“525”in Universitet sevgisi - “525”-25

“525-ci qəzet”in qarşıdan gələn 25 illik yubileyi ilə bağlı Bakı Dövlət Universitetinin professoru Cahangir Məmmədlinin rəhbərliyilə xüsusi nəşr layihəsi həyata keçirilir. Bununla əlaqədar hazırlanan kitabda Azərbaycanın dəyərli qələm adamlarının fikirləri, yazıları yer alacaq. Həmin yazılar ardıcıl şəkildə qəzetimizdə də dərc olunacaq.

Azərbaycanın yeni müstəqillik çağı və xüsusilə Ulu Öndərimiz Heydər Əliyevin yenidən hakimiyyətə qayıtması bütün sahələrdə olduğu kimi, ölkədə demokratik media sisteminin formalaşması və inkişafı sahəsində də əsaslı dönüş yaratdı. Azərbaycanda kütləvi informasiya vasitələri ətrafında qanunvericilik bazasının formalaşması, 1995-ci ildə qəbul edilən Azərbaycan Respublikasının Konstitusiyasında birdəfəlik təsbit olunan söz və mətbuat azadlığı, Prezidentin Azərbaycanda senzuranın qalıqlarını birdəfəlik ləğv edən 6 avqust 1998-ci il tarixli fərmanı və digər önəmli sənədlər azad və demokratik mətbuatın tam mənada bərqərar olmasına şərait yaratdı. Belə bir şəraitdə Azərbaycanın çap mətbuatı, elektron informasiya vasitələri və online internet dünyası güclü bir inkişaf prosesi keçirdi və bu proses getdikcə genişlənməkdədir.

Azərbaycan Respublikasının Prezidenti İlham Əliyevin demokratik mətbuat konsepsiyası çərçivəsində bu inkişafın yeni parametrləri jurnalistikamızın ictimai, siyasi həyata daha dərindən nüfuz etməsini şərtləndirməkdədir. Bu inkişaf kontekstində ölkədə KİV-in çoxistiqamətli tipoloji göstəriciləri yaranmışdır. Mətbuatın belə sürətli inkişafı, Ulu Öndərimizin ona verdiyi dəyər və qiymətlə çox bağlıdır. Heydər Əliyev hələ 1999-cu ilin iyulunda “Azərbaycan Respublikasının mətbuat işçilərinə” təbrik məktubunda deyirdi: “Mətbuat demokratiyanı dərinləşdirən, siyasi inkişafa təkan verən qüdrətli vasitədir. Bu gün əsas vəzifə onun geniş imkanlarından milli dövlət quruculuğunda, demokratik dəyərlərin bərqərar edilməsində, sivil vətəndaş cəmiyyətinin formalaşmasında, islahatların həyata keçirilməsində, insanların mənəvi saflaşmasında səmərəli istifadə etməkdən ibarətdir. Mətbuat həyatın güzgüsü, həqiqətin carçısı olmalıdır, insanları yüksək ideallar uğrunda mübarizəyə səsləməli və səfərbər etməlidir”. Ulu Öndərimizin mətbuata bu elmi baxışı Azərbaycan jurnalistlərinə bir yol göstəricisidir və bu baxış daim onların diqqət mərkəzindədir. Bu elmi konsepsiya istiqamətində ölkəmizdə bir sıra dəyərli qəzet və jurnal, teleradio, internet portalları yarandı. Cəsarətlə demək olar ki, “525-ci qəzet” bu sistemdə müstəqil qəzet tipi kimi çox nümunəvi bir mətbuat orqanıdır. O da məlumdur ki, müstəqil qəzetin tematikası, toxunduğu mövzular, qaldırdığı problemlər daha zəngin olur. “525-ci qəzet”, bəlkə də hər şeydən öncə tematika zənginliyi ilə oxucunu cəlb edir. Bütün fəaliyyəti boyu- yəni ötən 25 il müddətində bu qəzet öz tematik zənginliyi ilə bu günümüz və tariximiz üçün ciddi bir ensiklopedik mənbə yaratmışdır. Mən ilk növbədə bir oxucu kimi və bir dövlət adamı, təhsil işçisi kimi bu qəzeti yarandığı gündən izləməkdəyəm. Bu qəzət həmişə ictimai marağı, milli maraqları üstün tutmuş, öz yazılarında heç vaxt peşə etikasının heç bir qaydasını pozmağa yol verməmişdir. Xalqımızın milli-mənəvi dəyərlərinə diqqət və onu zənginləşdirmək, ədəbiyyatımızı və jurnalistikamızı inkişaf etdirmək, azərbaycançılıq ideologiyasını rəhbər tutmaq bu qəzetin xidmət etdiyi amallar sırasındadır. Xalq arasında böyük nüfuza malik ictimai və dövlət xadimlərinin, ədəbiyyat və sənət adamlarının “525-ci qəzet”ə bu məhəbbəti qəzetin mətbu orqanlar sırasında qazandığı nüfuza bağlıdır.

Mən yuxarıda “525-ci qəzet”in mövzu dünyasına toxundum. Onun bu mövzu dünyasında bütövlükdə təhsil sistemimiz və etiraf edək ki, ayrılıqda Bakı Dövlət Universiteti çox önəmli yer tutur. Bizim universitetimizdə ictimai maraq doğura biləcək elə bir tədbir yoxdur ki, bu tədbir “525-ci qəzet”in diqqətindən yayınsın. Bizim mətbuat və informasiya şöbəsi ilə bu qəzetin çox gözəl əlaqələri var. Bakı Dövlət Universitetinin tədris həyatı, elmi fəaliyyəti, ayrı-ayrı önəmli professorlarımız haqqında portret oçerklər - bütün bunlar “525-ci qəzet”in daim diqqət mərkəzindədir. Bəzən mən özüm də qəzetin universitetə olan bu diqqətinin səbəbləri haqqında düşünürəm. Və əlbəttə, ağlıma gələn ilk səbəb ondan ibarətdir ki, bu qəzetin yaradıcı kollektivi “universitet” sözünün siqlətini, BDU-nun Azərbaycan xalqına, dövlətçiliyimizə nə qədər dərindən bağlı olduğunu nəzərə alması, “universitet” sözündən qürur duymasıdır. İkinci səbəb ona bağlıdır ki, “525-ci qəzet”in əsas yaradıcı qüvvəsi, öndə qəzetin baş redaktoru Rəşad Məcid olmaqla az qala bütün əməkdaşları Bakı Dövlət Universitetinin Jurnalistika fakültəsinin yetirmələridir. Bu kollektiv jurnalistikanın peşəkarlıq xüsusiyyətlərini indinin özündə də çox hörmət etdikləri bu fakültədə öyrənmiş, amma çox keçmədən özləri də “525”i bir universitet səviyyəsinə qaldırmışlar. Elə bir universitet ki, onun yaradıcılıq fəaliyyəti yeni nəsil jurnalistlər üçün bir məktəb rolundadır.

Bakı Dövlət Universitetinə göstərdiyi diqqət və sevgisinə görə universitetimizin kollektivi “525”i “bizim qəzet” adlandırır. “525-ci qəzet” ən çox sevdiyim, güvəndiyim, yazılarından zövq aldığım qəzetlərdəndir. Bu qəzetin şənbə buraxılışları ölkəmizin siyasi, ictimai, mədəni həyatının güzgüsüdür. Universitet kollektivinin “bizim qəzet” adlandırdığı “525”in baş redaktoru Rəşad Məcid “Bakı Dövlət Universitetinin dostu” adına layiq görülüb. Universitetimiz qəzetin yarandığı lap ilk vaxtlardan onun abunəçisidir.

İndi “bizim qəzet”in 25 yaşı tamam olur. İyirmi beş yaş, xalq dilində desək, bir igidin ömrüdür. “Bir igidin ömrünə bərabər” fəaliyyət çağında minlərlə oxucu məhəbbəti qazanmış “525”ə bundan sonra da uzun və uğurlu bir ömür yolu arzulayıram.

Abel MƏHƏRRƏMOV

AMEA-nın və Rusiya Elmlər Akademiyasının həqiqi üzvü

525-ci qəzet.- 2017.- 30 sentyabr.- S.8.