Görkəmli sənətkara ehtiramın təntənəli ifadəsi

 

 

Bir musiqiçinin yiyələndiyi sənət üzrə zirvəni fəth etməsi onun xoşbəxtliyidir.

 

Dinləyicilər tərəfindən həm sənətkar, həm dəyərli insan, həm pedaqoq kimi sevilmək, rəğbət qazanmaq hər ifaçıya nəsib olmur. Dünyanı dolaşaraq Azərbaycan musiqi mədəniyyətini daim təbliğ edən çox dəyərli sənətkarlarımızdan biri, skripka ifaçılıq sənətində iz qoymuş Xalq artisti, professor Zəhra Quliyevadır.

 

Tanınmış skripka ifaçısı Zəhra Quliyeva uzun zamandır musiqi mədəniyyətimizə öz töhfələrini verir. Onun sənət yoluna qısaca nəzər salaraq deyə bilərik ki, musiqiyə erkən yaşlarında marağı yaranan Zəhra Quliyeva ilk  professional musiqi təhsilinə Bülbül adına Orta İxtisas Musiqi Məktəbində başlayıb, istedadlı gənc musiqiçi təhsilini böyük həvəslə Azərbaycan Dövlət Konservatoriyasında davam etdirib.  Gənc skripkaçı təhsil illərində istedadı ilə fərqlənərək tez-tez konsertlərdə virtuoz ifaları ilə çıxış edib. Təhsilinin davamı olaraq Zəhra xanım N.A. Rimski-Korsakov adına Leninqrad Dövlət Konservatoriyasının assistent-stajor bölməsinə daxil olub. Qürbətdə təhsil alan gənc ifaçı bu illərdə Azərbaycan bəstəkarlarının əsərləri ilə bir çox konsertlərdə çıxış edib.  Zəhra xanım yaradıcılığı boyu özünü aparıcı kimi sınayıb, uzun illər  Azərbaycan Dövlət Televiziyasında  "Zəriflik" adlı proqramı izləyicilərə təqdim edib. Çoxşaxəli yaradıcılığına bir çox nailiyyətləri sığdıran Zəhra Quliyeva  Türkiyənin Bilkənd Universitetində müəllimlik fəaliyyəti göstərib. Bununla yanaşı onun saysız qastrol səfərləri olmuş bu sayədə Zəhra xanım dünyanın bir çox səhnələrini dinləyicilərin qəlbini öz skripkasındakı ifası ilə fəth edə bilib. Bütün bu keşməkeşli sənət yolunda formalaşan Zəhra Quliyeva sənətkarlıq zirvəsinə ucalıb.

 

Zəhra xanım 1978-ci ildən  Azərbaycan Dövlət Konservatoriyasında pedaqoji fəaliyyətə başlayıb bu gün şərəfli müəllimlik sənətini Ü. Hacıbəyli adına Bakı Musiqi Akademiyasında davam etdirməkdədir. Müasir dövrümüzdə ölkəmizin digər sahələri kimi Azərbaycan musiqi mədəniyyəti fasiləsiz inkişafdadır. Təbii ki, bu inkişafın arxasında zamanla püxtələşmiş Zəhra xanım kimi dəyərli sənətkarlar dayanmaqdadır. Dünya səhnələrində məharətlə çıxış edən yeni nəsil ifaçılarımız sözü gedən musiqi inkişafımızın bariz nümunələridirlər.Dəyərli sənətkarımızın özündən sonra belə tələbələr yetişdirməsi bizim üçün fəxrdir.

 

Gələn yeni nəsil nümayəndələri artıq Respublikanın Xalq artisti, professor Zəhra Quliyeva kimi pedaqoqdan dərs alma imkanı əldə edə bildikləri üçün şanslıdırlar.  Onların təcrübələrindən yararlanaraq irəliyə doğru parlaq şəkildə addımlayırlar.

 

Bu günlərdə (13 yanvar 2017) Xalq artisti, professor Zəhra Quliyevanın illərdir sənətinin sirlərini bölüşdüyü tələbələri ilə birgə özünün yubiley konserti keçirildi. Azərbaycan Respublikasının Mədəniyyət Turizm Nazirliyinin dəstəyi ilə təşkil olunan tədbirdə rəngarəng musiqi proqramı ilə  Ü. Hacıbəyli adına Azərbaycan Dövlət Simfonik Orkestri (bədii rəhbər baş dirijor: Xalq artisti Rauf Abdullayev), Zəhra xanım tələbələri- Beynəlxalq müsabiqələr laureatları Səbinə Quliyeva, Cəmilə Qarayusifli, Anar Seyidov, Mustafa Mehmandarov, Xədicə Mirqulamlı, Çinarə Əzimova, Osman Mustafazadə musiqisevərlərin qarşısına çıxdı. Zəhra xanımın tələbələri öz müəllimlərinin işığına müxtəlif ölkələrdən toplanmışdılar.

 

Azərbaycan Dövlət Filarmoniyasında keçirilən "Violino musiqi gecəsi" adlı yubiley konsertinin musiqi çələngində A.Vivaldi, E. Lalo, P.Sarasate, M.Brux, B. Britten, E.Morikkone kimi xarici ölkə bəstəkarlarının əsərləri yer almışdı.

 

Tədbiri musiqişünaslıq üzrə fəlsəfə doktoru Səadət Təhmiraz qızı açaraq professor Zəhra Quliyevanın həyat yaradıcılıq yolu haqqında çıxış etdi. Səhnəyə çıxan Xalq artisti, professor, "Şöhrət" ordenli dirijor Rauf Abdullayev öz ustadlığı ilə bütün orkestri dinləyicilərin diqqətini ələ aldı. İlk musiqili nömrə olaraq Zəhra xanım tələbəsi Səbinə Quliyeva  məhşur italyan bəstəkarı A. Vivaldinin "İki skripka orkestr üçün konsert (a-moll)"ini səsləndirdilər.

 

Daha sonra səhnəyə çıxan Mustafa Mehmandarov tədbir üçün vətənə Avstriyadan təşrif  buyurmuşdu. Gənc və istedadlı  dirijorun rəhbərliyi ilə səslənən əsərlər - Pablo Sarasatedən "İntroduksiyaTarantella" (solist Xədicə Mirqulamlı), Maks Bruxdan "Skripkaorkestr üçün konsert, 2-3-cü hissələr" (solist Çinarə Əzimova) böyük marağa səbəb oldu. Konsert çərçivəsində maraqlı məqamlardan biri Cəmilə Qarayusiflinin ifasında B.Brittenin violaorkestr üçün  əsəri idi. Bu möhtəşəm əsər Azərbaycanda ilk dəfə səslənirdi. Uzun müddətli səslənən alıqşlar əsərin və ifaçının sevilməsinin göstəricisi oldu. Qeyd edək ki, Cəmilə Qarayusifli yubiley gəcəsində iştirak üçün İsveçrədən gəlmişdi.

 

 Ardarda çıxış edən gənc istedadların hər biri müəllimləri Zəhra Quliyevanın  onlar üzərindəki təsiri və əməyini ifadə edirdi. Tədbirin sonlarına doğru Xalq artisti Rauf Abdullayevlə birgə səhnəyə Rusiyadan yenicə qayıtmış bacarıqlı skripka ifaçısı Anar Seyidov çıxdı. Dinləyicilər Anar Seyidovun ifasında P.Sarasarte "Qaraçı nəğmələri"nə qulaq asdılar. Məhşur əsər ifaçı tərəfindən ustalıqla səsləndi.

 

Musiqisevərlərlə dolmuş zalda auditoriyanın fasiləsiz alqışları ilə müşayiət olunan yubiley gəcəsi konserti geniş rəğbətə boğulmuşdu. Yaradıcı ab-hava hər bir dinləyiciyə öz təsirini göstərmişdi.

 

Son olaraq səhnəyə professor Zəhrə Quliyeva çıxaraq, ilk öncə dinləyicilərə, daha sonra tədbirdə əməyi keçənlərə -  xüsusilə Azərbaycan Respublikasının Mədəniyyət və Turizm Nazirliyinə, Azərbaycan Dövlət Simfonik Orkestri heyətinə və tədbirdə məharətlə çıxış etmiş tələbələrinə öz dərin minnətdarlığını bildirdi.

 

Dəqiqələrlə səslənən alqışların fonunda dinləyicilərin konsertdən necə də razı, sevinclə ayrılması onların gözlərindən oxunmaqda idi.

 

Virtuoz skripka ifaçısı, Xalq artisti, professor, dəyərli pedaqoq Zəhra xanıma Tanrıdan uzun ömür, davamlı sənət uğurları, can-sağlığı diləyirik. Xalqımızın, mədəniyyətimizin Zəhra xanım kimi əvəzsiz sənətkarlara, onların konsertlərinə daim ehtiyacı var.

 

İlahə QİSMƏT

Ü.Hacıbəyli adına BMA-nın Mətbuat xidmətinin əməkdaşı

 

525-ci qəzet.- 2017.- 17 yanvar.- S.7.