınızı ovudun.
Övladlarınız bizim
bağrımızdadır, hüzur içindədirlər və
hüzur içində rahat-rahat uyuyacaqlar. Onlar bu torpağa canlarını verdikdən sonra
artıq bizim övladlarımız olmuşlar”.
Bu
sözlər tarixə düşmüş “Kim bizim
üstümüzə qılıncla gəlsə,
qılıncla da məhv olacaq” sözləriylə necə böyük təzad təşkil
edir. Bir yandan məğlub edilmiş düşmənə mərhəmət,
alicənablıq, bir yandan lovğa qürrələnmə!
Atatürk
həyatda daşıyacağı missiyanı çox gənc
yaşlarından bilirdi və çox gənc
yaşlarından dərk etmişdi ki, ancaq hürr fikirli
insanlar vətənləri üçün faydalı işlər görməyə qadirdilər. O,
özü də azad düşüncəli insan idi. Ordudan
icazəsiz çıxıb anasının yanına gələn Mustafadan
anası Zübeydə xanım: Nə cəsarətlə
buraya gələ bildin, oğlum? - deyə,
həyəcanla soruşur - sakın, dövlətin və
padişahımız əfəndimizin arzusuna müğayir bir
şey yapmış olmayasan?
Anasının
bu təlaşına gənc Mustafanın cavabı çox
ilgincdir:
-
Padişah əfəndimizin nə olduğunu indi deyil, fəqət
yaxın zamanda sənə göstərəcəm - deyir.
Türkiyənin
başqa bir çox dəyərli siyasi və hərbi xadimi
Ənvər paşa Mustafa Kamala
müəyyən qısqanclıqla yanaşırdı.
Müdafiə naziri olarkən Mustafa Kamal haqqında növbəti
rütbə təqdimatına Ənvər paşa belə
münasibət bildirib:
- O,
heç bir şeylə məmnun olmaz. General olar,
korgenerallıq (korpus generallığı) istər, Korgeneral
olur, orgenerallıq (ordu generalı) istər. Orgeneral
olur, müşirlik (marşallıq) istər. Müşir yaparsınız bununla da yetinməz.
Padişahlıq istər.
Ənvər
paşanın sözlərini Mustafa Kamala çatdıranda belə
qarşılıq verib: Mən Enverin bu qədər zəki və
irəli görüşlü olduğunu bilməzdim.
Ənvər paşa yanılmayıbmış. Mustafa Kamal istəsə
də, istəməsə də, Padişah yox, amma Türkiyə
Cümhuriyyətinin ilk Prezidenti oldu.
lll
Elmira Axundovanın Heydər Əliyevə həsr
olunmuş kitabı da xronoloji ardıcıllıqla
üç bölümə ayrılır. 1923-1982-ci illəri
əhatə edən Birinci cilddə doğumundan Moskvaya,
yüksək vəzifəyə getdiyi ilə qədəri
keçən dövrdən söz açılır.
İkinci cild Moskvada keçən illəri (1983-1989), SSRİ
Nazirlər Sovetinin Birinci müavini vəzifəsində
çalışdığı məsuliyyətli və
çətin dövrü əhatə edir.
Üçüncü cilddə Bakıya risklərlə dolu
qayıdışı, ömrünün Naxçıvan
dövrü, yenidən
Bakıya dönüşünün önəmi, müstəqil
Azərbaycanın Prezidenti kimi
tarixi fəaliyyəti qələmə alınıb. Ta
ömrünün son günlərinə qədər.
Əgər
Atatürkün həyatı və mübarizəsi haqqında
bilgilərimizi kitablardan alırıqsa, Heydər Əliyev müasirimiz
idi, fəaliyyətinin mühüm bir hissəsi gözlərimiz önündə
keçmişdi və şəxsən mənə dəfələrlə
onunla ünsiyyətdə olmaq, ətraflı söhbətlər
etmək şərəfi qismət olmuşdu.
Bir
neçə il bundan qabaq Ulu Öndərlə bağlı
xatirələrim, düşüncələrim haqqında, təmaslarımız
barəsində “Unudulmaz
görüşlər” adlı kitabım çıxdı. Bu
böyük insanın həyatı və fəaliyyəti
haqqına məlumatım az deyil. Amma bununla belə, Elmira xanımın sənədli
romanı gözlərim
qarşısında tamamilə yeni, daha dolğun, daha əhatəli
və əzəmətli bir İnsan, Şəxsiyyət, Rəhbər
obrazı yaratdı. Düşündüm ki, Heydər
Əliyev haqqında nə qədər yazılıbsa, deyilibsə də,
onun varlığını bütövlüklə əks
etdirə biləcək əsərlərə hələ
çox ehtiyac duyacağıq. Elmira Axundovanın
publisist-yazıçı istedadını yetərincə qiymətləndirməklə
bərabər onun ən böyük xidmətini onda
görürəm ki, vaxtı-vaxtında H. Əliyevi az, ya çox,
yaxından, ya uzaqdan tanıyan ən müxtəlif
adamlarla
görüşmüş, onların təəsüratlarını,
xatirələrini qələmə
almışdır.
Bunun prinsipal əhəmiyyəti də
var. Elmira xanım cildləri üzərində işləyərkən
inanılmaz dərəcədə çox məxəzlərlə - siyasi kitablarla, sənədlərlə,
memuar ədəbiyyatıyla tanış olub, Heydər
Əiyevlə bir vaxtda Siyasi büro üzvləri olmuş həmkarlarının
çapdan çıxmış xatirələrini oxuyub və
qeyd edir ki, bu kitablarda müəlliflərin çoxundan daha yüksək və
məsul vəzifədə çalışan Heydər
Əliyevdən ya ötəri bir-iki cümləylə danışılır ya heç
danışılmır.
Mənimçün bunun səbəbi aydındır -
qısqanclıq. Ən yüksək vəzifələr
tutan, ya haçansa tutmuş adamlar da bu qısqanclıq mərəzinə
mübtəladırlar. Heydər Əliyevlə
eyni vaxtda Siyasi büro üzvləri olmuş adamlar indi
hardadırlar? Ölən ölüb və
unudulub, qalan qalıb və unudulub, heç kəsin diqqətini
çəkməyən təqaüdçü həyatı
sürürlər. Heydər Əliyev isə müstəqil dövlətin
Prezidentidir və dünyanın ən böyük siyasi liderləriylə
görüşür, ən yüksək beynəlxalq
kürsülərdən çıxış edir, əsrin ən
tanınmış adamlarıyla dostluq münasibətləri
var... Qısqanmasınlar neyləsinlər?
Siyasi
büroda hökm sürən ab-hava haqqında kitabda Heydər
Əliyevin bu sözləri gətirilir:
“Deməliyəm
ki, Siyasi büroda heç kəs heç kimlə səmimi
deyildi, Mən 5 il Moskvada işlədim, Nazirlər Sovetinin
Birinci müavini, Siyasi büro üzvü kimi, amma heç kimlə açıq
söhbət edə bilmirdim. Görürdüm
ki, başqaları da elə. Siyasi
büroda yığışırdıq, hansısa
nöqsanlar barədə nə isə deyirdik, amma öz fikirlərini
səmimi sürətdə bəyan etmək qeyri-mümkün
idi”.
Elmira
Axundova böyük əzm və inad göstərərək,
Moskvada bu “unudulmuş adamların” əksəriyyətiylə
görüşmüş,
onların Heydər Əliyev haqqında fikirlərini
almışdır. Hamısı, o cümlədən, Azərbaycan
rəhbərinə o qədər də xoş münasibət
bəsləməyən Yakovlev kimi adamlar da Heydər Əliyevə
yüksək qiymət
verirlər. Qədim bir kəlam var: “Əflatun
dostumdur, amma həqiqət daha üstündür”. Bunu tərsinə çevirsək, bəzi həmkarları
“Heydər Əliyevlə aram yox idi, amma həqiqət daha
üstündü” deyə bilərlər. Yenə
də sağ olsunlar ki, obyektivlik hissini tamam itirməyiblər
və bu böyük siyasi xadimə layiq olduğu qiyməti
boğazdan yuxarı olsa da, verə biliblər. Bu sözləri onlardan tarix üçün qopartdığına
görə Elmira da sağ olsun.
Elmira Axundovanın kitabını oxuyarkən və Heydər
Əliyevin davranışları haqqında öz təəssüratlarımı
xatırlayarkən onu düşünürəm ki, bu
böyük insan heç vaxt və heç yerdə, o
cümlədən, Moskvada, superdövlətin ən yüksək
məqamında olanda belə, azərbaycanlılığını
unutmur və unutdurmurdu. Axı nə gizlədək, bizim millətin
bəzi nümayəndələri istər Rusiyada, istər
İranda, istər Qərb ölkələrində olsun, sənət,
siyasət, ya biznes sahəsində uğur qazanan kimi hansı
xalqa mənsub olduqlarını ört- basdır etmək, ya ən
azı nümayiş etdirməməyə
çalışırlar. Heydər Əliyev tam bunun əksinə
hərəkət edirdi, hər yerdə, hər vaxt azərbaycanlı
olmasıyla fəxr
etdiyini deyirdi. Bəlkə şovinist ruhlu sovet rəhbərlərinin
ona müəyyən şübhəylə
yanaşmalarının bir səbəbi də elə bu idi.
Heydər Əliyevin bir söhbətini də
xatırlayıram. Deyirdi ki, Siyasi büro üzvü
olarkən sovet rəhbərlərinin SSRİ-nin müsəlman
respublikalarına
başqa gözlə baxmasının şahidi
olmuşam. İndi də dünyanın
aparıcı dövlətləri Şərq ölkələrinə
münasibətlərində ikili standarlarla hərəkət
edirlər.
Mənimçün
o da aydındır ki, Heydər Əliyev nəinki Moskvada
yüksək vəzifədə qalsaydı, hətta Azərbaycanın
rəhbəri kimi fəaliyyət göstərsəydi belə,
erməni separatçıları heç vaxt açıq
şəkildə Qarabağ məsələsini
qaldırmağa cürət etməzdilər. Və mənə
elə gəlir ki
Heydər Əliyev sovet rəhbərliyindən
uzaqlaşdırılmasaydı, SSRİ də bu şəkildə
dağılmazdı. SSR-nin süqutu labüd idi və Heydər
Əliyev də bunu hamıdan yaxşı bilirdi, amma bu, “boşanma”
prosesi daha sivil yolla, respublikaların bir-birinə ərazi
iddiaları olmadan, qan tökülmədən,
ölüm-itimsiz, qonşu torpağına təcavüzsüz baş verə bilərdi.
Əlbəttə,
məni Heydər Əliyevin Azərbaycanda Partiya rəhbəri
və Prezident kimi Birinci və ikinci dövrdə ziyalılarımızla münasibəti
daha çox maraqlandırırdı. Bu
baxımdan kitabda bəhs olunan hadisələrdən
çoxunun canlı şahidi olsam da, onlar barədə bir daha
oxumaq məndə qəribə nostalji hissləri
oyadırdı. Axı birinci katib olanda da, Prezident kimi fəaliyyət
göstərəndə də Heydər Əliyev klassik
yazıçılarımızın və bir çox
çağdaşlarımızın yubileylərində
mütləq iştirak edərdi, teatr və film
tamaşalarına, konsert və sərgilərə gələrdi.
Bu, əlbəttə, çox əhəmiyyətli
idi, amma bəlkə bundan da əhəmiyyətli o idi ki,
hamımızı, xüsusiylə də ədəbiyyata, sənətə
təzə gəlmiş cavanları qoruyurdu.
Bir dəfə - Sizin ölkənizdə dissidentlər
yoxmuydu? - sualına Heydər Əliyev: - Biz onları
axtarmırdıq, axtarsaydıq, tapmaq olardı -
cavabını vermişdi, Doğrudan da o vaxt Azərbaycan ədəbiyyatında,
teatrında, kinosunda yaranan əsərlərə hansısa
müttəfiq respublikada demirəm, Leninqrad, ya hətta Moskvada
belə asanlıqla dissetentlik damğası vurula bilərdi.
Axı “Papadan çox katolik”, yaxud “kraldan çox
kralçı” olan məmurlardan betər ədəbi
darğalar da var. O əsəri, bu əsəri iyləyib
lazımi yerlərə danos verənlərin də kökü kəsilməyib.
Hər yerindən
kal duran, ədəbiyyata heç oxucu kimi də dəxli
olmayan adamlar yazıçılara Jdanov - Suslov sayağı nədən
yazmağı və necə yazmağı tövsiyyə edir.
Yazıçılar
Birliyi Aqanbekyanlara, Sero Xanzadyanlara, Perç Zeytunsyanlara, Zori
Balayanlara, Suren Ayvazyanlara cavablar verəndə bəzi
tarixçilərimiz əcdadlarımızı - Dədə
Qorqud oğuzlarını basqınçılar kimi qələmə
verir, Bakı kommunasının “şərəfli” fəaliyyətindən
dissertasiyalar müdafiə edib
alim olurdular.
Heydər
Əliyev hər
kəsin yerini və kim olduğunu yaxşı bilirdi və onu
da bilirdi ki, sovet vaxtı Moskvanın hər növ təzyiqlərinə
rəğmən Azərbaycan ziyalılarını bada vermək
olmaz. Mən bu sözləri havadan demirəm.
Elə Elmira Axundovanın kitabıyla tanış
olmaq kifayətdir ki, Heydər Əliyevin Azərbaycan
ziyalılarına - yaşlısına da, cavanına da necə
qayğı və diqqətlə yanaşmasının
şahidi olasan. Həm də bu diqqət, bu
qayğı sovet dönəmindən
başlanmışdı. Yəni o illərdən ki, Mərkəzin
bütün təhriklərinə və təzyiqlərinə baxmayaraq, millətçi kimi damğalanan
ziyalılarımızı Mərkəzin ayağına verməməklə
MK-nın Birinci katibi özünü də riskə
atırdı.
Qədirbilən
yazıçılarımız bu böyük insanın
xeyirxahlığını unutmur, ən çətin
anlarında ona hörmət və rəğbətlərini
gizlətmirdilər. Heydər Əliyev ədalətsizcəsinə
vəzifələrindən uzaqlaşdırılıb,
haqqında mətbuatla böhtanlar yazılan zamanlar, doğma
Naxçıvana sığındığı günlərdə
onun jurnalist Elmira Əhmədovaya verdiyi ilk müsahibəsi
Yazıçılar Birliyinin “Ulduz” jurnalında çap
olunmuşdu. Elmira Axundova mərhum Elmira Əhmədovaya istinad
edərək yazır ki, “Ulduz” jurnalının bu nömrəsini
Heydər Əliyevə təqdim
edəndə: Mən ki bu Abbas Abdullaya (o vaxt jurnalın redaktoru) bir
yaxşılıq eləməmişəm, - deyib - bu
müsahibəni çap etməyə necə cəsarəti
çatıb”.
O
uğursuz günlərdə,
çoxları Heydər Əliyevdən üz döndərəndə onu Yazıçıların
Qurultayına dəvət etməyimiz, Qurultayda hörmətlə
qarşılanması, sonra Prezident olduğu vaxt növbəti
qurultayımızda iştirakı və o hadisəni minnətdarlıqla
xatırlaması haqqında dəfələrlə deyilib,
yazılıb. Mən də yazmışam,
Elmira xanım da kitabında yazır. Təkrara
ehtiyac yoxdur.
Elmira Axundovanın kitabının məziyyətlərindən biri də müəllifin tarixilik hissidir. O, heç yerdə tarixi hadisələri, tarixdə öz yeri olan şəxsiyyətləri günün konyukturu mövqeyindən çıxdaş eləmir. Tarix saxtakarlığı sevmir və hansısa hadisələrin, adların üstündən keçmək bir vaxt bu hadisələrin, adların başqa cür ifratla şişirdilməsinə səbəb ola bilər. Hər kəsin tarixdə öz yeri var. Heydər Əliyevə gəldikdə isə həm tarixin çıxardığı nəticə, həm də bu nəticənin Elmira xanımın kitabında real faktlara əsaslanan təsdiqi ondan ibarətdir ki, Heydər Əliyev Azərbaycan taleyinin ən çətin dövrlərində xalqımızın bəxtinə düşmüş nadir şəxsiyyət, siyasi dahi idi. Həmişə də tarixdə belə qalacaq.
Bu yazımda bəhs etdiyim böyük şəxsiyyətlərdən birini kitablardan öyrəndim, biriylə şəxsən tanış idim. İndi cildliklər vasitəsiylə - Şevkət Süreyya Aydəmirin “Tək adam” və Elmira Axundovanın “Heydər Əliyev. Şəxsiyyət və dövr” tədqiqatlarıyla - türk dünyasının və XX əsrin iki nəhəng siyasətçisiylə təmasda olmağım mənə gələcəyə böyük ümidlər bəxş etdi.
Bu yazımı üç alıntıyla bitirmək istəyirəm.
Şövkət Süreyya Aydəmir Atatürk haqqında yazır:
Xalqdan biri olaraq doğuldu... Amma öldüyü gün ona: - Millətin ən böyük evladı - dedilər.
Elmira Axundova Heydər Əliyev haqqında yazır:
Bəzən məndən soruşurlar: Heydər Əliyev haqqında hələ nə qədər yazacaqsınız? Açıq deyirəm: Yəqin ki, ömrüm boyu. O, elə bil unikal şəxsiyyət idi və elə bir unikal taleyi vardı ki, bunların publisistikada əks olunmasına son dərəcə böyük məsuliyyətlə yanaşmaq lazımdır. Həm də böyük məhəbbətlə.
Azərbaycan Respublikasının Prezidenti İlham Əliyev:
Bu gün Heydər Əliyev bizimlə deyil, amma biz ruhdan düşməməliyik. Onun ideyaları yaşayır, fəlsəfəsi, azərbaycançılıq fəlsəfəsi, ideologiyası yaşayır, onun yaratdığı və qurduğu Azərbaycan yaşayır və inkişaf edir. Biz hamımız Vətənimizi onun göstərdiyi yolla irəli aparmalıyıq.
23-26 oktaybr 2017
ANAR
Xalq
yazıçısı, Azərbaycan Yazıçılar
Birliyinin sədri
525-ci qəzet.- 2017.- 28 oktyabr.- S.10-11.